رحت ألمع الخاتم بتاع جوازي قبل عيد جوازي العاشر لميا شاهين

ازاي اكتشفت إن خاتم جوازي سعره 3 دولار؟؟

تقول صاحبة القصة:

رحت ألمع الخاتم بتاع جوازي قبل عيد جوازي العاشر.. الجواهرجي أول ما مسك الخاتم قعد يضحك.. كان ماسك خاتمي ورافعة قدام الضوء.. وقالي "ده اكسسوار يا مدام.. ستانلس وحجارة ازاز.. أنا متأكد إن المول فيه خواتم أفضل من ده وبـ 8 دولار"

وقفت ف مكاني وانا حاسه إني مغفله وهو بيشرح لي ازاي اللون الدهبي ده رش على الاستانلس والماسه ال2 قيراط كانت من الإزاز اللي بيستخدموه ف تيجان الأطفال.. كنت صعبانه على الراجل لدرجة إنه مأخدش مني فلوس الفحص..

جوزي رايان من عيله غنية.. عيلته غنيه أوي.. امه عندها صندوق ائتماني كبير.. وأبوه قاضي فيدرالي.. فرحنا اتكلف 300 ألف دولار.. البدلة الأرماني اللي رايان لبسها لوحدها كانت ب 30 ألف دولار.. ف إني اكتشف إنه اداني خاتم ب3 دولار دي حاجة مش منطقية..

قررت إني مقولش أي حاجة ف الأول.. روحت البيت وجبت صور الفرح اتفرج عليها.. شوفت الخاتم الماس اللي اتصمم مخصوص عشاني ف كارتييه.. واللي دلوقتي عارفه إن سعره أقل من سندوتش..

نفس الليلة على العشا قولت لرايان "انا بفكر أروح ألمع الخاتم بتاعي".. رايان مرفعش عينه من تليفونه.. وقالي "تمام.. تمام.. أكيد انطفى بعد كل السنين دي".. كان بيتكلم عادي.. لا شعور بالذنب والا توتر.

. والا أي حاجة..

بدأت أركز ف حاجات تانية.. الأسورة اللي ادهالي هديه ف الكريسماس.. الماس اللي فيها بيسيب علامات على الورق..

الشنطة البراند اللي اشتراهالي ف عيد ميلادي.. مكتوب عليها اسم البراند غلط على بطانة الشنطه..

العقد اللؤلؤ اللي جابهولي في عيد جوازنا التالت.. بيتحلل لما بيجي عليه كحول..

كل هدية أخدتها من جوزي الغني اتضح إنها مزيفه.. أخيرًا مقدرتش امسك نفسي وروحت بيت أهله لما كان ف الشغل..

أمه مارجرت كانت ف البيت بتخطط لحفلة خيرية من حفلاتها.. وريتها الخاتم.. وشرحت لها اللي قاله الجواهرجي..

ضحكت جامد جدًا لدرجة إنها وقعت اللاب توب من على رجلها.. وقالت "يا حبيبتي رايان معندوش فلوس خالص.. احنا حرمناه من فلوسنا قبل ما يقابلك ب6 سنين"

كنت مصدومة وقولت لها "بس الفرح؟"

قاطعتني وقالت "احنا دفعنا تكاليف الفرح.. عشان احنا كنا عايزين صور لحملة الانتخابات اللي كان داخلها حماكي أبو رايان.. بس رايان ده مفلس ومحلتوش حاجة من ساعة ما خسر تالت مشروع يبدأه.. واحنا قررنا نحرمه من فلوسنا لحد ما يتعلم يتحمل المسؤولية.. لأنه عمره ما هيتعلم طول ما احنا بندفع تمن فشله"

مارجرت شرحت لي إن رايان بقاله مده طويلة جدًا بيمثل إنه غني.. حتى من قبل ما يعرفني.. بيأجر بدل براندات للمواعيد اللي كان بيروحها.

. وبيأجر ساعات برده.. وبيستخدم العضوية بتاعة أهله ف النادي عشان يبان غني قدام الناس..

لما اتخطبنا رايان كان مرعوب بخصوص الخاتم.. وماكنش فاكر إني ممكن أشك فيه والا أروح أتأكد..

قولت لمارجرت "بس هو بيشتغل ف شركة محاماة كبيرة؟"

قالت لي "ده مساعد قانوني.. يعني ماسك الدفاتر.. لكن هو بيقول لكل الناس إنه شريك ف الشركة.. لكن أقصى حاجة بيعملها إنه بيصنف الملفات وبيقبض 35 ألف دولار ف السنة"

رجعت البيت وانا حاسه بالدوخه.. جوازنا كله كان عبارة عن تمثيلية.. هو عامل فيها غني وانا عامله نفسي متجوزتهوش عشان فلوسه.. وخليني صادقة.. أنا كنت جزء ف التمثيلية دي.. احنا الاتنين كنا نصابين.. ونصبنا على بعض..

لما واجهت رايان.. انهار تمامًا وقالي إنه كان بياخد سلف وقروض عشان يقدر يكمل الصورة.. الرحلة بتاعة سانتوريني استهلكت كل الكريديت بتاعنا.. المطاعم الغالية اللي كان بيعشيني فيها كان بيحوش لها من أسابيع بيفوت فيها الغدا ف الشغل عشان يقدر يدفعها..

كان مرعوب إني لو عرفت إنه فقير أمشي واسيبه.. وعشان كده فضل مستمر ف كل الكدب والتمثيل بتاعه..

قولت له "بس أنا كمان مش غنية.. انا اخصائية مكتبة ف مدرسة عامة"

قالي بحزن "انا عارف.. بس انتي عمرك ما كذبتي ف أي حاجة تخصك.."

قعدنا يومها ف شقتنا.. واللي دلوقتي أدركت

إنها باسم أبوه وامه.. حوالينا عفش بالتقسيط وحاجات فخمة بس كلها مزيفه.. احنا الاتنين حاسين إننا مغفلين..

بعدها رايان بدأ يضحك.. وقالي "لسه فاكر وشك لما جبتي لي الخاتم اللي حوشتي عشانه 8 شهور وانا اديتك الخاتم اللي جبته من بارتي سيتي"

قولت له "بارتي سيتي مش بيبيع خواتم"

قالي "صح.. انتي صح.. هو الخاتم بصراحة كان ف ماكينه ماستيكه ف بارتي سيتي.. كنت مضطر اشرتي 17 مستيكه عشان أوصل لأكتر خاتم شكله حقيقي"

بصراحة قررنا نكمل مع بعض.. مش بس عشان الطلاق غالي.. واحنا الاتنين مفلسين.. بس عشان احنا الاتنين اكتشفنا إن بمجرد ما كل الكدب والتمثيل اتكشف احنا لسه حابين بعض..

بيعنا الساعات المزيفة بتاعة رايان على فيسبوك.. وكتبنا عليها بكل صدق إنها تقليد.. وبفلوس الساعات روحنا رحلة لفيجاس..

أهله لسه فاكرين إننا هنتطلق بعد ما أنا عرفت كل حاجة.. سيبناهم فاكرين إننا هنتطلق لأننا كنا عارفين إنه هيصعب على أمه وتبعت له فلوس واحنا محتاجين الفلوس..

أنا لسه لابسه الخاتم اللي بـ 3 دولار.. رايان عرض عليا يشتري لي واحد حقيقي لما يقبض الأرباح بتاعته من شغله.. بس بصراحة الخاتم ده هو أكتر حاجة كانت صادقة في جوازنا كله..

كمان لو ضاع مني ف أي وقت.. ممكن ابدله بأي واحد من الخواتم التانية اللي كسبها في ماكنه المستيكه.

. كان لسه معاه 10 خواتم تانيين...

#احاديث_تيكتوكيه
#LamiaaShaheen