كل حياتي
السكوت هو المسيطر علي المكان قلبي بينبض بصوت عالي بدعي ربنا إنه يشفيني.
الدكتور حط حاجة في عيني بتحرق فضلت ٩ ساعات متواصلة جوا العمليات ولما الدكتور خلص حط علي عيني قطن ولف عليها شريط وقال هيتفك بعد أسبوع ونشوف النتيجة.
الأيام مابتعديش اليوم كإنه ب سنة وأسماء وصوتها وتفاصيلها وريحة برفانها مش مفارقيني وكل شوية عاوز أتصل بيها لحد ما اديت الموبايل لأخويا خالص علشان يمنعني عن كدة.
لحد ما جت أهم لحظة في حياتي.
الدكتور قدامي بيفك الشريط مع كل ثانية بتعدي نبضات قلبي بتزيد لحد ما فكه كله وشال القطن.
عيني مقفولة مش قادر أفتحها دموع جواها منعاها إنها تفتح صوت شيطان جوايا بيقولي هتفضل أعمي
ومرة واحدة جه في دماغي صوت ل أسماء جاي من بعييييييد وكإنها بتقولي أنا مستنياك اتأخرت عليا ليه!!
بدأت أفتح واحدة واحدة شوفت حاجة بيضا وسحابة قدام عيني دقيقتين بحاول أفتح
ومرة واحدة.
أخويا بدأت ملامحه تظهر قدامي وهو باصصلي جامد وبيعيط علي يمينه دكتور و٣ ممرضات أيوة ٣ أنا شايفهم قدامي وبعدهم علي صوابعي كله باصص عليا عيني راحت يمين وشمال علي كل زاوية في الأوضة حطيت إيدي قدام عيني وشايف صوابي بتتعرعش.
وبأعلي صوت عندي بقول
أنا رجعت أشوف تاني يارب أبو العينين رجع عنده عينين تاني يارب مش هعصيك تاني والله مش هعصيك تاني والله وسجدت وإنهرت في العياط لحد ما أخويا أخدني في حضنه زي العيل الصغير وفضل يطبطب عليا لحد ما بطلت عياط.
هديت شوية وأخويا
فين الموبايل بتاعي.
فضل يدور في جيوبه وفي كل مكان في الأوضة وراح يدور عليه في البيت ومالقهوش ساعتها مالومتوش ولا عاتبته لإن مافيش وقت قدامي
لبست البدلة وركبت تاكسي لحد المستشفي اللي كنت فيه الأول ودخلت جري علي الاستعلامات.
لو سمحت فيه هنا حالة موجود في اسمها اسم الطويل
ثواني هدورلك.
بحث عن اسم الطويل علي الكومبيوتر
للأسف الاسم مش موجود عندي.
مش موجود عندك ازاي ده كان هنا من أسبوع.
هتلاقي الحالة خرجت من المستشفي وفي الحالة دي اسمها بيتحذف من هنا.
تمام شكرا.
سلمت أمري لله وقلت هقلب الدنيا علي الموبايل لو هدفع فيه كل ثروتي.
وفي اللحظة دي روز جت في دماغي فطلعت بسرعة للدور اللي كنت محجوز فيه وبسأل هل هتعرفني ولا نسيتني طب أنا هيمزها إزاي!!
ومرة واحدة لاقيت قطة جاية جري عليا كان شعرها أبيض وعينيها رصاصي ولما لمستها وأخدتها في حضني عرفت إن هي روز صديق وونس المستشفي وعينيا اللي فضلت شهر وشوية أشوف بيها.
حيوان حبني لمجرد إني كنت عطوف عليه برغم إني مابشوفش ومتعجب من حال البشر
أخدتها علشان تفضل عايشة معايا في البيت ونازل علي السلم ولسه بعده سلمة سلمة وعند السلمة قبل الأخيرة افتكرت إني عرفت أسماء هنا كملت طريقي وكل شوية أغمض عيني واحسس علي الحيط علشان أعرف أوصل لمكان ليه ذكري معايا وبعدين أفتحها علشان أشوف شكل المكان ده وبعد كدة غمضت عيني علشان أوصل
وقبل ما أوصل للمكان ب ٣٠ خطوة زي ما كنت حاسبهم
روز سابت إيدي ونطت وجريت بسرعة ناحية بنت قاعدة في استراحة وعلي يمين الاستراحة دي صندوق زبالة كبير.
عيني بدأت تدمع لما سمعت نفس الصوت اللي قلبي بيفرح لما يسمعه وهي بتقول وحشتيني يا روز بقالي أسبوع مستنياكي علشان أشتكيلك من محمد وأقولك إنه سابني وبعد عني ماتعرفيش هو راح فين! وحشني وخد قلبي معاه ومشي يا روز.
بدأت أقرب شوية وشلال دموع فتح جوايا لما ملامحها ظهرت أوي قدامي لما باست روز وضحكت ظهر في وشها غمازتين قصيرة ملامحها بريئة زي السما الصافية عيونها زرقا زي جمال البحر حرفيا أجمل بنت شوفتها في حياتي أجمل بكتير من الصورة اللي كنت راسمهالها.
قربت أكتر وأكتر ريحة البيرفيوم اللي متعود عليه بدأت أشمه لحد ما قربت خالص ووقفت وراها وهي حاضنة روز روز كانت باصالي وراحت ناطة من حضنها لحضني ومن الخضة أسماء وقعت علي الأرض
في اللحظة دي الزمن وقف أسماء قدامي علي الأرض واقعة زي أول مرة قابلتها وماكنتش شايفها دمعة من عيني بتنزل برااااااحة ببص علي كل حتة في وشها كل تفصيلة كان نفسي أشوفها عينيها اللي كان نفسي أوصفها وأقولها قد ايه هي جميلة الكتف اللي فضل ساندني وماملش مني نفس الإيد اللي كانت علي قلبي وطمناه وبتقوله أنا جمبك حتي لو فضلت كدة أنا جمبك عمري كله.
نزلت علي الأرض بسرعة ومسكت رجلها وبعدين دراعها وقولتلها
حقك عليا
وعيني بدأت تعيط ومركز جامد في عينيها.
جسمها ارتعش وانتفضت من مكانها .
محمد أنت رجعت تشوف!!!
وشها إحمر شفايفها بدأت ترتعش ودموع عينينها سبقت ده كله .
أنا حاسس إني أول مرة في حياتي أشوف.
وبعدت عني!
بحبك.
واستنيتك كتير أوي.
لسه بحبك.
كل يوم باجي استناك هنا من بعد صلاة الضهر وأروح المغرب.
غمضي عينك وحطي إيدك علي وشي وقوليلي شايفة ايه.
قربت مني وحبست دموعها حطت إيدها علي وشي وقال
شايفة واحد حبني وكان عاوز يتجوزني وهو كفيف واحد خاف يظلمني معاه علشان هيكون تقيل عليا شايفة أجمل واحد في الدنيا.
طب ولو فتحتي عينك
هقولك بحبك.
طب شيلي إيدك وعدي لحد تلاتة وفتحي عينك
واحد. اتنين. تلاتة.
وطيت علي ركبتي وفي إيدي روز ولابس بدلة باصصلها وأنا شايف وبضحك وبقولها
تتجوزيني
وطت علي ركبتها قدامي وقالت
كان فيه واحد مابيشوفش قالي في يوم
لو رجعت أشوف تاني هاجي لحد عندك وفي إيدي روز ووشي بيضحك ولابس بدلة ساعتها هوطي علي ركبتي وأقولك تتجوزيني.
فبحق كل لحظة حلوة عشتها معايا لتسيب روز علي الأرض وتقف قدامي وتغمض عينيك.
وأول ما وقفت وغمضت عيني لاقيتها دخلت جوا حضني وضاماني عليها لدرجة إننا كنا حاسين بنبضات قلب بعض ولاقيتها بتقول
من كل حتة في قلبي وفي روحي مستعدة أبيع علشانك روحي وبصبر كل أهل العشق اللي في الدنيا أنا موافقة أكونلك كل حياتك مش بس مراتك.
ومن جمبنا روز باصالنا وشاهدة علي حبنا اللي بدأ في نفس
لأنضف قصة حب شافها حيوان علي مدار عمر بني الإنسان.
