اسكريبت بيت الرعب كتابة حماده هيكل
شغلانه سهله وبسيطه انت هتضغط على الكام زرار دول
يولعوا ويطفوا النور ويعملوا شوية أصوات مخيفه
والناس تخاف وتقضي وقت مثير والجيم يخلص
تمام متقلقش فهمت الليلة
انت اول يوم ليك هنا في الشغل وانا عايزك تطول رقبتي
متقلقش يا أبو الصحاب بيت رعب ايه بس
دا انا شوفت واشتغلت في بلاوي زرقا اكتر من كدا بكتير
انا عمر شاب زي كتير من الشباب مش لاقي شغل
بتنقل كل شوية من شغلانه للتانيه ..لغاية ما ربنا
بعتلي الشغلانه دي واحد صاحبي عرضها عليا
المرتب 1500 جنيه والشغل 6 ساعات
من 6 المغرب ل 12 بالليل ودا اخر معاد لمدينة الملاهي
ناس كتير بتيجي مع ولادهم وصحابهم
يقضوا يوم جميل ويستمتعوا بالألعاب
قليلين اللي بيحبوا يدخلوا بيت الرعب ..اكتر مكان
مفيش عليه ضغط عكس باقي الالعاب
ودا كان أفضل حاجة عشان مش عاوز وجع دماغ
وكدا كدا مرتبي شغال
فات أسبوع والتاني وكان الأقبال عادي على اللعبه
لغاية ما في يوم لقيت راجل جاي هو ومراته
وولادهم واخوه وأسرته واخته وولادها
وقرروا يدخلوا بيت الرعب ..قولتله أن اللعبه
ممكن متناسبش الأطفال الصغيرين لان فيها مؤثرات
والعاب وعرايس بتتحرك فجأة
قالي لا متقلقش ولادي جربوها قبل كدا وعارفينها
وبعدين دول يخوفوا الجن يا أستاذ.
اللي تشوفه حضرتك
كانوا فوق ال 20 فرد دخلوا مع بعض
وابتديت انا اشغل المؤثرات
واشتغل جوه صوت الجري والصريخ
والضحك
أكتر من تلت ساعة وبعدها
الجيم خلص والأسرة خرجت
في منهم المبسوط واللي مفزوع
واللي باين عليه اللامبالاه وكأنه مدخلش أصلا
الساعه كانت حوالي ١٢ الا ربع لما لقيت
بنت صغيرة سنها ميتعداش ال9 سنين بتشدني من إيدي وبتقولي
لو سمحت يا عمو
خير يا حبيبتي مالك بتعيطي ليه
أختي هند مش لاقيينها ..ضاعت مننا
وكلنا بندور عليها ..ماما قالت لي روحي شوفيها
عند بيت الرعب ..احنا العيلة اللي كنا عندك من شوية
اه هي كانت معاكم جوه يعني
ايوه بس مش عارفين خرجت من جوه معانا ولا لأ
باقي العيلة بيدوا عليها في اماكن تانية
ممكن حضرتك تسمح لي أدخل أدور عليها
بس انتي لسه صغيرة ..خليكي انا هدخل أشوفها
لا انا عايزه أجي معاك ..معلش
طيب تعالي معايا
دخلنا جوه ..المكان كان عبارة عن ممر طويل
وفيه على الجانبين عرايس شكلها مخيف وهياكل عظمية
والحيطان عليها رسومات مرعبة ومتلطخه
بزيت يشبه الدم ..وفي ممر جانبي ع اليمين والشمال
طول الواحد منهم 5 أمتار واصلين لبعض وبيطلعوا في اخرهم على الممر الرئيسي
ادخلي انتي من هنا يا شاطرة وانا هدخل من هنا
واللي يلاقيها ياخدها وينده التاني
ماشي يا عمو
دخلت الممر اللي على شمالي وهي دخلت التاني
الاضاءه شغالة تنور وتطفي .. وفي عرايس وتماثيل
كنت بدور وراها لتكون البنت مستخبيه ولا واقعه ورا واحد منهم ..وانا بدور فجأة سمعت
الحقني يا عمو ..جريت بسرعه عليها عشان أشوف مالها
ولما وصلت لقيتها أختفت
انتي فين ؟؟
انتي هنا
روحتي فين طيب ؟
مفيش صوت ..سكون تام..الساعه كانت 11:59
لما بصيت لساعتي واول ما وصلت 12 حسيت
بحاجة بتنقط عليا ..حطيت ايدي ومسحت النقط
وببص لقيتها نقط دم ..بصيت بسرعه لفوق
لقيت البنت اللي كانت معايا ضهرها في السقف
وباصه ليا وعيونها مقلوبة ..لونهم ابيض تماما
وفي دم بينزف من وشها
الكلام خرج مني بصعوبة وأنا بقول
هو ايه اللي حصل ا..
وفجأة لقيتها نزلت من فوق عليا
وقعت على الأرض وهي فوق مني ..شلت حركتي تماما
وبعدها فضلت تقرب مني بهدوء
وانا هموت من الرعب ..وبعدها سمعت صوت
صاحبي بينده عليا من بره
عمر ..انت جوه يا بني ؟
الساعه عدت 12 ..ياعمر !
كنت بحاول أرد عليه ..بس لقيتها كتمت نفسي
سمعت صوته بيقول لحد معاه
يمكن دخل الحمام ؟
طيب تعالى نشوفه ..وبعدوا عن المكان
كانت هي بتبص وراها متوقعه انهم هيدخلوا
بس لما مشيوا ..وقفت ومدت إيدها عشان تساعدني أقف
ذقيت إيدها ووقفت ..انتي مين وعايزه ايه
قالت بصوت مخيف
انا خدعتك عشان تدخل معايا
يعني اختك مش جوه زي ما بتقولي
لا ؟
طيب عايزه مني ايه
عايزه ألعب شوية
وقت اللعب خلص والمكان بيقفل
تعالي بكره
صرخت بصوت عالي ومخبف
عايزه العاااااااااب ..فجأة قوة صوتها
دفعتني عدة أمتار من مكاني
واتخبطت في الحيط ..
وقفت بصعوبة وانا حاسس بالام في ضهري
طيب يا شاطرة هنلعب ..
انا هخرج اشغلك اللعبة من برة وانتي العبي براحتك
لا انت هتلعب معايا ..واللعبة انا هشغلها من هنا
من هنا أزاي ؟
كدا ...
فجأة العرايس فضلت تتحرك من مكانها
والأنوار فضلت تهتز بشكل جنوني
لكن الألعاب أتحركت بالفعل من اماكنها
وفضلت تقرب مني ..وفي منهم لعبة
لخيال مآته لابس جلابيه عليها بقع دم
وماسك في ايده فاس ..قرب مني أكتر
وانا بحاول أهرب منه ..والبنت بتضحك
الالعاب ضيقت حصارها عليا
وبقيت مش عارف أتحرك ووقعت ..وخيال المآته
رفع الفاس وكان هينزل بيه فوق راسي ..غمضت عيوني
صرخت بصوت عالي ..زي المجنون
وبعدها سمعت صوت صاحبي بيقولي
عمر ..انت كويس .عمر مالك
فتحت عيوني لقيت كل حاجه رجعت لطبيعتها
وصاحبي كان واقف قدامي ..ساعدني ع الوقوف
وسندني عشان أخرج بره
هو ايه الي حصل انا ندهت عليك ومردتش عليا
دورا عليك في كل مكان حتى في الحمامات
فرجعت هنا تاني وقررت ادخل اشوفك
لقيتك واقع ع الأرض وبتصرخ
حكيت له اللي حصل
لقيته ضحك وقالي
هي عملتها فيك
هي مين ؟
البنت الصغيرة ؟
بنت مين
من كان سنه في بنت صغيرة نفس مواصفات وشكل
البنت اللي انت قولتلي عنها دي
وقعت من فوق لعبة وماتت ..ومن ساعتها
وروحها بتطلع مرة كل سنه
في نفس يوم وفاتها ..وبتحاول تجرب كل الالعاب
وانت
انا نسيت .وكمان متوقعتش انها ممكن تفكر
تجرب بيت الرعب
انا مش عارف لو مكنتش وصلت في اللحظة الأخيرة
كان ممكن يحصلي ايه
يلا الحمدلله عدت على خير
تمت
بيت الرعب
حماده هيكل
