حياة أو موت
رزق بسيط نفسهم فيه يقوموا بايعين آخرتهم ويخسروا حبايبهم بالسهولة دي!!
وفي وسط ما أنا ماشية وسرحانة لفت نظري راجل وست قاعدين وعمالين يضحوا وفرحانين بدأت أقرب منهم واسمعهم وهما بيتكلموا
أنا عمري ما هتخلي عنك يا حبيبتي وبطلي بقي الجنان اللي في دماغك ده.
فجأة مراته عيطت وقالت
بس الدكتور قال إن العيب مني وإنت من حقك تجيب عيال.
مسك إيدها وبعدين باسها وقال
أنا أصلا مابحبش العيال بيعملوا دوشة كدة وصداع وبعدين انتي قبل ماتكوني مراتي ف أنتي بنتي وحبيبتي ودنيتي كلها.
مراته بدأت تضحك
بجد يا عادل
بجد يانور عيني قومي بقي هاتيلنا اتنين عصير علشان رجلي وجعاني وعطشان.
حاضر يا حبيبي.
وأول ما سابته ومشيت فضل مركز مع عيل صغير ماشي وماسك في إيد أبوه وبعد كدة بص للسما وقال
يارب ماتحسسهاش إنها أقل من باقي الستات وإكرمنا بالذرية الصالحة.
يارب بقالنا ٨ سنين صابرين ومستعدين نصبر أكتر بس نفسي أكون أب نفسي أشوف في عينيها نظرة جبر يارب إنت العالم بحالنا.
وانهار من العياط وهنا جت فرصتي علشان أدخل أكلمه.
طب ما أنت في إيدك الحل
مسح عينيه من الدموع بسرعة
مش فاهم.
استغليت ضعفه وقلت
طالما فيها عيب يبقي طلقها إنت مش مجبر تسحملها ربنا خلقك علشان تستمتع بأيامك لكن حرام اللي بتعمله في نفسك ده.
لاقيته بيضحك وقال
وبعد ما أطلقها تفتكري هستمتع بأيامي!
كفاية إنك هتعيش مرتاح وسط عيالك يا أخي.
ومين قالك إني مش مرتاح
بصيتله بقرف من فوق لتحت كان لابس هدوم رخيصة وقميص مقطوع
يعني مراتك مابتخلفش وكمان مش لاقي تاكل!! وعاوز تقنعني إنك مرتاح
باس إيده وش وضهر
الحمد لله رضا.
قربت منه جامد وبصيت في عينيه
هديك فلوس تعيش بيهم ملك بس مع واحدة غيرها.
لا.
وصوتنا بدأ يكون عالي
ابعد عنها.
لا.
دي عاملة زي النار وهتحرقك.
نارها جنة.
مراتك عقيم.
ربي رحيم.
عقييم.
ربي رحيم.
عقيييييم.
ربنا رحيم ربنا كريم ربنا عظيم.
عوضه هييجي كلامك مش هيأثر فيا أنا أقوي منك مراتي أجمل منك.
وحط إيده علي وشه وانهار في العياط
أنت بتعمل ده كله ليه!!!
رد بصوت واطي وقال
علشان ربنا زرع حبها في قلبي والحب أقوي حاجة في الدنيا.
جسمي إتهز وقلبي إتنفض وقلت بصوت
بتحبها!
هو لسه فيه حد قلبه نضيف وبيحب غيره برغم كل اللي فيه من عيوب
فجأة عيني بدأت تدمع
وإفتكرت إن الراجل العجوز ربنا كان كارمه ومراته بتخلف بس مارضيش بنصيبه برغم كل النعم اللي حواليه لإنه طماع وفكر في دنيته بس.
والشاب اللي زي الورد اللي ضيع مستقبله وثوابه عند ربنا اللي كان هياخده من كل مريض يعالجه ويشيل عنه من هم ووجع وجري ورا فلوس قليلة ورزق فاني ونسي ثواب كبييير وأجر باقي.
وواحد واقف قدامي دلوقتي بكل جبروت لا عنده فلوس ولا عيال بس عنده الأهم من ده كله.
عنده إيمان وثقة في ربنا.
ومرة واحدة لاقيته بيقرب مني أكتر وأكتر
علي فكرة أنا عارف أنتي مين.
بصيتله وإيدي بترتعش
أنتي عجوز ضعيفة وفتنة للبشر أنتي دار فانية وفترة قصيرة واختبار من ربنا.
وبدأ يعيط أكتر وقال
أنتي اللي عاوزة تديني يومين حلوين فانيين أنسي فيهم آخرتي وتحرميني من جنة خالدة هكون فيها مع مراتي اللي صبرنا سوا وعاندنا سوا بس ساعتها هنكون بنضحك وهكون لابس نضيف مش زي ما انتي شايفاني دلوقتي لإن جزاء الصبر هتكون أجمل صورة من ربنا للجبر.
أنتي فانية برغم كل ما فيكي من ملذات وجمال فانية.
في اللحظة دي شكلي الجميل اتحول لعجوز قبيح جسمي ماليه التجاعيد ضهري محني وماسكة عكاز
وسيبته ومشيت براحة وماليني الحزن...
الحزن علي كل واحد كان قدامه طريق ربنا واختارني زي المجنون وكإن أنا اللي باقياله.
علي شباب زي الورد مضيعة عمرها وصحتها في الطريق الغلط.
علي كل واحد اختار الحرام لإنه سهل وساب الحلال لإنه أصعب شوية.
___________
أنا واحدة عدا عليها جميع أنواع البشر ملوك وعبيد.
ناس معروفة بثروهم وسلطتهم وغيرهم مايملكوش غير بساطتهم وقلة حيلتهم.
في الآخر كلهم اتساووا تحت التراب.
أصل الطين اللي اتخلق منه الغني هو هو نفس الطين اللي اتخلق منه الفقير.
والطين مافيهوش ماركات ولا براندات
ف نصيحة مني
قرب من ربنا وإرضي برزقك مهما كان قليل وأوعي تيأس من رحمته وخليني آخر حاجة ممكن تفكر فيها وأوعدك هتعيش عزيز وتموت عزيز.
لكن لو فكرت فيا وخليتني أول أولوياتك هديك كل أسباب السعادة اللي ممكن تتخيلها بس بعد فترة أوعدك هتجيلي مكسور ومذلول وساعتها هدوس عليك بكل قسوة.
أنا
أنا الدنيا ... أنا الفانية.
ماتتعلقش بيا ولو حتي ثانية.
