صحيت من النوم مش فاكره اي حاجه ولا فاكره انا مين ولا اسمي ايه

صحيت من النوم مش فاكره اي حاجه ولا فاكره انا مين ولا اسمي ايه ولا حتي عارفه مين الشخص الي واقف قدامي ده
احساس غريب جدا كاني اتولدت من جديد مش عارفه اي حاجه.. انا مين .. انا فين . مش فاكره. اي حاجه
بدا يهديني وجاب لي كوبايه ميه شربتها وقال لي انا كرم جوزك احنا متجوزين من سنتين ومن فتره عملنا حادثه بالعربيه وانا اتخبطت في دماغي ومن وقتها وانا فقدت الذاكره ونسيت كل حاجه
بصراحه احساس غريب جدا واحد معرفوش بيقول انه جوزي .. ياتري انا اتجوزته ازاي بحبه ولا مش بحبه
كل حاجه اتمسحت من دماغي بس هو قال لي انه هيحكي لي كل حاجه بالتفصيل من يوم معرفنا بعض
وبدا يحكي اننا كنا زمايل في نفس الكليه وانه حبني من اول مشافني واتعرفنا وحبيته انا كمان واتخطبنا وبعد متخرجنا اتجوزنا .. كان بيحكي لي مواقف جميله اوي

عرفت منها ان انا وهو بنحب بعض جدا 
وفضلت شهر علي الحال ده كرم يجيب معاه اكل وهو جاي من الشغل ناكل مع بعض وبعدها يفضل يحكي لي مواقف حصلت لنا مع بعض و كنت مبسوطه وسعيده بالحكايات دي
وعدت شهور واحنا عايشين في سعاده 
وفي يوم نزلنا السوبر ماركت نجيب طلبات للبيت وهناك لقيت واحده بتنادي عليا يارا... يارا.. انا مبسوطه اوي اني شوفتك مش معقول انتي وحشتيني جدا 
لقيت كرم جه وشدني من ايدي وبسرعه اخدني وخرجنا من السوبر ماركت وسيبنا الحاجات الي كنا هنشتريها .. وركبنا العربيه وهو متعصب وفضل ساكت طول الطريق
وبعد شويه سالته مين الست دي يا كرم 
وليه اخدتني ومشينا بالطريقه دي
قال لي دي كانت صاحبتك بس قالت عنك كلام مش كويس وانتي زعلتي منها وخلاص مبقتش صاحبتك وخوفت لو افتكرتيها تتضايقي علشان كده خدتك ومشينا
وبعد الموقف ده لاحظت ان كرم بدا ينشغل ويبقي عنده شغل كتير حتي يوم الاجازه وبطلنا نخرج من البيت خالص لدرجه اني زهقت 
وفي يوم كان كرم في الشغل وانا قولت انزل اتمشي شويه واجيب حاجات للبيت واول مفتحت الباب لقيت جارتي في الشقه الي جنبي ست كبيره بتفتح الباب واول مشافتني قالت انتي مين يا حبيبتي هو كرم اتجوز قولت لها ايوه انا مراته .. .. قالت لي اسمك ايه يا حبيبتي .. قولت لها اسمي يارا قالت لي سلمي لي علي كرم وقولي له اني زعلانه منه انه معزمنيش في الفرح.. نزلت وسبتها وانا بفكر في كلامها.. فرح ايه الي كرم معزمهاش عليه 
ده احنا فرحنا كان من سنتين زي ما كرم قال لي .. هي الست دي بقالها سنتين مسافره 
ولما كرم رجع من شغله حكيت له علي جارتنا لقيت وشه اتقلب وقال لي دي ست كبرت وخرفت وعندها زهايمر وبتنسي كل حاجه.. وبعدين لقيته زعق وقال لي اوعي تنزلي لوحدك تاني.. قولت له هو انت حابسني في البيت ولا ايه قال لي انا خايف عليكي يا حبيبتي انتي فاقده الذاكره وتعبانه 
وفي يوم فكرت ابحث عني زمان قبل مفقد الذاكره وجت لي فكره اني اعمل فيس بوك وابحث من خلاله يمكن اعرف او افتكر حاجه عن نفسي او حياتي قبل الحادثه
وطلبت من كرم يعمل لي فيسبوك بس كان بيتهرب مني .. وبدات اشك في تصرفاته هو ليه مش عايز يعمل لي فيسبوك كنت حاسه انه مخبي عليا حاجه
وتاني يوم لما نزل الشغل خبطت علي جارتنا طنط سعاد ولما فتحت لي الباب ودخلتني وقالت لي اتفضلي .. طلبت منها اشوف حاجه علي الفيسبوك من تليفونها واول مامسكته بحثت عن اسمي ولقيته بس كانت المفاجاه ان حد منزل صورتي وكاتب اني مختفيه وانهم بيدورو عليا وكاتبين رقم موبايل