ابو بناتي انجي الخطيب

جوزي طلقني عند المأذون وعندي منه بنتين روحت بعد الطلاق اعد يومين في بيت ابويا لاني نفسيتي انا والبنات كانت تعبانة رجعت بيتي بعد يومين لاني حاضنة والشقة من حقي فتحت باب الشقة لاقيت جوزي اعد في الصالة افتكرت انه جاي ياخد حاجتة وهيسيب الشقة لاننا خلاص اطلقنا رسمي لاقيتة بيقولي انا هعد معاكي في الشقة انا معنديش مكان اروحة قولتلة بس دا حرام شرعا ما انت عندك بيت اهلكروح هناك ومفيش حد فيه غير مامتك قالي مبارتحش هناك سبيلي الاوضة بتاعتنا واعدي انتي في اوضة البنات قولتلة انا مش موافقة علي الكلام دا والشرع بيحرم اننا نعد مع بعض والقانون مديني حق اني اعد في الشقة عشان انا حاضنة قالي لسة في ٣ شهور عدة من حقي اعدهم معاكي يمكن ارجعلك قولتلة انا لا يمكن ارجعلك انا استحملت مد ايدك عليا واهانتك ليا كتير ورغم دا انت اللي سعيت للطلاق لما قولتلي اتنازلي ليا عن النفقة والمؤخر وانا اطلقك وافقت من كتر ضغطك عليا كل يوم بالضرب والإهانة قدام بناتي واتنازلت
اه ما انا عارف وكنت مفكر انك هتمشي بقي وتعدي عند ابوكي لكن استغربت لما رجعتي
نعم هو انت فاكر اني هتنازلك عن الشقة كمان لا دا مش من حقي دا حق بناتك

لما يبقوا يتموا ١٥ سنة ابقي ارفع قضية بقي وخد الشقة واطرد بناتك برا طيب ما ترجعي انتي تعدي بيهم عند ابوكي هتعدي هنا لوحدك بيهم وانتي مطلقة الناس هتكلم عليكي ومحدش هيسيبك في حالك
انت امرك عجيب اوي يعني لو سبتلك الشقة الناس مش هتتكلم عليا صح وبعدين انت عارف ان بيت بابا اخويا متجوز واعد معاهم في الشقة ومحدش هيستحمل حد ولا هيستحملوا بناتك واسيب بيتي وبيت بناتي لية مش كفاية كلت حقي وخالفت شرع ربنا ونسيت خدمتي ليك طول سنين جوازنا دا ربنا قال وعاشرهن بالمعروف او تسريح بإحسان وانت عايز ترميني انا وبناتك برا
بصي مش عاجبك اعملي تمكين للشقة ولما تتمكني ابقي تعالي اعدي
يا محمد انت عارف اني مش بشتغل ولا معايا فلوس اقوم محامي انت عارف ان دا حق البنات والقانون بيقول كدا اه متنسيش يا نهي تبقي ترفعي معاكي قضية نفقة بالمرة لبنانك عشان مش ناوي اصرف اصلي هتجوز
نعم انت بتقول ايه تتجوز انت لخثت تطلقني عشان تتجوز انت جنسك ايه يا اخي انا عملت ليك ايه دا انا كنت شيلاك فوق راسي طلباتك كلها مجابة كنت بتديني مبلغ قليل كل شهر ومكنتش بتكلم وكنت ممشية البيت وراضية كنت اشتري ورك فرخة كل فترة عشان اعملة لبناتك عشان ياكلوا لانهم جسمهم لسة يتبني واقول ناكل انا وانت الخضار من غير لحوم احنا كبرنا وياما كلنا في بيت اهالينا ونقدر نستحمل لكن هما لا لسك صغيرين وبيبصوا للي في سنهم كنت تاخده انت وتاكلة وتقولي اصلي شقيان وخلي البنات تاكل خضار اهو هيغذيهم برضوا
انت لايمكن تكون اب ولا عندك ضمير ولسة مخلصتش كلامي وقام عليا ضرب قدام بناتي كالعادة زي ما كان متعود يضربني واسكت وياريت جت علي اد كدا وبس وهو بيضربني والبنات عمالة تعيط لاقيت اللي بتفتح باب الشقة بالمفتاح وداخلة وكانت الصدمة

وانا بحمي وشي بإيدي و بترجاه يرحمني عشان خاطر بناته، وفجأة صوت مفتاح بيتحط في الباب وبيلف بكل ثقة.. الباب اتفتح ودخلت ست كبيرة ومعاها بنت شابة لابسة على سنجة عشر وماسكة شنطة في إيدها، وقف محمد ونهج نفسه عالي والشرار لسة في عينه، ونهى مكنتش قادرة ترفع راسها من كثرة الوجع والصدمة.. الست الكبيرة دخلت وبصت في الصالة بقرف وقالت بصوت عالي لا يا محمد، الشقة محتاجة شغل كتير قوي، العفش ده قديم ومكركب والحيطان دي لازم تتقشر وتدهن من أول وجديد عشان تليق بالعروسة، البنت الشابة لفت ببرود تام وكأن نهى والبنات مش موجودين أصلًا، وقالت بدلع وهي بتمسح بإيدها على حرف الكنبة والله يا طنط الشقة مساحتها حلوة، بس مش قادرة أتخيل إني هعيش وسط الكركبة دي، لازم كل حاجة هنا تتشال وتترمي في الشارع، أنا عايزة عفش مودرن يفتح النفس، نهى قامت من على الأرض بصعوبة وهي بتسند على الحيطة وعينيها مش مصدقة اللي بيحصل، بصت لمحمد اللي كان واقف مكسور العين بس بجاحته غلبته، وصرخت فيه مين دول يا محمد؟ وازاي معاهم مفتاح شقتي؟، البنت الشابة ضحكت بسخرية وطلعت المفتاح من شنطتها وقالت شقتك إيه يا شاطرة؟ دي شقتي أنا ومحمد، إحنا جينا نتفرج عشان نحدد هنعمل إيه في التوضيبات، ومفتاحي معايا عشان ده بيتي المستقبلي، الست الكبيرة كملت كلامها وهي بتزق كرسى السفرة برجلها خلصنا يا محمد، مش قولت إنها هتغور النهاردة عند أبوها؟ البت عروسة وعايزة تفرش، والنجف ده كمان لازم يتغير ذوقه بلدي قوي، نهى حست بقلبها بيتعصر من القهر، بصت لبناتها اللي كانوا مستخبيين ورا ظهرها ومرعوبين، وقالت بصوت مخنوق بالدموع بتحتفلوا بخراب بيتي وأنا لسة فيه؟ بتفرجيها على مكاني وتخططي لدهان الحيطان بدمي ودموعي؟ وأنت يا محمد.. للدرجة دي بعت عشرة سنين عشان تجيب واحدة تتفرج على عفشي