لست قاتلا قصة محمد عصمت

من يوم ما حسن دخل حياتنا وهو بيكرهني أو يعني.. هو مش بيكرهني أنا بس هو بيكره أي حاجة لها علاقة بماما أو ممكن تخلي ماما مبسوطة آه صحيح.. أنا اسمي مروان وحسن دا يبقى جوز ماما إتجوزته بعد وفاة بابا بكام سنة بحجة إنها مش قادرة تربيني لوحدها وإني خلفة الصبيان محتاجة راجل في التربية!
في البداية كان بيكتفي بالمعاملة الوحشة البصات المليانة كره الضرب الخفيف كام شتيمة كدا بس بمرور الوقت.. وبزيادة مشاكله مع ماما بدأ الوضع يتغير للأسوأ.. المعاملة الوحشة بقت كره مش بيحاول يخبيه البصات المليانة كره إتبدلت كلام يوجع ويجرح الضرب الخفيف بقى ضرب بيسيب جروح وكدمات والكام شتيمة دول بقوا أسلوب حياة!
وطبعا مفيش مانع من كام غرزة أو كام كدمة هنا أو هناك وماما يا عيني مسكينة لو حاولت تتدخل هينوبها من الضرب جانب والصراحة يعني.. حتى

لو محاولتش تتدخل.. كدا كدا دورها جاي.
بس حسن مكانش كدا من البداية..
حسن كان زميل بابا في الشغل كانوا صحاب.. بس مش أوي قرب من ماما بعد وفاة بابا بشوية في الأول كان لطيف بشوش ورقيق جدا بيسأل عليها دايما بيقضي لها أي مشاوير بعيدة بيودنا من وقت للتاني بهدايا حلوة فضل مستمر في كدا لحد ما ماما إتعلقت بيه بس هي مكانتش تعرف.. مكانتش تعرف إنه بيعمل كل دا عشان يوصل لها ويحط إيده على الفلوس اللي بابا سابها لنا وبابا كان غني جدا.. على الرغم من إنه كان بيشتغل موظف عادي بس كان وارث أراضي عن جدي الله يرحمه  
وبعد ما حسن وصل لقلب ماما وفلوس بابا إتبدل.. بقى وحش كاسر وعيوبه كلها بدأت تبان أكبر عيب فيهم كان الإدمان! 
لكن لما الناس اللي حوالينا نصحوا ماما إنها تبطل تديه فلوس الوضع أصبح لا يحتمل قلة المخدرات حولته لوحش كاسر وحش فقد أي معنى من معاني الإنسانية والآدمية وطبعا كان مستحيل يهدد ماما بالوحشية اللي كان فيها وإلا كان ممكن تبلغ عنه بس هو كان عارف إنها ضعيفة وجبانة.. عشان كدا إتعلم يلوي دراعها بيا أنا!
بقى بيعذبني! عذاب لا يمكن حد فيكم يتخيل وحشيته وقسوته!
ورغم الألم والوجع اللي كنت فيهم كنت بترجى ماما متديلوش جنيه بس هي كانت ضعيفة.. جبانة.. واستسلمت للضغط بتاعه وادته فلوس ومرة ورا مرة بقى عارف السكة.. لحد ما تديله اللي هو عايزه يسيبنا وينزل تفكني وتقعد تعيط وتعتذر!
بس أنا لا كنت عايز اعتذارها ولا كنت محتاج عياطها!
أنا كنت عايز أبويا!
بس الميتين مبيرجعوش.. صح
علميا وعمليا.. آه صح عندكم حق دي حقيقة لا شك فيها بس كل حقيقة في الكون فيها ثغرة صغيرة مين قال إني عايز أبويا يرجعلي بجسمه بهيئته المادية
أنا قنوع جدا وعايزه يرجع لي ولو حتى كروح أتكلم معاه شوية وأستمد قوة وطاقة منه عشان أقدر أكمل بس.
فطبعا بدأت أدور على طريقة أنفذ بيها خطتي المجنونة دي وبعد شوية قراءات في علوم ما وراء الطبيعة والروحانيات وصلت لطريقتين ممكن أنفذ بيهم خطتي أولا إني أعمل جلسة تحضير أرواح عادية جدا وثانيا إني أحضر الروح بطريقة مبتكرة شوية هتعرفوها كمان شوية قريت في الموضوعين كتير أوي لحد ما استقريت على طريقة منهم بس عشان أنفذها كنت محتاج شوية حاجات أغلبها مكانش موجود في مصر فاضطريت أبعت أشتريه أونلاين من برة وصدقوني.. الموضوع كان سهل جدا كل الموضوع إنك لازم تبقى عارف هتدور فين بس!
طلبت لوح ويجا شموع مصنوعة من الدهون البشرية إزازة من دم القطط السوداء ريشة غراب أسود!
بس.. شوفوا الطلبات كانت سهلة إزاي!
بعد شوية بحث على الديب ويب قدرت أوصل لحد بيبيع الحاجات دي وطلبتها كلها من