حكاية زين ورحمة
المحتويات
باله أما يعزف للنجوم وليها ويكسر سكون الليل بألحانه.
وعزف
وعزف زين الدين لحن والتاني والتالت الأول حزين والتاني راضي والتالت كله أماني وقبل ما لحنه يقف أو الشمس تطلع
انتبهتله!
تقصد عرفته تاهت في الشكل والصوت وعرفت اللحن وصاحبه عرفت الونيس من حزن نايه عرفت إن فيه إنسان بيناديها وعرفت إن قلبها لقى حبيبه اللي كان بيدور عليه.
وزين الدين
كان ليله عيد فغنى الليل بطوله وعاد لها اللحن مرة واتنين وتلاتة وفي كل مرة صوابعها كانت بتشد على صوابعه وقلبها بيعرفه وعيونها بتوعده والبسمة رجعت واتردد جمالها في قلب زين الدين من تاني.
وبعدين
وبعدين بقى دا الحال يوم ورا التاني الونيسة بتعرف ونيسها والعلة بتخف وهو جنبها ومعاها بيساعدها بلحنه الي بتفهمه وبيشدها لتاني لدنيا تاهت عنها سنين.
والنهاية
والنهاية إن الأيام جريت بيهم والحبيبة رجعت لدنيتها وقرر زين الدين وعزم النية فأخد الأهل والأصحاب ودق على الباب وطلب إيد ونيسة الليل والألحان وعاشوا سوا في هنا وراحة بال وبس.. خلاويص خلصت حكايتنا.
ابتسمت وصقفت صقفة النهاية ورجعت معاه لدنيتنا فقابلني سكوته وحيرته.
مالك محبتش الحكاية
حبيتها.. حبيتها جدا.
ابتسامتي اختفت لما شفت حزنه وقبل ما اسأله عن حاله قام وقف وشال قطتنا على كتفه.
ممكن تتمشي معايا شوية
ممكن.
مشيت جنبه واحترمت سكوته وعيونه الي كانت بتعد خطواته على الأرض بدون داعي لحد ما رفع راسه ليا وقال بصوت كله حزن
كان عندك حق احنا الحكايات والحكايات احنا.
بصتله بفهم لقيت فيها حاجة تشبهك
علة البطلة وجعها على الصحبة والحب والحلم شوفتي فقدنا لأحلامنا ممكن يوصلنا لإيه فقدت صوتها ففقدت اتصالها بالعالم ومن بعدهم فقدت نفسها.
بس متنساش إنه لقاها وإنها كانت بتخف يوم بعد يوم.
انفعل ودي مشكلة تانية تخيلي لو مكنش لقاها تخيلي حالها تخيلي تعيش اللي باقي من عمرها تبكي على حلم ضاع منها تخيلي العجز اللي كانت هتحس بيه كل يوم وهي شايفة ناس أقل منها وبيحققوا حلم يشبه حلمها تخيلي ..
سكت فجأة زي ما انفعل فجأة واتنهد بصوت عالي وهنا فهمت إنه مش جاهز يحكي عن علته هو فهمست لما طال كبته
كدا برضو تفزع قطتنا
نجحت بسهولة
قطتنا!
لاعبته بنظرة شهدت على قعدتنا وحكايتنا تبقى قطتنا حتى لو بقى ليها صاحب غيور عليها حبتين.
طبطب عليها بحب وبصلي
أنا متأسف انفعلت وقولت كلام ملوش معنى وإنت ملكيش ذنب.
متشغلش بالك بيا هون على نفسك بس.
هز راسه بهدوء وفضلنا ماشيين جنب بعض ساكتين وقبل ما الشارع يخلص أو الوقت يسر..قنا قال فجأة
إنت غريبة أوي.
ليه بس
مش ناوية تسأليني عن حكايتي
إنت عاوزني اسأل
مش عارف.
هتعرف.. في وقت ما هتعرف وهتكون جاهز إن الدنيا تسمعك وساعتها مش هكون أنا ولا غيري أول السامعين هتكون إنت تسمعها وتفهمها وتدور معاها على حل يرضيك ويرضيها.
سكت شوية وبعدها غمزلي ورفع عينه للسما
وليه متكونش نجمتي أول السامعين
هزيت راسي برضا فكمل
مش هتحكيلي بقى
أحكيلك إيه
حكاية كمان.
مش كنا اتفقنا إنها حكاية واحدة
علشان خاطري خليهم حكايتين.
بصيت في ساعتي.
لو بس كان الوقت يكفي لكن ..
رفعت شنطتي على كتفي ووقفت خطواتي قدامه.
الوقت سرقني لازم أمشي.
بص في ساعته بسرعة.
معقول! دا أنا محستش بالوقت أبدا.
اتنهدت اه يا زين وزي كل الحكايات كل لقا ولازم تكون له نهاية.
مضحكش بصلي بزعل وسألني
هشوفك تاني
يمكن.
وهتحكيلي تاني
يمكن.
وهاكل معاكي تاني
تؤ.. هسيبك جعان.
ضحك لأول مرة من لحظة لقانا ضحكة من قلبه فضحكت معاه ومحدش فينا اتحرك نص خطوة.
ولما الهوا شد حيلة علينا خبيت ايديا من البرد
في جيوبي وهو حضن قطتنا بدرعاته فسألته
مش ناوي بقى تسيبها
بصلها بعطف شكلي هروح بيها.
ابتسمت لنفسي ورعايتها.. تقدر عليها
هنجرب حظنا مش بتقولي تشبهني يبقى أكيد هتفهمني.
هتسميها إية
لما بس تقوليلي.
أقولك إية
إنت مين وقبل ما تردي أنا هنا أقصد اسمك.
اسمي رحمة.
امممم يبقى اسمها رحمة.
فضلت البسمة على شفايفي وزادت حبتين لما قال
تعرفي.. أنا سعيد بشكل يمكن معرفتش إنت مين وليه اتقابلنا وصحيح مش عارف إذا كان مكتوب لينا نتقابل مرة
هدى صوته وابتسامته كانت تشبه الأحلام
وحكاية كنت جزء منها فشكرا ليك وشكرا لمساعدتك اللطيفة.
وختم كلامه بإنه مد إيده في جيب الجاكت وطلع قلم وقدمه ليا
ممكن تقبلي مني دا
إنت بتهاديني!
وفيها إيه
إنت متعرفش إن فيه اسطورة بتقول إن الهدية بتسرق من القلب دقة كدا يا اسمك إيه هتخليني كل لما أمسكه أفضل أفكر فيك.
ضحك كويس علشان تفضلي فعلا فاكراني.
ابتسمت لضحكته وسألته بجدية
لا بجد قولي ليه قلم
علشان تفضلي دايما تكتبي حكايات.
أخدته بخجل وحسيت إني في اللحظة دي أتمنى أكتب ألف حكاية وحكاية.
أنا كمان مبسوطة إني شفتك واتمنى إن كل أيامك تكون سعيدة وسواء اتقابلنا تاني ولا لا خلي بالك من نفسك و.. شكرا على القلم هفضل دايما فاكراك.
طبطت على القطة بوداع ولما لفيت وبعدت عنه وقفني صوته من بعيد
وأنا أتمنى أشوفك تاني.
اتنهدت وبصيت للسما بقلة حيلة شوفتي بقى مش أنا اللي اتمنيت.. دا هو خليك شاهدة عليه.
لفيتله بدون ما أرجعله وقولت بصوت يسمعه
مش كنا اتفقنا إن الأماني للنجوم وبس يا اسمك إيه
قرب الخطوات اللي بعدتها عنه.
طيب وأنا إيه يضمنلي إنك إنسانة زيي مش يمكن تطلعي نجمة وتحققي ليا أمنيتي
كده برضو تتخلى عن نجمتك من أول ليلة
أعمل إيه ما أنا احترت فيكي.
بصتله بشقاوة تحب أوشوشك بسر
وشوشيني.
إحنا.. هنتقابل.. تاني.
فين
وطي صوتك لا النجمة تسمعنا وتغير عليك.
وطى صوته خالص فين
يمكن في مكان إنت بتحبه يمكن في مكان أنا بحبه ويمكن هنا في أول مكان جمعنا.
ولو دورت هنا وملقتكيش
لو مكنتش هنا هكون هناك ولو بتسأل هناك فين ارجع لنفسك ارجع دور على الحلم الي ضاع منك ولما تلاقيه هتلاقي حياتك ولما تلاقي حياتك ولسه عاوز تلاقيني هتلاقيني واقفة هناك مستنياك زي ضل بيشوفك من بعيد من ورا الرفوف والحكايات لا يقدر يقرب منك ولا يعرف في يوم يبعد عنك.
مستنياني فين وضل إيه أنا مش فاهمك.
متشغلش بالك بيا وقولي .. تقدر توعدني
طيب
وحيات زين الدين جاوبني تقدر توعدني
أوعدك بإيه
اوعدني تحاول من جديد ومش دلوقتي ولا بكرا اختار الوقت الي يناسبك بس أرجوك.. أرجوك حاول ومتستسلمش.
بصلي زي المسحور وقال بتوهه
إنت مين
إنسانة تتمنى ترجع تسمعك.
تسمعني! إنت تعرفيني
متفكرش.. أرجوك اوعدني.
أوعدك.. أوعدك هحاول.
غمضت عيني لحظة بتعب وابتسمت له ولنفسي وللمحاولة بانتصار
وأنا مستنياك تلاقيني.
حفظت صورته وهو شايل قطتنا وبيودعني في عيوني.
ومشيت شارع بيتنا خطوة بخطوة وأنا بدندن ومعايا ضحكته وقلمه ووعده إن دي متكونش النهاية.
فتحت الباب بشويش ودخلت أتسحب وقبل ما أوصل لباب أوضتي وقفني صوت جدتي
شوفتيه.
لفيتلها بضحكة برضو منمتيش
واتكلمت معاه.
أخدت دواك
وعرفك.
لا.. معرفنيش.
سكتت بخيبة فقربت منها وحضنت دراعها بحب.
بس أنا مش زعلانة تعرفي يا نينة أنا الفرحة مش سيعاني دا أنا لو أطول ألمس النجوم بإيديا كنت عملتها.
للدرجادي كان نفسك تكلميه
وكان نفسي أكتر يسمعني كنت عايزة أسيب دور الضل الي بيسمعه من بعيد وأقرب منه وأكون سبب في سعادته كنت عاوزة أساعده يا نينة وأخفف عنه ماهو ساعدني كتير حتى وهو ميعرفنيش.
طيب حكتيله حكايتك
لا لما يلاقيني هيعرف أنا قولتله دور عليا تلاقيني وهو وشطارته بقى.
أنا متشكرة.. متشكرة أوي يا نينة بسببك إنت بس عشت ليلة ولا في الحكايات. قربت منه وقعدت جنبه وأكلنا سوا وكمان.. كمان سمى قطة لاقاها في الشارع على اسمي!
سمعت ضحكتها فرفعت راسي وسرحت فيه
تخيلي يا نينة كل دا يحصل في ليلة واحدة تخيلي إني حكتله حكاية! تخيلي إنه لما حزنه غلبه كان عاوز يفتحلي قلبه ويحكيلي همه! يحكيلي أنا.. أنا الغريبة من بين كل الناس كان عاوز بس يشتكيلي واسمعه.
سيبت إيدها ولفيت حوالين نفسي
أنا مبسوطة وفرحانة وطايرة وجوايا كل المشاعر الحلوة اللي ياما حلمت أعيشها أنا عايزة أروحله تاني وأشوفه تاني واسمعه تاني بس ..
وقفت رجليا فسندت ضهري على أقرب حيطة.
بس يا خسارة.. الحلم بيعيش ليلة واحدة بس.
ومين قال إنه حلم
بصيتلها بسرعة تقصدي إيدي
قصدي واضح دا مش حلم إنت قربتي خطوة وخلتيه يسمعك والباقي عليه
ولو تاه عني
يبقى على الأقل
متابعة القراءة
