كل حياتي
عدا شهر وأنا لسه في المستشفي كنت شاب طايش سايق العربية بسرعة علشان مايتأخرش علي معاده مع خطيبته والنتيجة خسرت أغلي حاجة في حياتي.
محمد أنت مؤمن بالله وإن كل حاجة نصيب صح
أكيد طبعا بس ليه السؤال ده
من غير لف ودوران أنا مش مستعدة أكمل حياتي معاك وأنت كدة كل صحابي نصيبهم حلو أنا مش أقل من حد ومش هقدر أستحمل أشوفك وأنت .....
أعمي وأنا أعمي يا رحمة قوليها ماتتكسفيش.
ربنا يقومك بالسلامة ويرزقك بواحدة أحسن مني ومستعدة تضحي.
مش هلومك ولا هعاتبك وربنا يرزقك بواحد بيشوف كويس لإنه لو أعمي مستحيل يحبك.
تقصد ايه
أقصد إن الأعمي في الوقت اللي بيكون عاجز يوصف اللي قدامه سواء كان إسود أو أبيض طويل أو قصير حلو ولا وحش.
قادر يعرف تفاصيل القلب الإسود اللي كله شر وطمع والكدب والخداع اللي متفصلين علي قلبك بالمللي يا أنسة رحمة.
مش هرد عليك علشان مقدرة الحالة اللي أنت فيها.
قفلت المكالمة في وشها وقلعت الدبلة رميتها من الشباك وكانت آخر مرة أكلمها بس حسيت ساعتها إن عندي جرح كبير في قلبي وحد جه حطلي فيه شوية ملح .
عدا علي المكالمة دي أكتر من ٣ أسابيع بس كل ما أفتكر نفسيتي بتتعب.
بعد كدة
نازل علي السلم بسرعة وقبل آخر سلمة منه زي ما كنت عادد خبطت جامد في واحد وسمعت صوته بيقع علي الأرض اتخضيت وسيبت روز علي الأرض وفضلت أحسس علشان ألاقيه لحد ماوصلت لرجله وطلعت بإيدي لحد دراعه ومسكته وقولتله
حقك عليا والله غصب عني.
ماتفتح ياعم أنت وإيه قلة الذوق دي بتحط إيدك علي جسمي ليه ياخي اتقي الله.
أنتي بنت!!!
ده أنت مش عندك نظر صحيح.
أنا فعلا ماعنديش نظر وحقيقي أسف.
فضلت ازحف علي ركبي وأحسس لحد ما لاقيت القطة بتاعتي وقلبي واجعني علي اللي بيحصل معايا وكملت طريقي وقعدت في الجنينة مستني أخويا ييجي علشان راح مشوار واتأخر عليا .
عدا ٥ دقايق ولاقيت حد قعد جمبي وريحة بيرفيوم حريمي دخلت جوا مناخيري.
حقيقي أنا أسفة ماكنتش أعرف.
أنا اللي المفروض أعتذرلك لإني كنت ماشي بسرعة.
أنت ايه اللي حصل لعينك
حادثة عربية بسيطة كدة بس الدكتور قالي فيه أمل ومستنين خبير ألماني هييجي المستشفي زيارة كمان أسبوع يشخص حالتي.
خير بإذن الله.
وأنتي بتعملي ايه هنا في المستشفي
بابا بيعمل عملية في عينه ومحجوز.
ألف سلامة عليه.
الله يسلمك يارب اسمك ايه بقي
محمد أبو العينين وماتضحكيش ده لقب العيلة لكن أنا ماعنديش عينين وربنا.
راحت ضاحكة بصوت عالي وحسيت إن يومي بدأ يكون جميل .
التريقة بدأت أهي.
ماقدرش يابو العينين.
وضحكت تاني.
وأنتي اسمك ايه بقي ياللي ضحكتك حلوة!
أسماء الطويل وده لقب العيلة برضو لكن أنا ١٦٠ سم والله.
صوت ضحكنا المستشفي كله سمعه وتقريبا كانت دي أول مرة أضحك من قلبي بعد اللي حصلي .
جميلة اوي القطة دي هي بتاعتك
أيوة اسمها روز وبالنسبالي عيني اللي بشوف بيها هنا لما أخويا بيغيب عني وونس معايا في أوضتي طول الليل.
طب هاتها كدة.
مسكتها وفضلت تقولها انتي جميلة وخلي بالك منه وتقريا لعبت في شعرها وراحت حطاها علي رجلي تاني وقايله
هسيبك دلوقتي بقي وأروح أشوف بابا وهشوفك تاني.
يابختك بتعرفي تشوفي.
ما أنت أطول مني وماتكلمتش.
خلاص يا ستي علي العموم لو احتاجتيني في أي وقت هتلاقينا هنا في نفس المكان بعد صلاة الظهر كل يوم.
أتفقنا.
ومسكت إيدي حطت فيها شوكلاتة ومشيت بس ريحة البيرفيوم بتاعها فضلت
رجعت الأوضة بتاعتي وأخويا جه حكيتله علي اللي حصل وأتفقت معاه ييجي معايا في يوم علشان يوصفلي شكلها.
تاني يوم بعد الضهر بحاجات بسيطة كنت قاعد في نفس المكان وبتأمل في منظر طبيعي ماعرفوش بس أكيد حلو وسمعت صوت حد جاي من ورايا فعرفت إنها هي من ريحة البيرفيوم.
نورتي المكان المفضل بالنسبالي يا أنسة أسماء.
وأنت عرفت منين إنه أنا أنت بتشوف وبتضحك عليا ولا ايه!!
حتي لو بشوف أنا دلوقتي مديكي ضهري هشوف ازاي
أمال عرفت منين
روز قالتلي إن فيه بنت حلوة جاية.
هي روز بتتكلم
مش بقولك عيني اللي بشوف بيها هي أكيد شافت جمالك وقالتلي.
طب أنا زعلانة منك يا روز علشان كنت عاملاله مفجأة.
وأخدت روز مني وفضلت ماسكاها
شايفة يا أسماء المنظر الطبيعي الخلاب ده
وشاورت بإيدي علي اليمين
والله يابو العينين أنا كل اللي شايفاه في المكان اللي شاورت عليه صندوق زبالة.
بجد
للأسف.
ضحكت علشان أخويا كان قايلي وهو قاعد معايا إن علي يميني فيه منظر جميل بيفكره بخطيبتي القديمة .
طب أقعدي يا رحمة.
رحمة مين
أسف يا أسماء اقعدي.
تمام.
قعدت وسألتني
مين رحمة دي بقي خطيبتك
عرفتي
لما بتلبس دبلة لفترة بتفضل سايبة علامة في صباعك وصباعك فيه
