المحطة المهجورة كتابة جمال الحفني

زي دي وبحب الهدوء وعندي استعداد اقعد سنة في مكان زي دا من غير ملل ولا زهق.
جمب المبيت كان فيه كام كرسي مكسرين اخترت احسن واحد فيهم وقعدت عليه مدخل المحطة في ضهري وباقي المحطة كلها قصادي وفي وسط سرحاني شوفت واحدة ست لابسه اسود من بعيد مش عارف ظهرت منين وفضلت ماشيه بحركة بطيية لحد ما دخلت مبنى صغير كدا دور ارضي ومخرجتش منه تاني فضلت مركز مع المدخل فترة لكن محدش طلع او دخل تاني فجاة افتكرت ان عمرو قالنا ان محدش في المكان غيرنا فقولت في نفسي اكيد الست دي حرامية ودخلت تسرق حاجه وقررت اروح اشوفها بتسرق ايه ..
4
دخلت ورا الست دي وانا مش عارف اعمل ايه او اواجهها ازاي والحمد لله بعد ما دخلت واتمشيت شويه ودورت عليها ملقيتهاش وقولت احتمال تكون خرجت من شباك او مخرج تاني او ممكن انا اقنعت نفسي بكدا عشان مدورش تاني في المبنى دا خصوصا اني اول ما دخلت قلبي اتقبض وكرهت المكان من غير سبب التراب في كل حته والطوب مرمي هنا وهناك دا غير الضلمة اللي مستحملتهاش.
فجاة وانا بلف عشان اخرج شوفت قط اسود واقف عند الباب وبيبصلي اتخضيت بصراحة اول ما شوفته واتخضيت اكتر من نظرته ليا كانت نظرة انسان لانسان مش مجرد حيوان لانسان شوحت بايدي عشان يجري او يخرج لكنه معبرنيش ضربت رجلي على الارض مرتين تلاته عشان يخاف مني زي منا خايف منه لكن من غير فايده عينه مثبتها في عيني وحسيته بيبتسلمي وفجاة حاجه وقعتني على الارض في اقل من ثانية والباب اتقفل جامد وحد مسك رجليا وفضل يجرجرني في المكان كله مسح بيا الارض حرفيا وانا عاوز اصرخ او استنجد بحد يلحقني من غير فايدة صوتي مكانش بيطلع كان حد قافل بوقي غصب عني.
استمريت على الحال دا دقايق كانوا اصعب دقايق عدوا عليا في حياتي وبعدها اغمى عليا العجيب بقى اني لما صحيت لقيت نفسي قاعد على الكرسي اللي كنت قاعد عليه قبل ما اشوف الست دي.
فضلت ثواني مذهول مش فاهم ايه اللي حصل او ايه اللي بيحصل معقول اكون نمت من غير ما احس وكل دا مجرد كابوس او يكون حصل فعلا وحد شالني وجابني هنا مش عارف.
استسلمت للخيار الاول واقنعت نفسي بيه لكن عرفت اللي فيها لما مواقف مشابهة حصلت معانا كلنا وكل واحد حكى اللي حصل معاه ولا ايه يا عم سيد
رد عليه اكبرهم في السن واللي عرفت انه عم سيد من قبل ما يتكلم وقال ايوه والله انا اشتغلت في اماكن كتيره وشوفت حاجات اكتر بس زي اللي بيحصل هنا مشوفتش وانا نايم في اليوم دا حلمت بشخص اسود طويل واقف عند اخر سور المحطة وعمال يشاورلي بايده اشاره معناها تعالا بصيت حواليا ممكن يكون قاصد حد تاني بس مكانش في حواليا حد افتكرته المهندس جي مثلا واحنا نايمين ولما شافني نزلت شاورلي عشان يوريني شي في المكان او يقولي على شغل نعمله خاصة اني معرفش المهندس شخصيا لانه معرفة احمد اتمشيت ناحيته ولما قربت منه اتضحلي انه بيشاورلي عشان ابعد او امشي من هنا المرعب انه ملوش اي ملامح كانه ضل مرسوم على حيطه وايده بس اللي بتتحرك ولما لقاني واقف مش بتحرك لاني مش فاهم اللي بيحصل فجاة لقيته بيجري ناحيتي
بكل سرعته واول ما قرب مني اختفى وصحيت اما بقى اللي حصل مع احمد في اليوم التاني اللي هو امبارح فدا اعجب من اللي حصل معانا كلنا ...
5
محدش فينا حكى عن الرعب اللي حصل معاه في المكان دا لحد ما واجهتهم انا بعد الموقف اللي حصل معايا والحمد لله انه عدى على خير.
صحيت اليوم دا بعد الضهر وكان الكل صاحي وباين الهم والغم على ملامحهم كان كل واحد فيهم مخبي سر جواه وانا عشان مبحبش اسال عن اللي مليش فيه مسالتهمش اتغدينا ونزلنا الشغل اللي اتوزع علينا وكان عبارة عن تكسير كل الابنية اللي موجودة عشان نعيد بناءها من تاني لما عددنا يزيد وييجي باقي العمال والصنايعية ولاني انا وعم سيد كنا قريبين من بعض اخترنا مبنى ورحنا نكسر فيه عم سيد حكالي عن الحلم بتاعه اثناء الشغل زي ما يكون بيفضفض عشان يرتاح او يلاقي تفسير للحلم دا مع انه عارف اني مليش في التفسير لكن انا ريحته وقولتله طالما مكانش قبل الفجر يبقى كابوس عادي وممكن من تغيير مكان نومك زي ما بنسمع يعني.
بعد ما اشتغلنا شويه حلوين لقيته ساب الشغل وقال هروح اجيب مياه حلفت اني اروح انا من باب الذوق طبعا ورحت المبيت لكن قبل ما اوصل هناك لقيت كاين غريب عمري ما شفت شبيه له حتى في الحيوانات طويل حوالي مترين واكتر لونه رمادي ورجليه طويله اطول من نصه الفوقاني وضهره منحني لقدام وايده واصله لحد تحت ركبه وكان من غير هدوم وقفت مكاني من الصدمة زي ما تكون جليا اتثبتوا في الارض ضربات قلبي زادت وريقي نشف وانا مش عارف اتصرف ازاي وفضلت متابعه بعيني لحد ما خرج من البوابة لفيت عشان اجري ناحية عم سيد احكيله لقيته واقف ورايا على طول اتخضيت اكتر وضربات قلبي زادت وقولتله بصوت متقطع شوفت.. شوفت اللي خرج دلوقتي قالي تعالا عاوزك.
دخلت انا وهو اوضه صغيرة بابها مكسر وفيها فتحة شباك من غير شباك وانا مفيش على لساني غير شوفت.. شوفت اللي انا شوفته وهو يقولي بس تعالا لحد ما دخلنا الاوضة دي عم سيد قدامي وانا وراه وبمجرد ما دخلت الباب اتقفل لوحده ولما بصيت عليه ورجعت ابص لعم سيد وشوفته بيتحول قدامه من عم سيد للهيية بتاعة الكاين الغريب اللي شوفته عليها من دقايق لهيية بشري من تاني حسيت ساعتها اني في فيلم رعب او حلم اتمنيت اصحى منه اكيد حلم ماهي الحاجات دي مبتحصلش غير في الاحلام.
اتشكل بهيية بشري بشعر طويل ناعم ودقن جميلة متوسطة الطول وعلى قد ما اترعبت لكن لما لف ناحيتي وشوفت ملامحه الهادية بدا الرعب يقل او بدات اطمن مع ان الموقف مفيهوش ذرة اطمينان لكن دا اللي حسيته.
ابتسملي ابتسامة جميلة وقالي بصوت هادي بص يا معلم احمد احنا اختارناك دونا عنهم كلهم لانك اكتر واحد متعلم وملتزم فيهم وهتفهم اللي هقولهولك هما اختاروني عشان انا اكتر واحد هادي فيهم وعندي قدرة للاقناع بدون اذى او ضرر.
احنا عايشين هنا من قبل ما انتوا تيجوا مش انتوا العمال لا من قبل المكان ما يتبني من الاساس ويبقى محطة مياه بداوا يبنوا المحطة وجن كتير مننا كانوا رافضين وقرروا يطفشوا العمال من قبل ما يبدووا لكن فيه جزء مننا وافق باعتبار دا حقكوا تعمروا الارض واحنا نسكن الصحاري والكهوف كعادتنا اتقسمنا فريقين فريق
راضي وفريق رافض وفضلنا على الحال
دا لحد ما المحطة اتبنت واشتغلت ساعتها الزحمة زادت زيادة عن اللزوم لدرجة ان مجموعة من اللي كانوا موافقين على عمار المكان انضموا للي كانوا رافضين ومن ساعتها بدووا يعملوا مقالب ومواقف مرعبة مع الغفير والعمال اللي بيشتغلوا فترة ليلية ولما العمال اتكلموا والكلام زاد راحت الشركة بدلتهم واللي كان شغال بالنهار اشتغل بالليل والعكس احنا كمان استمرينا في المقالب بدون ما ناذي حد الكلام زاد اكتر من اللازم والعمال بقت تخاف تيجي الشغل وتعمل غيابات لحد ما الشركة سابت الموقع وفضل مهجور لحد ما جات شركة تاني وقررت اعادة تشغيله من جديد وقتها عرفنا واتضايقنا وفررنا نعيد اللي عملناه معاكوا لكن فيه كام جني من اكابرنا في السن واكترنا عقل وحكمة قالولنا نعمل معاكوا صفقة انتوا تشتغلوا وتاخدوا راحتكوا فترة النهار كلها لحد المغرب واحنا ناخد فترة الليل ومحدش فيكوا ينزل من المبيت طول فترة الليل غير للحمام او للضرورة القصوى والا هيتاذي ويشوف اللي عمره ما شافه احنا الاول كنا مراعيين انكوا مش عارفين حاجه مع ان كل واحد من اللي معاك حصل معاه موقف عشان يعرف لكنه رفض يقول لباقيين كمان قبل ما امشي عاوز اعرفك حاجه.. سكت شويه وقال فيه جزء قليل جدا مننا رافضين وجودكوا في المكان ومش مقتنعين بالراي دا وجايز يعملوا مواقف معاكوا لكن متقلقوش هنحاول نقنعهم ونعيش كلنا في المكان وعشان اثبتلك حسن نيتي هسيبك في سلام وهخرج من الشباك زي اي بني ادم بيخرج.
خرج من الشباك وفي نفس اللحظة الباب اتفتح بنفس الهدوء اللي اتقفل بيه وانا ما شدة الخوف جريت عشان اخرج وطلعت اصرخ وكلهم اتجمعوا حواليا وحكيتلهم اللي حصل وعرفنا من بعضنا كل المواقف اللي حصلت مع كل واحد فينا وكلمنا المهندس وهييجي ياخدنا الصبح عشان محدش فينا وافق يشتغل في المكان دا.
الحكاية الجايه هتكون حقيقية وفيها رعب اكتر بس ياريت شوية تشجيع ولو عاوز توصلك كل حكايات بدون بحث ياريت تشرفتي بعمل متابعة للبروفايل بتاعي.
جمال الحفني