رواية الخائنة كتابة حماده هيكل
الخائنة
كاملة
النهارده يوم مش عادي ..يوم خطوبتي على أجمل أنسانه في الدنيا ..خلاص أخيرا بعد تعب وطوا انتظار هنتخطب
بتدخل والدتي تصحيني من النوم
_ايه دا يا صلاح..انت صحيت امتى
_من بدري يا ست الكل ..أخدت دش وهنزل اعمل كام مشوار كدا وهعدي على الحلاق وبعد العصر هنتحرك من هنا على بيت العروسة
_طيب هحضرلك فطار بسرعة
_لا انا مستعجل..بس ياريت تنجزوا على ما ارجع تكونوا
جاهزين وخصوصا البت هدى ..عارفها بتقعد عشر ساعات قدام المرايا....الله الله الله ..في ايه بس يا ماما ..دا يوم ينفع تعيطي فيه برضو
_مانت عارف ..انا بزعل اعيط بفرح أعيط والنهاردة اليوم اللي انا مستنياه بقالي سنين
بوست إيديها ودماغها وانا بقول
_ربنا يخليكي ليا يا أجمل وأحن أم في الدنيا
سلام بقى عشان متأخرش
_مع السلامه يا حبيبي
في الطريق دينا خطيبتي أتصلت بي
_أيوه يا صلاح انت فين
_أيوه يا حبيبتي انا لسه خارج من البيت أهو
هخلص مشوار وهعدي عليكي في الكوافير
_لأ تعالى دلوقتي على طول
_مصممة يعني
_أيوه طبعا ..بسرعة يا صلاح
بعد ساعه كنت وصلت للكوافير
خرجت منه وركبت معي
_يلا سوق
_على فين !!
_اي مكان يا صلاح نتكلم فيه بهدوء
_اي مكان ايه ..وهدوء ايه ..مالك يا دينا في ايه
_في موضوع مهم عايزة اتكلم معاك فيه
_موضوع ايه دا
_هنتكلم هنا في الشارع
_ماشي يا ستي لما نشوف اخرتها
ذهبنا الى كافيه قريب من الكوافير
_ها أيه بقى يا ستي الموضوع
_ما تتكلمي في ايه
انا مش عارفه اقولك ايه
_خير يا دينا انا أبتديت أقلق
_طيب ممكن تهدى
بعصبية قولت لها
_طيب ممكن تتكلمي بقى !!
_حاضر...طبعا انت عارف أنا بحبك أد_أيه
واني بحسد نفسي عليك وبحلم باليوم دا من وقت ما قولتي انك بتحبني
_
_انت كنت سألتني قبل كدا ..في حد في حياتك ولا لأ
_قولتلك انه كان في شخص عرفته قبلك في الجامعة
وحبينا بعض لمدة سنتين ..بس علاقتنا انتهت من قبل التخرج بكام شهر ..فاكر
_أيوه وقولتلك ساعتها أنه مش هحاسبك على حاجة قبل ما نعرف بعض ..المهم أنك دلوقت مفيش حد في قلبك
_ايوه فعلا وأنا احترمت دا فيك جدا
أنت حتى مسألتنيش عنه ولا ليه سبنا بعض
_واسأل ليه..المفروض دي حاجة انتهت وملوش لزوم نتكلم فيها
_أنا كنت فاكرة زيك كدا..أنها حكاية وانتهت
لكن للأسف كنت غلطانة
_يعني ايه
_الشخص دا ظهر في حياتي من يومين بالظبط
معرفش ايه فكرة بيا ..وطلب مني أني انهي علاقتي بيك
وإلا
يتبع
الخائنة
يفضحك يفضحك بأيه ..أتكلمي
_معرفش
_يعني ايه متعرفيش
_صدقني مش عارفه ..بس اللي اعرفه انه شخص واطي وزبالة وممكن يعمل اي حاجة
_هو مين دا وايه حكايته بالظبط
_حبيبي ممكن توطي صوتك أحنا في مكان عام
_حبيبك..أنتي خليتي فيها حبيبي
_صلاح..انت بتشكك في حبي ليك
_كلامك مش مريحني ..من ساعة ما كلمتيني
_هو أسمه كريم ..انا مكنتش أعرفه وهو أصلا من كلية تانية
مش من كليتي
_واتعرفتوا على بعض إزاي
_كان في حفلة في الجامعة عندنا ..كنت فيها أنا وصحباتي
صاحبه كان حبيب بنت زميلتي ..قعدنا مع بعض بعد الحفلة في كافتيريا في الجامعة واتعرفنا على بعض
أنا كنت رافضة موضوع الإرتباط دا من أساسه
بس هو مع الوقت عرف يقرب مني ..ويحسنني بأهتمام
شعور انا كنت محتاجاة بجد.. كنت شايفه أنه طيب
وذوق جدا وبيخاف عليا وبيهتم بتفاصيل فيا
حببني في نفسي وفي الحياة وفي المذاكرة وبقيت بحضر بانتظام بسببه وكمان بقيت بجيب تقدير
_هايل كملي يا فنانة
_
بس لازم تعرف كل حاجة عشان اكون صريحة معاك
_ماشي ..كملي
_كل دا ومشفتش منه حاجة تخوفني منه او حتى اشك فيه كان محترم جدا لابعد حد..لغاية ما جه يوم وفي بنت شافتني معاه ..كانت تعرف أخت واحدة صاحبتي
راحت قالتلها صاحبة أختك ماشية مع شاب أخلاقه مش كويسه ولازم تبعد عنه عشان متندمش ..انا عارفه أنها بنت
محترمه وصعبان عليا أنها تقع في واحد زيه
طبعا صاحبتي جات وحكت لي على اللي حصل ..طبعا انا كنت هتجنن معقول كريم يكون كدا طب أزاي
حس بعدها اني متغيرة معاه ..واستغرب جدا مني خصوصا وأنه بقيت بتجاهله..ولما سألني واجهته وقولتله على اللي قالته عليه البنت
وقتها فهمني أنه مظلوم والبنت دي بتعمل كدا عشان بتحبه وعايزاني ابعد عنه ..أقتنعت بكلامه رغم أني في حاجة جوايا بتقولي أنه كداب
في يوم من الايام كنت مروحة من الجامعة وواقفه مستنية تاكس ..جه ولد فضل يرخم عليا ويضايقني وفجأة ظهر كريم واتعرض للشاب دا وضربه علشاني وكانت مشكلة كبيرة
يومها حسيت أنه ليا ضهر وسند بجد..ولا أراديا لقيتني بتعلق بيه وبحبه ..وفضلنا مع بعض حوالي سنة ..كان من وقت للتاني بيطلب مني صور وحاجات مش كويسه ..بس انا كنت بصدهوبزعل منه لكن كان بسرعة يعتذر ويصالحني
ويقولي اسف غصب عني ..انا بحبك ومش قادر على بعدك وكلام من دا..كنت بقوله اصبر لما نتجوز وابقى حلالك
لغاية ما جه في يوم وطلب مني أننا نتجوز عرفي
لأنه مش قادر يصبر لحد التخرج ..ورغم أن ظروفه المادية كانت كويسه وكان يقدر يتجوز وهو في الجامعة لكن كان بيتحجج انه والده مش هيوافق انه يتجوز الا بعد تخرجة وانه يثبت نفسه معاه في الشغل
المهم لما عرض عليا موضوع الجواز العرفي
وقررت أقطع علاقتي بيه..لانه لو كان بيحبني بجد
عمره ما كان هيفكر في حاجة زي دي
_وبعدين عمل أيه بعد كدا
_كان زي المجنون ..حاول يرجعني ليه بأي طريقة لكن انا رفضت وطلعته من قلبي رغم أن دا كان صعب عليا في البداية بس انا اللي أستاهل لما حذروني منه ومصدقتش ومشيت ورا كلامه..طاردني كتير ورجع اعتذر واتندم على اللي عمله لكن انا صممت على موقفي
لدرجة أنه بعد المحاضره قدام المدرج كله ..وقال بصوت عالي أنه بيحبني وبعتذر لي وبيطلب إيدي قدام الناس كلها
ومسك إيدي بالعافية وطلع خاتم وكان عايز يلبسه ليا
سحبت إيدي من إيده بسرعة وقولته أنت مش ناوي اعقل بقى انا قولتلك خلاص علاقتنا انتهت
فضل يزعق ويصرخ وكان هيضربني واتهجم عليا
الطلبة مسكوه واتحول مجلس تأديب واتفصل من الجامعة
وأختفى من حياتي ..ومعرفتش عنه حاجة تانية من وقتها
لغاية من كام يوم لقيت رقم غريب بيتصل عليا
ولما مردتش بعتلي رسالة ..كلمته وقولتله عايز مني ايه
قالي انه لسه بيحبني ومش هيسمح لحد ياخدني منه
قولتله أرجوك سيبني في حالي وانساني
رفض وقال انا ممكن أعمل اي حاجة بس مش هسيبك
انا ممكن افضحك واخلي خطيبك يسيبك ومحدش يتقدملك لكن المهم ابقي ليا أنا
_مش فاهم يفضحك يعني ايه
_مش عارفه ..الكلام دا قاله ليا إمبارح ومن ساعتها وانا خايفه وقولت لازم اقولك دلوقت
_ومقولتليش ليه من ساعة ما بدأ يضايقك
_محبتش أكبر الموضوع وقولت هو خلاص هيعرف أني خطوبتي قربت واني بحبك وهيبعد ..لكنه لسه_مصمم
_طيب هاتي رقمه
_ليه
_هاتي انا هكلمه واشوف اخرته ايه
_بلاش عشان خاطري يا كريم
_بلاش ليه ..ولا أنتي خايفه من حاجة
_هخاف من ايه يعني..انا بس مش عايزة تحصل اي مشكلة وخصوصا النهاردة..دا
وقبل ما أخد الرقم منها وصلتني منه رسالة على الواتس
ولما فتحتها مكنتش مصدق نفسي
صورة لدينا
