حكاية رشا
ما تتجوز عليها يا ابني صحتك كويسة وخير ربنا كتير معاك أنا نفسي أشوف لك عيل شايل اسمك!
بصيت لها بضيق قمت من مكاني وأنا بسلم عليها كعادتي معاها في كل مرة بزورها فيها وقبل ما أمشي قلت لها أنا عمري ما هتجوز على رشا يا ماما رشا اللي وقفت جنبي من أيام ما كنت لسه موظف باخد ملاليم ساعدتني ودعمتني ووقفت جنبي أول ما ربنا يكرمني.. هروح أتجوز عليها!
حست إنها ضايقتني ولأني ابنها الوحيد ويعز عليها زعلي حاولت تصلح الموقف شوية وهي بتقول أنا مقصدش يا حبيبي أنا بس قربت أموت ونفسي يبقالي حفيد ألعب معاه وكدا كدا الجواز التاني مش حرام
ابتسمت وأنا بقول محدش قال إنه حرام يا ماما بس كسرة نفس رشا وزعلها على نفسها.. هو اللي حرام
نزلت وأنا بفكر في حياتي مع رشا كانت بتعمل كل حاجة عشان بس تخليني سعيد مقصرتش معايا أبدا في أي حاجة بالعكس.. رشا ست لو لفيت العالم كله مش هلاقي زيها عندها مشكلة بس..
إن مفيش أي حمل بيثبت مهما عملنا.. ومهما حاولنا..
البيبي بينزل ميت!
دا عامل أزمة نفسية شديدة جدا عند رشا لكن أنا مش فارق معايا أوي.. عادي.. أنا مقتنع إن لو لينا نصيب في حاجة هتحصل أنا بس زعل رشا هو اللي فارق معايا.
عديت على محل ورد مشهور على أول الشارع جبت لها بوكيه ورد حلو وجبت لها شيكولاتات كتير من السوبر ماركت وطلعت عشان أديها الحاجات دي.
بس للأسف.. كانت نايمة!
لما حصل موضوع نزول البيبي ميت دا كذا مرة حالة رشا النفسية بدأت تتدهور حاولت أساندها وأكون وراها لكن الدعم اللي بقدمه لوحده مكانش كفاية ولأني راجل مثقف وواعي.. كنت مؤمن تماما بأهمية الطب النفسي عشان كدا خدتها ورحنا للدكتورة هند عز العرب.. أشهر دكتورة نفسية في مصر كلها ونجمة كتير من برامج التليفزيون ولقاءات الراديو ولها أكتر من كتاب في علم النفس حققوا مبيعات محترمة جدا..
ولما دخلت معاها للدكتورة هند.. عرفت سبب شهرتها دي الدكتورة كانت محترفة جدا شاطرة في شغلها بشوشة في استقبالها دافية في التعامل مع مرضاها وقدرت تكسب ثقة رشا بسرعة جدا وصفت لها شوية
وفعلا عملت كدا.. اشتريت لها عزة عروسة لعبة من نوع خاص بيتباع برا مصر بس عروسة لها احتياجات زي الأكل.. الشرب.. تغيير الهدوم.. وهكذا زي لعبة افتراضية كدا والحقيقة إن الدكتورة هند كانت عبقرية فعلا لأن عزة العروسة كان لها تأثير السحر في نفس رشا اللي خرجت من حالتها النفسية ورجعت تاني للحياة بابتسامة عمري ما شفتها على وشها أبدا.
بس عارفين المشكلة كانت فين
إن عزة كانت.. عزة كانت مسكونة!
وقبل ما تقولوا أي حاجة.. اسمعوني!
من يوم ما عزة دخلت حياتنا خرجت رشا من عزلتها ورجعتها لحالتها الطبيعية تاني بس حولت حياتي لجحيم!
الموضوع بدأ بحاجات بسيطة ممكن أي حد في الدنيا يتجاهلها أو تعدي عليه من غير ما يركز فيها عادي حاجات زي شباك الأوضة اللي بنسيب فيها عزة.. واللي دايما بيتفتح مهما تأكدت إني قافله كويس أو مثلا إني لو سبتها على السرير في الأوضة ورحنا أنا ورشا ناكل أو نعمل حاجة في البيت
كأنها.. كأنها بتتحرك!
بس مين اللي بيحركها أنا ورشا دايما بنكون سوا!
ومفيش حد غيرنا في البيت!
رغم كدا كنت بطنش الحاجات دي ورغم كدا كنت بقول يمكن رشا هي اللي فتحت الشباك أو يمكن رشا هي اللي عدلتها بالشكل دا على السرير.
لكن من بعد اللي حصل من كام يوم.. وأنا مش قادر أقنع نفسي بحاجة غير إنها مسكونة!
رشا كانت بتجيب حاجة من عند والدتها اللي ساكنة قريب مننا جدا وقتها كنت أنا راجع من الشغل كلمتني قالتلي أروح بسرعة عشان عزة نايمة لوحدها وهي هتتأخر شوية عادي.. مفيش مشاكل..
رجعت البيت مرهق جدا دخلت من الباب حطيت شنطتي وقلعت جاكيت البدلة سبته على الكنبة اللي جنب الباب حاولت أفتح النور.. بس على ما يبدو إن النور كان مقطوع.
دخلت البيت وقفلت الباب ورايا طلعت الموبايل من جيبي وفتحت الكشاف البيت كان هادي كعادته.. ما عدا حاجة واحدة بس!
صوت كركبة جاية من أوضة النوم الكبيرة مين ممكن يكون حرامي معقول
دخلت الأوضة بخطوات بطيئة بقدم رجل وبأخر رجل زي ما
