في المحكمه

الخميس 12/يونيو/2025 - 08:45 م

= بس أنا مش طالبة منِك غير العدل يا سيادة القاضي.
"قاعة المحكمة غلب عليها الصمت، ولما السكون يكون هو المُسيطر على المكان خليك مُتأكد إن كلمة الحق هي اللي بتتقال"
- والعدل بالنسبالك هو إيه!
" بصيت لعيون الأم اللى ورايا اللي كسرتها الأيام وهي حاضنة بنتها الطفلة وقُلت:
= الإعــدام.
"بس ثواني، وقبل ما الحيوان اللي جوا القفص ده يموت.
جاهزين أحكيلكُم عُمر كامل وبالتحديد لما كانت الطفلة دي لسه بِنت بنوت!"

- بس أنا إيه اللي يخليني أقبلك تشتغلي معايا شُغلانة زي دي وبالذات يعني إنك بِنت!
"فكرت كام ثانية ومالقِتش إجابة مُقنعة أكتر من إني أقول الحقيقة"
= أنا البنت الكبيرة، والدي ووالدتي مُنفصلين، هو إتجوز وعاش حياته وتقريبًا نسينا أصلًا، وماما مِن كُتر مال الجوع نهش في قلبها مالقتش حل غير إنها تتجوز وتِتسِتر وحد يصرف عليها، وفضلت في وش الزمن أنا وإتنين اخواتي توأم صُغيرين، ساعتها ماكنش فيه غير حل مِن الإتنين، يا أبيع نفسي، يا أعيشها بالحلال وأشتغل أي حاجة تقابِلني في طريقي، على فكرة أنا مش صغيرة أنا طالبة في كُلية الحقوق والأولي

على دُفعتي ٣ سنين بس دي حكمة ربنا.

" صاحب الشُغل فِضِل ساكت وقت كبير بعد ما خلصت كلامي وهو باصص مستغرب وماكنش لاقي أي رد لحد ما قال:
- بس أنتِ عارفة يعني إيه تشتغلي في مطعم توصلي طلبات لبيوت الناس، وبالذات لو كان مُعظم الزباين رجالة وأكيد فيهم اللي عايش لوحده!!
= بس أنا ربنا هيحفظني، مش كدة ولا إيه!
- توعديني وعد يا أمينة!!
= إيه هو؟
- تخلي بالك مِن نفسك.
= أوعدك.

"وفعلًا بدأت أشتغل في الدليڤري، وأوصل طلبات لبيوت الناس، مش غريبة إنك تشوف بنت في الشارع راكبة عجلة أو موتوسيكل وماشية بأقصى سُرعتها علشان تجيب أكبر دخل مادي يعيشها هي وإخواتها، ومش غريية إنك تلاقيها لحد دلوقتي مُتمسكة بتعليمها وإخواتها لإنها واثقة في عوض ربنا، بس الغريب فعلًا لما تُبُصلها بـ استحقار وتعاملها على أساس إنها راجل وإنها إزاي بنت وبتعمل كُل ده."
وفِضلت مكمّلة شهور ما بين الشغل وشُغل البيت واهتمامي بـ إخواتي والدراسة، لحد ما جه اليوم اللي غير منظوري عن الدنيا وألوانها وحياتي إتقلبت.
في اليوم ده لاقيت محمود أخويا الصغير جاي جري على مكان الشُغل وهو

وشه شاحب وجسمه مليان عرق والدموع بتنفجر من عيونه زي الشلال.
- أمينة أختي، إلحقي سمر.
" قلبي إتقبض من منظره وكلامُه"
= مالها سمر!!
- سمر نايمة، بصحيها مابتصحاش، إيديها بردانة ووشها وجسمها كُله.
" بقلب أم ملهوفة على بنتها ركبت الموتوسيكل وبكُل سُرعتي روحت ناحية البيت، في اللحظة دي كإن مافيش ناس حواليا في الشارع وماشية بسُرعة كبيرة أوي، لحد ما وصلت ولاقيت نبضات قلبها ضعيفة جدًا وجسمها بارد زي التلج، خدتها بين إيدي وطلعت بيها جري على أقرب مُستشفي وللأسف كان مُستشفي خاص، دخلت الطواريء فورًا وأنا واقفة لا حول ليا ولا قوة، مش عارفة أعمل إيه ولا أكلم مين واستغيث بيه، ما أنا ماليش حد غير ربنا، وقعت على الأرض مُنهارة وفضلت أدعيه وبس، وأعرفُه إني مش مقصرة معاهم وبعمل كل ده علشانهم، لحد ما الدكتور خرج وقال:
- محتاجة كيسين دم، سعر الكيس ٦٠٠ جنية، أختي عندها نزيف داخلي ولازم عملية لتوقيف النزيف ده حالًا.
= بس أنا ماعييش سعر الدم ده دلوقتي.
- إنزلي تحت في الخزنة وإمضي وأبصمي علي سعرهم هما والعملية ولما تقوم بالسلامة ابقي إدفعي.
" نزيف!

! جالها إزاي بس! لا حول ولا قوة إلا بالله، جريت على الخزنة ولاقيت نفسي بمضي علي مبلغ ٣٠ ألف جنية سعر العملية والدم، ماكُنتش عارفة هدفعهم إزاي، بس ماعنديش حل تاني.
"ولما الفقر يكون هلك القلوب جوع، في اللحظة دي مُمكن تعمل أي حاجة في الدنيا، حتي لو هتبيع حتة مِنك علشان حد بتحبه".
ولما طلعت تاني أخويا حكالي إني لما اتأخرت امبارح في الشغل كانت وقعت وقعة شديدة ومِن التعب والوجع نامت، وأنا رجعت تعبانة فلاقيتهم نايمين فمارضِتش أصحيهم.

وبعد العملية أختي قامت بالسلامة بس الدكتور قال إنها هتفضل محجوزة كام يوم لحد ما حالتها تستقر، فوصيت عليها المُمرضة وعرفتها ظروفي وإني مش هقدر أكون موجودة علشان أقدر أجيبلها المبلغ ده، ويشهد ربنا إنها سندتني وشالت أختي جوا عيونها.

ولأول مرة في حياتي، هشتغل نهار وليل علشان أقدر أجيب أي جزء من المبلغ ده لحد ما ربنا يفرجها، بقيت أوصل الطلبات وأنا عيوني دبلانة، قلبي مكسور على كُل اللي بيحصل، مش عارفة أروح فين ولا أطلُب من مين، أنا وإخواتي وكل اللي زينا ضحية مُجتمع عقيم وذنبنا في رقبة كل راجل وست إتجوزا،

ونسيوا شرع ربنا وحق ولادهم عليهم.