لست قاتلا قصة محمد عصمت

عنده وخلال أسبوعين كان الطرد وصل ولما حسن سألني.. قلتله إنها كتب محتاجها عشان المذاكرة وهو كان بيكره حاجة اسمها كتب! عشان كدا مكانش مهتم إطلاقا!
استنيت في يوم لحد ما خد الفلوس من ماما كعادته وخرج كنت عارف إنه مش هيرجع قبل النهار ما يشقشق إتطمنت إن ماما نامت قفلت نور الشقة كله قلعت هدومي كلها ورسمت الرموز اللي شفتها على النت على جسمي باستخدام ريشة الغراب ودم القطط رسمت نجمة خماسية جوا دايرة باللي فاضل من الدم على الأرض وحطيت في كل طرف من أطراف النجمة الخمسة شمعة من الشموع اللي معمولة بالدهون البشرية حطيت لوح الويجا على الأرض في نص الدايرة ومسكت القطعة البلاستيك وبدأت أنادي تعالي يا ويجا.. تعالي يا ويجا.. تعالي يا ويجا 
من شروط التحضير إني لازم أفكر في اسم الشخص اللي عايز أحضر روحه عشان كدا فضلت مغمض عينيا وبكرر اسم بابا ثلاثي جوايا عادل شعبان عبد الحميد عادل شعبان عبد الحميد 
عدي حوالي ربع ساعة كنت على وشك أيأس لما فجأة.. حسيت بهوا بارد بيملا الأوضة بارد لدرجة إن جسمي قشعر نور الشمع كان هيتطفى بس الحمد لله.. فضل منور بعد شوية حسيت بالقطعة البلاستيك بتتهز في إيدي وبخوف.. وبصوت بيترعش سألت حد موجود 
حسيت بقوة غريبة بتحرك قطعة البلاستيك على حروف آ ه 
قلبي كان هيقف معقول أنا نجحت! معقول قدرت أحضر روح بابا! بس لأ.. ثواني.. لازم أتأكد سألت بصوت عالي إنت روح عادل شعبان عبد الحميد 
إيدي بدأت تتحرك على الحروف آ ه 
شهقت من الفرحة وأنا بقول بحماس بابا إنت بابا 
ل أ 
لأ! يعني إيه روح عادل شعبان عبد الحميد وفي نفس الوقت مش روح بابا تيجي إزاي دي!
سألت بعدم فهم يعني إيه 
ت ش ا ب ه! 
تشابه تشابه أسماء! معقول! سألته أمال إنت مين 
وبدأت القطعة البلاستيك تتحرك فوق الحروف عشان تكون جمل مفيدة وعشان أختصر عليك وقت وترتيب حروف خليني أقولك الكلام بشكل طبيعي
اسمه كان عادل شعبان عبد الحميد من الصعيد كان عايش في الخمسينات مات في حادثة بشعة تحت قضبان قطر عادل كان تاجر شاطر بالنهار ودا اللي كل الناس كانت عرفاه عنه لكن بالليل.. كان له شخصية تانية محدش يعرف عنها حاجة!
بالليل عادل كان قاتل متسلسل بيحقق العدالة من وجهة نظره بيقتل الغلطانين والمجرمين وفي يوم.. حصلت مطاردة بينه وبين فرد أمن حاول عادل يهرب من أدام القطر على أمل يلحق يعدي في آخر ثانية وفرد الأمن لأ.. وعلى ما القطر يعدي يكون عادل اختفى تماما لكنه ملحقش.. القطر كله زي ما بيقولوا!
وزي ما عادل حكالي حكايته.. حكيت له حكايتي صعبت عليه.. بس يعني هيقدر يساعدني إزاي كل اللي قالهولي إني لازم أبقى رد فعل ورد فعل عنيف كمان وإني مينفعش أسكت وأسيب حقي كل مرة وإلا الموضوع هيفضل يزيد عن حده وحسن هيفضل يتمادى لحد ما في مرة هموت في إيده.
في النهاية.. ورغم إنه كان غلط كبير ورغم إني مقدرتش أحضر روح بابا بس كنت مبسوط باللي حصل عادل نصحني وإتكلم معايا ووراني حاجات أنا كنت محتاج حد يشاورلي عليها عشان أشوفها أنهيت الموضوع كله خبيت الشمع فردت السجادة فوق النجمة الخماسية غسلت الدم عن جسمي ونمت.
بس لما صحيت الصبح.. لقيت مفاجأة مستنياني حسن كان ميت في الصالة متقطع والدم مالي المكان والحيطان والبوليس كان مالي البيت كله قبضوا عليا واتهموني إني قتلت حسن أنا الوحيد المستفيد من موته صحيح إن التحقيقات وقفت وسابوني بس من يومها وأنا جوايا سؤال واحد..
هل أنا قاتل فعلا
أنا مقتلتش حسن! 
أنا كل اللي عملته إني عملت صفقة أو اتفاق مع روح عادل هو هيخلصني من حسن وأنا هدور على آخر نسل فرد الأمن اللي كان السبب في موته وهحقق له انتقامه.
فهل أنا كدا قاتل
وهل القاتل هو اللي قتل بإيده فعلا
ولا القاتل هو اللي سهل ومهد طريق القتل
هكون موجود في معرض الكتاب بداية من يوم ٢٨ يناير في جناح دار ن إن شاء الله جناح دار
ن في قاعة ١.. جناح c 28 وحفل التوقيع هيكون يوم السبت ٢٩ يناير إن شاء الله.. هستناكم وعايز أشوفكم كلكم..
بتاع الرعب
قصص عصمت
صندوق باندورا
قصص من الصندوق