جوزي كان متجوز من ورايا ١

​ماتكلمتش عن الفاتورة، قطعتها حتت صغيرة ورمتها في التواليت 
و​بعدها بكام أسبوع، الصدمة الحقيقية نزلت على راسي.. شريف اتجوز عليا. جابلي ضره". وحطني قدام الأمر الواقع وبمنتهى البرود قال لي إن شرع ربنا، وإن شغله وعيلته محتاج ست تقدر تجاريه في سفرياته وخروجاته بعد ما أنا بقيت "مطفيّة" وقاعدة في البيت.
​​وفي اللحظة دي بالذات.. فقت فجأة، فوقان ممزوج ببرود وتعب ملوش آخر.
هو معاه حق أنا مابقتش عايشة لنفسي، أنا بختفي تماماً.
أنا بقيت "حرم شريف بيه الزوجة الأولى"، وأم العيال، والعروسة اللعبة اللي محطوطة في قفص دهب عشان تخلف وبس.
​طب وفريدة؟
البنت الشاطرة اللي كانت بتجيب حق المظلوم بكلمة؟ اللي كانت بتسهر على القضية وتفرح لما تلاقي مستند يدين الخصم؟ راحت فين؟
محدش بقا محتاجها، ولا حتى الراجل اللي لغيت نفسي علشانه ..تقريبا استاهل اللي حصل 
حتى يوم ولادتي لما ​الوجع جالي فجأة

في ليلة كحل قبل الفجر، وقبل ميعادي بشهر بحاله.
شريف كان بايت عندها بيصالحها لانها زعلانه من  الايام المعدوده الي بيقعدها عندي
 الموبايل جمع اخيرا..... بس اللي رد مكانش شريف كانت هي.. مراته التانية.
صوتها كله نوم ودلع وهي بتقولي:
"ألو.. مين معايا؟"
قفلت التليفون فورا مقدرتش انطق فضلت اولد وحدي زي ما بعمل كل حاجه وحدي
ولادتي تمت على خير وجبت تلات توائم زي القمر 
كانت اجمل لحظه في حياتي ...كنت هتصل عليه واقوله ..بس افتكرت اكيد والدته قالتله ...ولسه مجاش
عدى اسبوع بحاله كان كل اللي بيعمله انه بيتصل عليا يسال على اولاده ولما افتكر يرجع وجيه على المستشفى يزورني ..او جيه لاولاده 
اول ما وصل ​المساعد بتاعه قرب منه وقال بصوت واطي ومتردد:"يا شريف بيه.. المدام مشيت من خمس أيام."
​خطواته وقفت فجأة في ممر المستشفى.
​هو لسه  امبارح كان بيكلمني وقولتله "كله تمام يا حبيبي، مفيش داعي تقلق انا لسه في المستشفى علشان الجرح تاعبني شويه."
​طب لو أنا مشيت من خمس أيام.. رحت فين
والأوضة الفاضية اللي قدامه دي.. إيه اللي حصل فيها بالظبط
ودي كانت البدايه بس اللي كان مستنيه اسوء بكتير؟؟
شريف وقف مكانه كأنه مضروب بالقلم، عينه وسعت وبص للمساعد بتاعه "كريم" بذهول وهو مش مستوعب الكلام:
— "مشيت؟ مشيت راحت فين يا كريم؟ وأنا لسه مكلمها إمبارح بالليل وقالت لي إنها تعبانة ومش قادرة تتحرك من السرير؟"
​كريم بلع ريقه وبص في الأرض بخوف:
— "يا شريف بيه، المدام خرجت من خمس أيام بالظبط.. خدت الأطفال التلاتة وخرجت في هدوء تام، ومضت على مسؤوليتها الشخصية إنها تخرج. أنا جيت أسأل في الحسابات لقيت كل حاجة مدفوعة بالكامل من فيزتها الشخصية."
​شريف ساب المساعد وجري على الأوضة، فتح الباب باندفاع.. الأوضة كانت مترتبة، السرير نضيف، مفيش أي أثر لشنطة هدوم، مفيش علبة لبن صناعي، مفيش ريحة فريدة اللي كان متعود عليها. السرير الصغير اللي كان المفروض يشيل التلات توائم كان فاضي ومغطي بملاية بيضا باردة.
​طلع موبايله وإيده بترحف، طلب رقمها.. "عفواً، الهاتف الذي طلبته مغلق أو غير متاح الآن". طلب رقم حماته، نفس النتيجة.. مغلق. طلب رقم فيلتهم في التجمع الخامس، الخط بيجمع بس محدش بيرد.
​ركب عربيته وساق بأقصى سرعة، وعقله شغال زي المكنة: فريدة هتروح فين؟ هي ملهاش حد هنا غير والدتها وأختها، وأكيد مش هتقدر تشيل تلات أطفال لسه مولودين وتتبهدل بيهم.. أكيد راحت الفيلا وزعلانة، شوية دلع وستات وهصالحها بأي غويشة دهب ولا طقم ألماظ زي كل مرة.
​فيلا التجمع.. القفص الدهبي الفاضي
​وصل شريف الفيلا، دخل بعصبيته وزعيقه المعتاد:
— "فريدة! أنتِ فين؟ يا دادا أمينة! يا فتحي!"
​البيت كان هس هس، هدوء قاتل مفيش فيه غير صوت تكتكة ساعة الحائط الكبيرة. نزلت الدادا أمينة من الدور الثاني وهي بتبكي ومرعوبة