الزوج توفى والزوجة ابتدت تصرخ الناس جرت على دكتور الصحة

الزوج توفى والزوجة ابتدت تصرخ الناس جرت على دكتور الصحة وجه جرى كشف على المتوفى وقال
البقاء لله يا جماعة إبراهيم مات
وكتب تصريح الوفاة وتم دفن إبراهيم ومرت حوالى سنة وجه جواب لقسم الشرطة من واحد مجهول..
إبراهيم مات مسموم والزوجة هى القاتلة
محققين الشرطة كان لازم يتحركوا اصدروا تصريح من النيابة لفتح المقبرة
لما الناس عرفت انهم هيفتحوا المقبرة هاجوا واتجمعوا أمام المقبرة لمنع الشرطة من فتحها..
ازاى يفتحوا قبر ميت ده حرام
ابتدت قوات الشرطة تشرح للناس ان فى بلاغ ان ابراهيم مات مقتول ولازم نحقق
إبراهيم مات عادى وكلنا كنا مع دكتور الصحة
بعد مفاوضات كتير وتدخل شيخ المسجد الناس ابتدت تبعد وتسيب الشرطة تشوف شغلها وتم فتح المقبرة وكانت المفاجاة
الجثة اختفت
فين جثة إبراهيم؟؟
ضابط الشرطة مكنش عارف يتصرف ازاى لغاية ما عرض عليه دكتور الطب الشرعي انه ياخد عينات من التربة ويحللها لو فى سم هيظهر فى عينات التراب وبالفعل اخد الدكتور

العينات وراح على المعمل
الضابط جاب الزوجة وابتدا يسالها
فردوس فين جثة إبراهيم؟
حضرتك بتسالنى انا؟ ده على اساس انى كنت دفناها فى البيت مثلا
اتكلمى عدل
حضرتك سؤالك غريب وغير منطقى بتسالنى عن جثة مدفونة من سنة
فى جواب وصل لقسم الشرطة بيتهمك بقتل زوجك
عادى انا ممكن ابعت جواب للقسم اتهم حضرتك بقتل زوجى
انتى بتقولى ايه؟
بقولك ان اى حد ممكن يتهم اى حد من غير دليل.. حضرتك عندك دليل انى قتلت جوزى؟ جوزى مات موتة طبيعية والدكتور كشف عليه وطلع تصريح الدفن والراجل اندفن بلاش بقا النبش فى القبور
فى ناس شهدوا انه كان بيعاني من تعب فى المعدة قبل موته.. ايه السبب ؟
حضرتك ممكن تروح تساله انا معنديش تفسير لتعب معدته
مفيش اى دليل عشان يوجه لها اتهام وكان لازم يشوف تقرير الطب الشرعي
خرج التقرير اللى اثبت ان هناك أثار لسم الزرنيخ موجود في التربة
وتم استدعاء الزوجة مع توجيه لها اتهام رسمى بقتل زوجها
وحضرتك هقتله ليه؟ عندى ولد مثلا وكنت هورث كل فلوسه.. او اتجوزت بعد موته؟ ثم جوزى كان كل يوم بيروح لاخوته وياكل عندهم لانه بخيل وهما الوحيدين المستفيدين من موته لأنهم ورثوا كل حاجة وانا طلعت من المولد بلا حمص
كلامها معقول
سيرتها كويسه مبتديش فرصة لحد يقرب منها والتحريات أثبتت ان مفيش حد في حياتها وابتدت التحقيقات مع اخو الزوج ومفيش برضوا اى دليل
طيب مين من مصلحته قتل الزوج وفين الجثة؟
لحد ما فى يوم يتم العثور على جثة مراد فى أرضه مضروب بالفاس على الراس ضربة واحدة ويتم عمل التحريات وتفتيش بيته وبيجدوا خطاب موجه للشرطة باتهام فردوس بقتل زوجها.. يبقا هو اللى بعت الجواب الأول.. طيب مين اللى قتله
فردوس فتاة جميلة كل شباب القرية كانوا عاوزين يتزوجوا منها.. هى كانت معجبه بشاب من القرية ونفسها تتزوج منه.. الشاب كلمها وراح طلب ايدها وابوها رفضه
ليه يا أبا؟
ده شاب فقير كحيان وانا عاوز لك عريس غنى وعنده ارض
وزمان كانت كلمة الاب محدش يقدر يخالفها وسكتت فردوس وكتمت حبها. .. الشاب لما يأس سافر وترك القرية وفردوس حزنت عليه.. واتقدم لها إبراهيم اكبر منها بعشرين سنة عنده ارض وفلوس وابوها على طول وافق وفى خلال شهر كانت في بيته ولقيته انسان بخيل بيستخسر فيها حتى المشاعر لو تعب مبيرحش لدكتور وأكتر شئ يزعله فى الدنيا ان قرش يخرج من جيبه
فى مرة اخوه طلب منه خمسة جنيه سلف
طلع الخمسة جنيه وفضل اسبوع متضايق لغاية ما ابن اخوه جاب الخمسة جنيه
ابويا بيقولك متشكرين
مسك الطفل من ودنه جامد
قول لابوك اوعا تستلف حاجة تانية من عمى الخمسة جنيه خوتها بقالهم اسبوع زعلانين عشانها
فردوس كل شوية تغضب عند ابوها وابوها يجبرها ترجع بيت جوزها
تغضبى انتى عاوزة اهل البلد ياكلوا وشى قومى روحى بيتك
وترجع فردوس وجوها قهر
إبراهيم كان بيشتكى من معدته والناس تقوله روح اكشف
اكشف؟؟ والدكتور يقولى تحليل وعلاج
انا هروح اخللى فردوس تعملى كوباية حلبة عليها حتة جلة وهبقا زى الحصان
وفضل الحال ده شهر تعبان ومش راضي يكشف لحد ما مات. . الصراحة الناس كلها كانت فرحانه بموته.. واحد بخيل