كل حياتي
المحتويات
نفس العلامة.
لا هي كانت خطيبتي.
وسبتوا بعض ليه
حكيتلها كل حاجة ماعرفش عملت كدة ليه بس كنت محتاج أفضفض مع حد .
الحيوانة تسيب القمر ده كله علشان تعبان شوية!!
شوفتي بقي ازاي.
يلا خدت الشر وراحت.
انتي عندك كام سنة يا أسماء.
٢٤ سنة.
مخطوبة
لا لسه.
ربنا يكرمك بشخص كويس.
يارب أنت شغال ايه صحيح!
أنا رسام.
ده اللي هو ازاي
هو أنتي حد قالك إني مولود كفيف يابنتي
أه صح ربنا يقومك بالسلامة وترجع أحسن من الأول وتكسر الدنيا باللوح بتاعتك.
يااااارب.
خد بقي جايبالك حاجة معايا.
جايبالي ايه
شوية حلويات يستاهلوا بؤك.
لا لا مابحبهاش والله تسلميلي.
هتكسفني يعني
لا ماقدرش.
ومرة واحدة لاقيت إيدها بتقرب مني وبتحط حتة بسبوسة في بؤي ساعتها قلبي دق ٣ دقات .
ماتتعبيش نفسك أنا هاكل لوحدي.
ياعم تعب ايه بس المهم تسامحني علي الموقف البايخ بتاع إمبارح ده.
والله عادي ماحصلش حاجة.
ماتزعليش بقي ياروز القطط مابتاكلش حلويات.
وفضلت تأكلني لحد ما الطبق كله خلص ماكنتش بحب الحلويات بس حلاوة قلب أسماء قدرت تخليني أحبها وخليتها تكتب رقمها علي موبايلي علشان ابقي اكلمها ومشيت .
هي حلوة ياروز
ميااااو.
طب ولون عينيها ايه!
مياااااو.
بجد
مياو مياو مياو.
فرحتيني والله نامي بقي تصبحي علي خير.
عدا ٥ أيام بنقعد مع بعض كل يوم طول النهار أنا وهي وروز ونسمع من بعض نضحك ونغني وبالليل سهرانين نتكلم في الموبايل للفجر لحد ما قلبي اتعود علي وجودها وأتعلق بيها بدرجة كبيرة ويومي ماكنش يكمل غير لو قضيته معاها لحد ما جه سادس يوم لحظة غروب الشمس بالتحديد وإحنا ماشيين مع بعض وهي ماسكة إيدي.
أسماء غمضي عينك كدة.
أهو.
افضلي مغمضة
ومسكت إيديها الإتنين حطيتهم علي وشي وسألتها شايفة ايه!
شايفة إنسان جميل أجمل من ناس كتير أوي شايفة حد وجوده فرحة ونور لحياة كلها ضلمة.
أنا فيا كل ده
وأكتر من كدة بكتيييير.
طب عارفة أنا شايفك ازاي بقي
ازاي!
حطيت إيدي علي وشها وبدأت ألمس تفاصيلها لما ضحكت حسيت بغمازتين تحت إيدي رموشها طويلة مناخيرها صغيرة عينيها واسعة وشها ناعم زي بشرة الأطفال كإنها هي والقمر نسخة واحدة بس هي اللي موجودة معايا علي الأرض ومنورة دنيتي .
أنا شايفك أجمل بنت في الدنيا.
وإيه تاني.
حطيت ايدي علي كتفها
شايف سند واقف جمبي من يوم ما شافني ومستحيل يميل.
وشايف ايه كمان
مسكت إيدها وحطيتها علي قلبي وقلت
لو كنت بشوف
ورجعت إيدي علي وشها تاني علشان أحفظ تفاصيلها وأشبع منها أكتر وحسيت مرة واحدة بدمعة نازلة فوق ايدي .
أنتي بتعيطي
ردت بتنهيدة وصوت واطي
تتجوزني من غير حتي ما تشوفني
ومين قالك إني مش شايفك! أنا أه مش شايف شكلك ولا ملامحك بس شايف قلبك الدافي وروحك الحلوة شايف جيش واقف قدامي في وقت كل اللي موجود جمبي يتعدوا علي الصوابع شايف بنت طولها ١٦٠سم بس صبرها عليا أطول من ليالي العمر كله.
دلوقتي وأنا مغمضة عينيا شايفة لأول مرة في حياتي واحد جمييييل بيحب الروح والقلب قبل حتي ما يعرف الشكل.
ولو فتحتي عينيكي
هقولك بحبك بصوت عالي ومستعدة أكون عينيك اللي بتشوف بيها عمرك كله.
طب أفضلي مغمضة.
أنت مش عاوزني أقولك بحبك
لا.
ليه!!
بكرة الدكتور هييجي ويشخص حالتي ولو رجعت أشوف تاني هاجي لحد عندك وفي إيدي روز ووشي بيضحك ولابس بدلة ساعتها هوطي علي ركبتي وأقولك
تتجوزيني .
بس أنا مش أنانية وسواء كنت شايف أو لا أنا هفضل جمبك.
وأنا عمري ما هظلمك معايا.
صوت عياطها بدأ يكون عالي
ياعم أظلمني أنت مالك.
لحد بكرة خليكي متأكدة إنك أجمل واحدة قابلتها ولسه ماشوفتهاش.
هستناك
رجعت علي الأوضة وقفلت موبايلي علشان ماتتصلش عليا وعيني كلها دموع وندم إني علقتها بيا في وقت أنا مابعرفش أجيب لنفسي كوباية ماية شخص عاجز عن إنه يشوف عينيها ويوصفلها قد إيه هي جميلة وجوايا حاجة بتقولي إبعد عنها هتفضل مابتشوفش ماتظلمهاش يا طماع ماتعلقهاش بيك أكتر من كدة إبعد إبعد إبعد لحد ماغرقت في النوم
وماصحتش غير علي صوت الممرضة وهي بتقول
الدكتور الألماني جه ومعاه المترجم بتاعه.
بعد شوية جالي وقعك قدامي والمترجم بدأ يترجملي هو بيقول إيه
افتح عينك كويس.
أهو.
العين التانية.
أهي.
طلب الأشعة اللي كنت عاملها علي المخ وإديتهاله .
بص فيها وقال للتمرجم كلام غريب ولاقيت المترجم بيقولي
الدكتور هينقلك مستشفي خاص دلوقتي حالا ويعملك العملية في أسرع وقت لإن حالتك لو اتأخرت الأمل الضعيف في الشفاء هيضيع.
أخويا كان معايا وقال تمام إحنا جاهزين وبعدين مضي علي تعهد إن لو العملية فشلت وفقدت أملي تماما هيكون بسبب عدم استجابة من إشارات المخ اللي بتوصل للعين .
ومن جوايا بفكر في أسماء وقررت إني مش هكلمها غير بعد العملية علشان حتي لو مافيش نصيب وربنا كاتبلي أكمل باقي حياتي
الإسعاف جه ونقلني علي مستشفي تاني ودخلت أوضة العمليات.
صوت
متابعة القراءة
