كنت لسه مفقتش من بنج الولاده

كنت لسه ما فوقتش كويس من بنج الولاده ، ولقيت حماتي سحبت الموبايل من جنبي وادته لبنتها بصمت صباعي ودخلت على طول على ابلكيشن البنك وحولت كل الفلوس بتاعتي لحسابها، ولما واجهتها قالت ده حق ما هنخدمك وكل ده قدام جوزي ، يومها استخدمت الكارت الوحيد اللي عمري ما اتمنيت استخدمه !!!!
كنت مرمية على سرير المستشفى، الخراطيم والمحاليل لسه في جسمي، وسألتها بتعب أنتِ خدتي فلوسي ليه يا طنط؟
حماتي كانت قاعدة، حاطة رجل على رجل، وبتقزقز لب براحتها من غير حتى ما تبص لي.
فلوسك ؟
ليه أنتِ مفكرة مصاريف الأكل و الشرب وشهر النفاس اللي هتقعديه متهنيه ده هندفعه منين؟ اعتبري القرشين دول تمن مصاريفك وقعدتك.
لفيت راسي ناحية الباب.
محمود جوزي كان واقف هناك.
من ساعة ما دخلنا وهو باصص في الموبايل ومش مطلع عينه منه.
محمود! دي الفلوس اللي سبهالي ابويا الله يرحمه ، ده شقا ابويا وحقي أنا!
لما ندهت عليه، اتكرم ونطق أخيراً. بس الكلام اللي قاله خلّى دمي يغلي في عروقي
يا حبيبتي ما هي أمي برضه هتتعب معانا في شيل الواد وتربيته.
اعتبريهم يا ستي تمن حلاوتها وتعبها معاكي.
وبعدين وطّى صوتك 
خلاص بقى بلاش نكد، أنتِ لسه والدة قيصري والزعل وحش عليكي وهيقطع اللبن.
ساعتها حماتي رفعت راسها، وضحكت باستهزاء، وراحت رامية في وشي وصل من السوبر ماركت
شوفي يا ختي.
ده تمن الفراخ، والبلح والحلبه ولوازم العيل اللي جيبتهملك الأسبوع اللي فات. حسابهم تلت تلاف جنيه.
فضت إيديها من قشر اللب وقالت
الفلوس دي هتفضل معايا أنا وتحت إيدي.
ولما ابن ابني يعوز حاجة، ابقي تعالي اطلبي مني. ولا ناسيه ان اهلك ميتين وان احنا اللي هنخدمك ونصرف عليكي 
مسكت الموبايل اللي جنب السرير.
وقدام حماتي ومحمود، طلبت النجدة علطول.
ألو.. النجدة؟ عايزة أبلغ عن سرقة.
في حد سرق فلوس حسابي البنكي بالعافية.
حماتي اتخضت واللب وقع من إيدها غصب عنها على الأرض.
جت عليا زي المجنونة،
أنتِ اتجننتي يا دينا؟! طلبالنا البوليس؟!عايزة تفضحينا مااهتمتش بكلامها، وكنت

بطلع الكلام من بين سناني بالعافية ومن وسط وجعيأنا اسمي دينا رأفت..
موجودة في مستشفى الجلاء للولادة، أوضة 302.
في ناس استغلوا تعبي وحولوا فلوسي من موبايلي من غير إذن وموافقة مني.
وش حماتي بقى دم من كتر الغيظ، ولفت صرخت ناحية الباب
يا محمود! الحق مرتك طالبة البوليس يقبض على أمك!
وأنت واقف زي لوح التلج بتبص في الزفت ده؟!
ساعتها محمود ساب الموبايل أخيراً، وجري عليا.
خد الأوضة في خطوتين، وراح شادد الموبايل من على ودني وقفل السكة.
أنت بتعمل إيه؟! بصيت له والدموع في عيني.
دينا، اهدي وصلي على النبي كده. صوته كان هادي زي اللي بيثبت عيل صغير. كده الناس هتتفرج علينا وشكلنا هيبقى وحش قوي.
مشاكلنا في بيتنا؟!
ضحكت من غلبي....بقى اللي يستغل إني لسه خارجة من بنج العمليات ويقلبني في فلوسي يبقى ده اسم بيتنا برضه؟!
حماتي وقفت وحطت إيدها في وسطها
نقلبك في إيه يا عين أمك؟ أنا حماتك!
يعني فلوس مرات ابني، لما أمد إيدي عليها فيها إيه؟
وصوتها عِلي أكتر
وبعدين فلوسك هتتصرف على ابنك في الاول وفي الاخر
خدت نفس عميق، وكنت بتمالك نفسي من الوجع اللي بيقطع في بطني، وسندت ضهري وقعدت.
محمود.. هسألك لآخر مرة. أنت معايا أنا ولا مع أمك؟
فرك إيديه في بعض وبص في الأرض عشان يهرب من عيني
دينا.. موضوع الفلوس ده نتكلم فيه لما نروح، صحتك دلوقتي بالدنيا.
أنا بسألك أنت مع مين فينا؟
الأوضة ضلمت بسكوت تقيل دام تلات ثواني.
في الآخر، محمود تنهد وراح واقف جنب أمه، وبيتكلم بطريقته المعهودة اللي بيمسك فيها العصاية من النص
يا أمي.. خلاص رجعيلها الفلوس دلوقتي، وأنا هبقى أديكي اللي أنتِ عايزاه بعدين.
حماتي راحت مزعقه
نعم يا خويا؟! أرجع إيه؟ الفلوس دخلت جيبي خلاص وعايزني أطلعها؟جرى إيه يا محمود؟ أنت ابن بطني ولا ابنها هي؟
يا أمي وطي صوتك بس عشان المستشفى..
مش هوطي صوتي والي يحصل يحصل!
صوت الجعير بتاعها سمع الممر كله، أنا اللي هقعد أخدمها في نفاسها، والقرشين دول حقي تمن تعبي.
وإن كانت مش عاجبها، الباب يفوت جمل وتوريني هتروح لمين .. بس تسيب العيل هنا، أنا اللي هربيه!
في نفس اللحظة، شاشة موبايلي نورت.. النجدة كانت بترد على المكالمة لسه بمد إيدي، محمود كان أسرع مني، خده وحطه في جيبه علطول.
دينا، ارتاحي أنتِ.
أنا هرد عليهم وأقولهم إن العيل كان بيلعب ومكالمة غلط.
محمود هات الموبايل.
فضل واقف مكانه، ما اتهزش.
وحماتي قعدت على الكرسي وهي شمتانة على الآخر وكأنها بتتفرج على تمثيلية
شُفتي بقى؟ ابني برضه راجل وبيفهم في الأصول.
يا دينا يا حبيبتي، أنتِ أهلك دلعوكِ زيادة عن اللزوم وما عرفوش يربوكِ، وما تعرفيش إن الست لما تتجوز تسمع كلام حماتها وتنفذه ..وان قرشها هو قرش جوزها
ما نطقتش بولا كلمه فضلت باصة على جيب بنطلون محمود اللي فيه الموبايل، الدنيا بره كانت ليل وضلمة كحل بنتي لسه واصلة الدنيا.. ولحد دلوقتي، ما لحقتش أضمها لحضني ولا مرة.
آه صحيح.
حماتي قامت وقفت فجأة كأنها افتكرت حاجة
يلا يا محمود تعالى وصلني انا واختك علشان خطيبها جاي على الغدا بكره ويادوب نجهز 
محمود بصلي بتوتر وقال....مينفعش تروحوا لوحدكم ...يعني دينا لسه تعبانه و..
بس امه قاطعته وقالت بقرف...مش هتتاخر على السنيوره متقلقش يادوب توصلنا
محمود اتنهد وقالي بهمس..... مش هتاخر 
الباب اتقفل وراهم برزع قوي.
وفضلت في الأوضة لوحدي.
البنج راح تماماً.. ووجع القيصرية بقى عامل زي المنشار اللي شغال في بطني.
موبايلي محمود خده، وفلوسي حماتي لهفتها.
وحتى بنتي نايمة في أنهي حضّانة.. ما أعرفش.
الممرضة دخلت تبص عليا وتراجع المحاليل، لقتني باصة في السقف وبعيط، اتخضت
مدام دينا مالك؟الوجع شديد عليكي؟ تحبي أكتبلك على حقنة مسكن تانية؟
هزيت راسي بالنفي، وصوتي كان رايح وضايع
ممكن بس تديني موبايلك أعمل منه مكالمة واحدة ضروري؟
الممرضه اترددت ثانية، وبعدين طلعت موبايلها وادتهوني.
عملت مكالمه عمري ما تخيلت اني اضطر اعملها ..كنت متاكده انها هتهد بيتي بس غضبي كان اقوى من اي حاجه .......
زهرة_الربيع
المكالمة رنت مرتين...
وثلاثة...
وبعدين جه الصوت اللي ما كنتش سمعاه بقاله سنين.
ألو؟
غمضت عيني بقوة، والدموع نزلت من غير ما أحس.
عمو سامح...
سكت ثانيتين.
دينا؟!
صوته اتغير فجأة.
إنتِ فين؟ وإيه اللي حصل؟
عمو سامح كان شريك أبويا الله يرحمه وأقرب حد ليه في الدنيا.
بعد وفاة أبويا، هو حاول يفضل متابع أخباري، لكن محمود وأمه كانوا دايمًا يقولولي
إحنا بقينا أهلك خلاص.
الناس دي ملهاش لازمة.
ومع الوقت، المسافات كبرت.
لكن الرقم عمره ما اتمسح من دماغي.
طلعت الكلام بالعافية وحكيتله كل حاجة.
من أول ما فوقت من البنج...
لحد الفلوس اللي اتحولت...
ولحد ما محمود أخد موبايلي ومنعني أكلم الشرطة.
على الناحية التانية ما كانش بيتكلم.
بس كنت سامعة نفسه التقيل.
وفجأة قال جملة خلت قلبي يدق بسرعة
إوعي تتحركي من مكانك.
أنا جاي.
وقفل السكة.
بصيت للممرضة.
شكراً.
ابتسمت بحزن وخدت موبايلها.
وبعد أقل من نص ساعة...
باب الأوضة اتفتح.
دخل راجل في أواخر الخمسينات.
شعره كله أبيض تقريباً.
لكن عينيه كانوا مليانين غضب.
أول ما شافني بالشكل ده، وقف مكانه.
وبعدين قرب بهدوء.
يا بنت أخويا...
وما قدرش يكمل.
أنا كمان انفجرت في العياط.
عمو سامح قعد جنبي وربت على إيدي.
وبعدين سأل سؤال واحد
التحويل اتعمل إمتى؟
حكيتله.
قال
تمام.
طلع موبايله واتصل بحد.
أستاذ شريف؟
أنا سامح رأفت.
عايزك تجيلي مستشفى الجلاء حالاً.
وفي طريقك هات معاك كشف حساب التحويلات الخاصة بحساب دينا.
اتسعت عيني.
كشف حساب؟!
بصلي وقال بهدوء
أبوكِ قبل ما يموت عمل حاجة محدش يعرفها غيري.
وكان قايل لو حصلك أي مشكلة أبقى أقولك.
قلبي وقع.
حاجة إيه؟
قبل ما يرد...
الباب اتفتح مرة تانية.
لكن المرة دي...
اللي دخلت كانت حماتي.
وراها محمود.
وأخت محمود.
واضح إنهم رجعوا بسرعة بعد ما اكتشفوا إن عمو سامح موجود.
حماتي أول ما شافته عقدت حواجبها.
وده مين كمان؟
عمو سامح قام وقف.
وبص لها نظرة خلتها تسكت لحظة.
وقال
أنا الشخص اللي هيحاسب كل واحد مد إيده على فلوس دينا.
الجو اتكهرب فوراً.
ومحمود بلع ريقه وقال بتوتر
يا جماعة الموضوع بسيط ومش مستاهل...
لكن كلامه وقف فجأة...
لأن موبايل عمو سامح رن.
رد بسرعة.
واستمع ثواني.
ثم ابتسم لأول مرة.
وقال
ممتاز.
ابعتلي الصورة حالاً.
قفل