سركم في بير بقلم محمد عصمت
حصل هي الضربة كانت قوية لدرجة إنها أثرت على عينيا بس بعد شوية تركيز فهمت.. أنا متعلق بالمقلوب زي الخفاش كدا رجليا فوق وراسي تحت في الهوا حاسس براسي بتنزف من ورا بس مش قادر أتأكد من المعلومة دي حركت رقبتي عشان أشوفهم معدولين شوية كانوا واقفين تحت قالعين هدومهم من فوق صدرهم باين وراسمين عليه رموز وكلام مش مفهوم بس واضح إن كله له علاقة بالسحر أو حاجة زي كدا لابسين ماسكات مخيفة رجائي كان لابس ماسك على شكل كلب مرعب منير كان لابس ماسك على شكل جدي مخيف وكامل كان لابس ماسك على شكل قرد مفزع راسمين نجمة خماسية على الأرض فيه شمعة في كل طرف من أطرافها ومولعين نار في نصها بس الغريبة.. إنها كانت نار مخيفة نار لونها أخضر.
خدوا بالهم إني فقت بصوا ناحيتي منير قلع الماسك ضحك ضحكة مخيفة وهو بيقول إنت ساذج أوي يا محمود! إنت متخيل لما تقولنا إنك اكتشفت كل حاجة عن اختفاء عادل وتجيبنا المكان دا.. المكان دا تحديدا دونا عن أي مكان تاني مش هنفهم إنك كشفت السر
حاولت أتماسك حاولت
رجائي قال بهدوء أخوك مماتش مقتول يا محمود أخوك كان قربان أضحية لحاجة كبيرة أوي يمكن تكون حتى أكبر من قدرتك على الفهم
قلتله جربني.. جرب تشرحلي
كامل ضحك وهو بيقول هشرح لك كل حاجة عشان إنت في حكم الميت وحقك تفهم قبل ما تحصل عادل إحنا من زمان بنحاول نعمل عقد مع الشيطان صفقة لحاجة مش مهم تعرفها.. بس كان عندنا عقبة واحدة.. عايزين دم برئ جربنا كتير دورنا أكتر لحد ما قابلنا عادل ومن أول ما شفناه عرفنا إنها مش صدفة.. هو وقع في طريقنا لسبب جبناه هنا.. في نفس المكان دا وصفينا دمه عشان نعمل العقد ودفناه تحت هنا.. أنا فعلا عايز أعرف إنت عرفت مكانه منين مين وصلك لهنا
قلتله وعادل راح عشان صفقة مع شيطان! مصعبش عليكم دا كان بيحبكم.. كان بيعتبركم إخواته! طيب بلاش.. ليه جيتوا العزا ووقفتوا جنبي للآخر
رجائي قال بهدوء عشان سببين عشان محدش يلاحظ حاجة لو اختفينا أو خدنا جنب وعشان
منير قاطعه بغضب وهو بيقول إحنا مش هنقضي الليل في الحكاوي يلا نكمل عشان نلحق نجدد العهد وندفنه جنب أخوه ونمشي من هنا
ضحكت بصوت عالي بصوا لي قلتلهم من بين ضحكي نسيت أهم حاجة!
بصولي بدهشة كامل سألني حاجة إيه
قلتله وأنا بضحك لازم تمشوا من هنا قبل ما الميت يرجع!
بصوا لبعض بدهشة رجائي سألني يعني إيه
غمزت بعيني وأنا ببتسم وبقوله بص وراك كدا!
بصوا وراهم وشهقوا بدهشة كان واقف أدام عينيهم مبتسم ماسك في إيده مسدس وقبل ما حد فيهم ينطق بكلمة أو يفهم اللي بيحصل شق الصمت صوت ٣ رصاصات ووقعوا ال ٣ على الأرض مماتوش بس الألم والدهشة خرسوهم تماما.
بصلي وهو مبتسم وقالي مبسوط فوق عندك
قلتله وأنا مبتسم مبسوط طول ما شايفك بخير يا عادل
كنت واقف جنبه حاطط إيدي على راسي من ورا كنت متعور زي ما كنت متوقع رفعت عيني لفوق وبصيت لهم متعلقين التلاتة من رجليهم مقلوبين زي ما كنت مقلوب من
بس عادل رجع! لأنه مكانش مات!
لما ضربوه عشان يصفوا دمه جرحوه جرح مش مميت عشان يصفي دمه تماما هو كان حاسس بالغدر والخيانة قالي إنه رايح يقابلهم وعمل شير لوكيشن على الواتس آب عشان أعرف مكانه باستمرار عشان كدا وصلت وراقبت الوضع فهمت اللي بيحصل بسرعة بس لو كنت اتدخلت كان زماننا ميتين إحنا الاتنين استنيت لما مشوا وقدرت ألحقه في آخر ثانية فكروه مات بعد ما دفنوه
بس لما حفرت قبره كان لسه حي!
خرجته وعالجته عند دكتور معرفة وهو صمم يخلي نجاته سر لحد ما قام بالسلامة ساعتها بدأنا نخطط للخطة دي هينتقم منهم زي بنفس الطريقة اللي عملوها فيه هيعلقهم زي ما علقوه بس المرة دي.. مش هيمشي إلا ما يتأكد إنهم ماتوا خلاص
بصلهم قبل ما يبتسم بسخرية وهو بيقول متقلقوش يا شباب.. سركم في بير!
بتاع الرعب
قصص عصمت
صندوق
قصص من الصندوق
