حياة أو موت
قاعدة وحاطة رجل علي رجل وواحد عجوز قاعد قدامي على الأرض مذلول ومكسور وهو بيبوس رجلي وبيعيط زي العيال الصغيرة.
رجعيلي اللي راح مني يابنتي بالله عليكي.
إرحمى ضعفي ويأسي.
بدأت ألعب في شعري الناعم والطويل وقلت
للأسف ماينفعش يا حاج.
علشان خاطري وهعملك أي حاجة نفسك فيها.
طب يلا خش علي الرجل التانية.
رفع راسه لفوق وبص في وشي وهو مقهور ومذلول وقال
يعني إيه!!
وقفت وقلت بصوت عالي وأنا مكشرة
يعني بوس الرجل التانية.
عينه بدأت تتكسر أكتر ما هي مكسورة وأول ما بدأ يبوس فيها خبطت رجلي في وشه ب كل طاقتي ووقعته علي الأرض.
بقي أنت زعلان علشان ولادك رموك في الشارع!!
زعلان ليه يابو الولاد!! هو أنت مش طول عمرك كان نفسك في الولد وعمرك ماحمدت ربنا ولا رضيت برزقك
راح قايل بصوت واطي وخايف
ندمان أوي علي كل اللي عملته ندمان ومرعوب أقابله.
ضحكت بصوت عالي وأنا رافعة راسي لفوق وواحدة واحدة ملامح وشي بدأت تتغير لحد ما بقي لونه أحمر وبصيتله وعيني ماليها نية الانتقام .
ربنا كرمك ب بنت في يوم من الأيام بس سواد قلبك وطمعك خلوك ظالم وجاحد.
كل
وبعد ده كله رميت بنتك وهي لسه في اللفة وسيبتها لأهل أمها علشان يربوها وأتجوزت أتنين تانيين.
أتنين يا ظالم علشان تجيب ولد!!
ومن طمعك بدل الولد جبت خمسة.
مش ده اللي كان نفسك فيه برضو
لاقيته بيهز راسه وهو باصص للأرض ف وطيت وبصيت في عينيه ب جبروت
وأنا بقي المبدأ بتاعي داين تدان.
وزي ما رميت بنتك زمان ولادك رموك دلوقتي زي الكلب وزي ماكسرت بخاطر مراتك وقهرتها لحد ما ماتت هتفضل مكسور ومقهور بس مش لحد ما تموت... لا ..... ده لحد ماتقابلها وتقفوا قدام ربنا ويا عالم ساعتها هتسامحك ولا لا.
ف ماتزعلش لما تجيلي راكع وندمان وتبوس رجلي كمان ما هو أنا كدة يا حاج يوم معاك ويوم مع غيرك واللي يفهمني صح هيعرف إني مش دايمة لحد.
بس أنتي اللي قولتيلي زمان إعمل اللي نفسك فيه وعيشلك يومين ماحدش واخد منها حاجة.
رحت ضاحكة ب صوت عالي وماشية وهو لسه مرمي علي الأرض
ما أنا متاع الغرور بقي.
أنا اسمي فاتن.. أنا أجمل بنت ممكن تشوفها في حياتك بحب أفتن
أنا لعنة المغرورين ف ما تتعلقش
ومرة واحدة ظهر قدامي شاب لابس نضارة عنده حاجة وعشرين سنة قاعد بيذاكر في استراحة جمب جنينة في الشارع.
بدأت أقرب منه وهو مركز في الكتاب لحد ما قعدت جمبه.
إيه ده أنت في كليه طب يااااه هتفضل 7 سنين دراسة هتستحمل إزاي يابني!
قفل الكتاب وهو بيضحك
حلم أبويا وأمي بقي لازم أستحمل ده كفاية نظرة الفخر اللي بشوفها في عينيهم.
بصيت للسما وبدأت أهز راسي يمين وشمال وقولتله ببرود
بس أكيد نظرة الفخر دي هتتغير بعد ما تخلص 7 سنين وتشتغل في مستشفي معفن وتاخد ألفين جنية في الشهر.
ملامح وشه اتغيرت وبصلي ب استغراب
بس اسمي دكتور تعبت وكافحت لحد ما وصلت وأكيد هييجي يوم ومرتبي يزيد.
ضحكت بصوت عالي
هو فعلا هيزيد وهيبقي ألفين ونص.
وقف قدامي وهو متعصب
تقصدي إيه!!
ليه تستني ده كله لما ممكن تشتغل دلوقتي وب 20 ألف جنية في الشهر.
عينيه بدأت تلمع والطمع ملي قلبه
عشرين... عشرين ألف جنية
وهيزيدوا كل شوية كمان.
هز راسه
طب وكلية الطب!
وأمي وأبويا
تعيش دكتور شحات ولا تشتغل حاجة تانية وتعيش زي البهوات!!
أمك وأبوك هيفرحوا لما يلاقوا معاك فلوس لكن الشهادة ماعدتش بتجيب فلوس خلاص.
فضل ساكت شوية وقال
بصراحة عندك حق.
يعني موافق تتاجر في المخدرات!!
فجأة لاقيت إيده بترتعش وشفايفه بتتهز
مخدرات!!!!!!
30 ألف في الشهر مبلغ مش قليل.
إنتي مش لسه قايلة 20
لا 30 وممكن يبقوا 40 كمان يا دكتور وسنة واحدة في الشغلانة دي هتخليك مرتاح لحد ماتخلص تعليمك.
ده لو حابب تكمل بعدها تعليمك يعني.
لاقيته رمي الكتاب بتاعه علي الأرض وقال
والله عندك حق التعليم مابيأكلش عيش ماجتش من سنة هعمل فيها مبلغ كويس أفتح بيه مشروع وأعيش بعد كدة مرتاح.
ضحكت وحطيت إيدي علي كتفه واديته ورقة فيها عنوان الراجل اللي هيشتغل معاه وواثقة إنه بعد شهرين هيجيلي راكع زي الراجل العجوز لإنه طماع ومايختلفش عنه.
ربنا إداله مكانة علمية عالية بس هو مش قادر يصبر هيضيع نظرة فخر موجودة جوا عيون أمه وأبوه وهيكسر عينهم بين الناس وفي يوم وليله حاله هيتحول من دكتور لتاجر مخدرات
حال البشر غريب والله.
علشان شوية فلوس أو
