أنا راجل متجوز علاقتي بحماتي دايمًا كانت غريبة ومتوترة

الخميس 06/نوفمبر/2025 - 05:22 م

أنا راجل متجوز و علاقتي بحماتي دايما كانت غريبة ومتوترة. هي ماكانتش عايزة بنتها المدلعة تسيب البيت وتكون بيت وأسرة فكانت بتحاول تربط مراتي بيها بأي طريقة وتستخدم كل الحيل عشان تفضل قريبة منها.
أوقات بتمثل إنها تعبانة تدخل في حياتنا وتعملنا مشاكل تحجز فجأة رحلة من غير مانكون عاملين حسابنا ولازم نروح معاها والمشكلة أن مراتي ولا مرة لغاية قريب فهمت إن اللي أمها بتعمله ده غلط.
من حوالي 6 شهور حماتي وحمايا اشتروا بيت جديد أصغر علشان ماكانوش محتاجين المساحة الكبيرة في بيتهم القديم. عادي الموضوع مايخصنيش وماكنش فارق معايا. بس المشكلة أن حماتي فضلت تزن علي مراتي علشان نتشتري منهم البيت القديم مراتي اقتنعت وقالتلي كده أحسن علشان نرتاح من الأيجار اللي بندفعه كل شهر.
الحقيقة أنا كنت ضد الموضوع ده تماما.

اولا لأن البيت قريب جدا منهم حوالي نص ساعة مشي وكمان السعر اللي طلبوه 450 ألف ماكانش مناسب لحالة البيت أصلا.
المهم مراتي اتضايقت جدا إني مش عايز اشتري البيت وفضلت تزن عليا وفي الآخر أنا استسلمت وقلت ماشي. وخلاص البيت دلوقتي بتاعنا رسمي.
للعلم إحنا استلمنا المفاتيح والأوراق وكل حاجة باسمنا. مافيش أي حاجة لسه باسمهم.
بعد كده بدأت ألاحظ حاجات غريبة كل مرة نسيب البيت 8 ساعات أو أكتر أو نسافر كام يوم ونرجع أحس إن كان في حد جوه البيت. يعني الاقي حاجتي منقوله من مكانها. كذا مرة دخلت لقيت ريحة غاز كإن حد استخدم البوتجاز وكمان حوض الحمام كان مبلول وده دليل أن في حد استخدمة قريب.
حتى مراتي استغربت وبعد موضوع الغاز قلقت جدا. فقلت أكيد حماتي لسه معاها مفتاح من غير ما نعرف وبتدخل تفتش في حاجاتنا.
علشان

أتأكد اشتريت كاميرتين وركبتهم عشان أقدر أشوف المدخل والريسبشن وكمان غيرت الكوالين كلها وجبت أبواب جديدة مؤمنة كويس وكمان عملت تأمين للشبابيك.
بعد يومين من كل التغييرات دي جاتلي رسالة من حماتي بتقولي إني إنسان شرير وبخرب كل حاجة هي بتحبها وإنها عايزة البيت يرجعلها تاني لأنها مش قادرة تستحمل الطريقة اللي بنتعامل بيها مع بيتها القديم.
سألتها ليه الكلام ده فجأة
قالتلي إنتو بتخربوا بيتنا القديم الباب اللي انتوا غيرتوا ده كان ليه ذكريات غالية ومكانش ينفع تغيروه من غير ما تسألوني الأول.
قلت لها إن البيت ده مبقاش بتاعها خلاص وإحنا من حقنا نعمل فيه اللي إحنا عايزينه.
سكتت فترة وقولت خلاص ربنا هداها وسابتني في حالي بس فجأة طلعتلي تاني وبتقول إنها عايزة تشتري البيت تاني لأننا مش مؤهلين نبقى أصحاب بيت!

بتقول إنها هتدفعلنا 430 ألف من ال ألف عشان هما صرفوا 20 ألف.
أنا طبعا قلتلها تروح تشرب من البحر وإن البيت بقى ملكنا خلاص.
المصيبة إن البوليس جه عند بابي! تقدر تتخيل شكلي وأنا بشرحلهم إن البيت ده قانونا بتاعي اتصدموا وفضلوا يضحكوا!
والأسوأ أن دلوقتي مراتي بتقولي خلينا نرجع الباب القديم وخلاص!
أنا بجد مش فاهم إزاي مراتي ساكته ومش بتعترض علي كل اللي بيحصل ده! يعني بتدخل بيتنا من غير أذن وعايزة تاخد البيت بأقل من تمنه وجابتلي البوليس وكل ده عادي بالنسبه لمراتي!
أنا بجد بتمني أقطع علاقتي بيها تماما وارتاح من القرف اللي أنا فيه ده.. بس المشكلة في مراتي لازقة في أمها حرفيا.
مبقتش حتى حاسس إني راجل متجوز واحدة ست لأ حاسس إني متجوز مراتي وأمها المجنونة.
حمايا راجل هادي وغالبا هو كمان زهق من جنان

حماتي بس هو ساكت