قصة مريم
في الوقت ده كنت مغمضة عيني وإيدي بترتعش ومن قدامي ربنا خايفة أقابله وأقوله إني انت. حرت بسبب فشلي في حياتي ومن ورايا دنيا فيها ناس قاسية عليا لمجرد إن ربنا خلقني مختلفة عنهم.
وانا واقفة ما بين الإتنين ومستنية أقرر هاخد الخطوة لقدام ولا
ل ورا ! .
واحد زائد خمسة يساوي كام يا مريم
بصيتله وأنا خايفة وفضلت ساكتة.
ما تردي يابنتي ده الطفل اللي في حضانة بيفهم أكتر منك.
فضلت أفكر فترة كبيرة وأهز في راسي وقلت
واحد زائد خمسة يساوي أربعة.
بصلي وهو غضبان وعينه حمرا وراح ضاربني جامد بالقلم علي وشي والنضارة وقعت وسناني جابت دم.
اطلعي برا يا غبية وماتجيش الدرس عندي تاني.
في اللحظة دي صحابي بصوا عليا وفضلوا يضحكوا ويقولوا
يا مريم يا غبية يا مريم يا غبية خدت شنطتي بسرعة وطلعت أجري علي البيت.
فضلت أكتر من ساعة في أوضتي بعيط وأول ما ماما دخلت عليا جت جري ناحيتي وقالت
بتعيطي ليه يا حبيبتي
المدرس ضربني وطردني يا ماما.
ضربك وطردك !! ليه بس كدة يا حبيبتي
بصيت للأرض وقلت
علشان قالي مسألة صعبة في الحساب وماعرفتش الإجابة وصحابي فضلوا يضحكوا عليا ويقولولي يا غبية وأنا مش غبية وهما اللي أغبيا كلهم.
هو سألك في ايه
قالي خمسة زائد واحد يساوي كام وقولتله يساوي أربعة.
ماما بصتلي وهي زعلانة وحطت إيدها علي كتفي
لا يا حبيبتي انتي مش غبية أنا هوديكي لمدرس أحسن منه.
وباست راسي وسابتني ودخلت لبابا
بقولك يا عمرو.
نعم يا إجلال!
بنتنا دلوقتي عندها ١٠ سنين ومش عارفة
حبيبتي هي دلوقتي بتمر بظروف صعبة ولازم نقف جمبها ومانحسسهاش بحاجة.
طب أبوس إيدك دخلها مدرسة خاصة مش عاوزاها تحس إنها تعبانة أو أقل من حد خليها تتعامل مع مدرسين فاهمين حالتها كويس وتكون وسط ناس شبهها.
وأنا واقفة جمب الباب سامعة كل حاجة ف زقيت الباب ودخلت
بابا هو أنا صحيح ربنا خلقني غبية
أمي حطت إيدها علي بؤها وكتمت صوت العياط
لا يا حبيبتي ربنا عمره ما يخلق حد غبي ليه بتقولي كدة!
أمال بتاخدني وتوديني لدكتور كل شوية ليه طالما أنا ذكية!
وليه المدرس ضربني وطردني
وليه كل صحابي بيضحكوا عليا وعلي نضارتي ويقولولي يا غبية!
أبويا قرب مني وأخدني في حضنه وقالي أنتي كويسة يا حبيبتي وماتقلقيش أنا وماما جمبك وهخليكي تبعدي عن الناس الوحشة دي وتروحي مدرسة حلوة علشان أنتي ذكية ومش زيهم.
ساعتها حسيت ب أمان وفرحت إني هبعد عنهم وهيبطلوا يتريقوا عليا.
عدا أسبوع وبابا قدملي في مدرسة خاصة ولبست اللبس بتاع المدرسة كان جديد وشكله حلو أوي عليا وماما عملتلي ضفاير في شعري قبل ما أنزل.
أول ما وصلت المدرسة فضلت اقرأ في الاسم بتاعها بصعوبة لحد ما عرفت إن اسمها الأمل لذوي الاحتياجات الخاصة.
فسبت إيد بابا ووقفت قدامه وقلت
هو يعني ايه احتياجات خاصة!
يعني الناس الذكية اللي زيك.
ضحكت وقلتله
أيوة أنا ذكية.
أول ما دخلت الفصل لاقيت مدرس حساب وبعد كدة دخل كذا مدرس مافهمتش منهم أي حاجة لحد ما جه مدرس حلو وقمر في آخر حصة.
بصلي وقال
باين عليكي جديدة اسمك ايه بقي.
اسمي مريم.
طب يا مريم أنا اسمي هشام مدرس الرسم بتاعك طلعي بقي ورقة وقلم وارسمي أي حاجة تيجي في دماغك عاوز أشوف شطارتك يا قمر.
كلامه كان حلو وحسيت إنه مش وحش زي باقي الناس
حاضر يا أستاذ هشام.
طلعت ورقة وقلم رصاص وكل شوية أبصله ألاقيه باصص عليا وبيضحكلي وأنا بضحكله.
أنا خلصت.
يااااه بالسرعة دي ده انتي ماكملتيش ٥ دقايق.
أيوة ورسمتك كمان علشان أنت طيب وماقولتليش يا غبية زي باقي الناس.
هي الناس بتقول عليكي غبية!!!
أيوة كلهم وحشين وبيقولوا عليا غبية وأنا جيت مدرسة الناس الذكية علشان أبقي ذكية زيهم.
بصلي وضحك
لا يا حبيبتي أنتي ذكية وريني بقي رسمتيني ازاي.
أتفضل.
مسك الورقة وفضل باصصلها كتير ويبصلي تاني ويرجع يبصلها.
خليكي هنا يا مريم دقيقة وراجعلك.
ماشي.
مشي ورجع بعد شوية ومعاه راجل كبير لابس بدلة وشاور عليا وقال
هي دي مريم يا سيادة المدير اللي راسمة الصورة أنت متخيل طالبة في السن ده قدرت ترسم صورة شبهي تماما مايعرفش يرسمها فنان عنده ٥٠ سنة وفي ٥ دقايق بس!!!!
مدير المدرسة بصلي وقال
ممكن أقعد قدامك وترسميني يا مريم
هزيت راسي وقلت
أيوة ممكن.
فضلت مركزة في وشه ٣٠ ثانية وبعد كدة مابصتلوش تاني وبدأت أرسمه وبعد ٤ دقايق
اتفضل.
مسك الورقة وقلع نضارته وقال
مسحتييييييل!! أقسم بالله مستحيل.
بسم الله ما شاء الله عليكي رسمتيني وانتي مابصيتيش عليا غير مرة واحدة بس!!!!!
أيوة انا بعرف أرسم حلو اوي
أنتي عبقرية مش ذكية وبس ربنا يحميكي يا بنتي.
المدير مشي ومدرس الرسم فضل معايا
مين اللي هييجي ياخدك علشان تروحي يا مريم
بابا هيجيلي.
طيب عاوز اشوفه علشان أقوله إنه بنته أحسن واحدة بترسم في الدنيا.
حطيت إيدي علي عيني وضحكت
بعد ربع ساعة بابا جالي علي الفصل.
هو ده بابا يا مريم
أيوة.
ممكن كلمتين لوحدنا بعد إذنك!
اتفضل.
هي مريم مالها أول مادخلت قالت أنا ذكية ومش غبية.
بابا بص للأرض وهو زعلان وقال
مريم عندها توحد يابني وبيجيلها انهيار عصبي كتير والدكتور قال مع الوقت والمعاملة الكويسة حالتها هتتحسن.
توحد
أه يابني.
طب شوفت ميسي لاعب الكورة يا حاج!
أيوة ماله
هو دلوقتي أحسن لاعب في العالم كان عنده توحد برضو التوحد أصلا عبارة إن شغفك كله بيكون في حاجة واحدة وبتبدع فيها وبنتك شغفها كله في الرسم تكاد تكون عبقرية في الرسم كمان بس محتاجة شوية تدريبات وإننا نفضل جمبها ونشجعها.
طب هي عندك أهي الله يباركلك راعي ربنا فيها واعتبرها بنتك ولو احتجت مني أي حاجة أنا عيني ليك.
مريم في عيني يا حاج ربنا يباركلك فيها.
الأستاذ هشام باسني من راسي وقالي إنك هتكوني حاجة كبيرة اوي يا مريم في اللحظة دي بدأت أحب الدنيا وعرفت إن مش كل البشر وحشين فيه ناس بتحبنا زي ما إحنا بعيوبنا قبل مميزاتنا بتؤمن بينا في عجزنا وتشجعنا.
والسنة تجيب سنة وأنا بكبر وبتعلم علي إيده كان بيقعد معايا كل يوم بعد المدرسة يشرحلي كل المواد وعمره ما زهق مني
أنا خايفة اوي ماجبش مجموع كلية فنون جميلة.
