ساعي البريد كتابة حماده هيكل

ربنا كرمني بمجموع كبير في الثانوي بس ابويا
مات للأسف فاضطريت اني مكملش تعليميواشتغل عشان
أصرف على أمي وأخواتي الصغيرين
اشتغلت كام شغلانه كنت يدوب بقدر أأكل أهلي
وامنع عنهم ذل السؤال والحاجه
كنت راضي بنصيبي وبقول الحمدلله ..ودايما
بترحم على ابويا اللي كان ضهر وسند لينا
ومحسناش بيه الا بعد ما سابنا
بس انا لازم أتحمل المسئولية واصلب طولي
عشان مينفعش امي تمد إيدها للناس ولا تنزل
تخدم في البيوت ..بعد ما كانت معززة مكرمه طول حياتها
في يوم كنت راجع من الشغل هلكان
لقيت امي بتقولي يا واد يا حسين ..جالك جواب
جواب ايه يامه
مش عارفه ثواني واجيبهولك
دا جواب القوة العاملة يا أمه
يا فرح الله ..صبرت ونولت يا ابن عبدالعال
استني بس كدا
خير 
التعيين جاي في محافظة تانية
ومالو روح يابني وشق طريقك
طب واسيبكم ازاي بس
متقلقش أحنا بخير طول مانت بخير ..سافر واطمن
توكلت على الله وسافرت ..اول ما استلمت الشغل في المديريه ..نزلت على المركز اللي اللي فيه مكتب البريد
كنت فاكر اني هشتغل على مكتب وهيبقى ليا وضع ومكانه
بس رئيس المكتب قالي أن هشتغل في الاول
توصيل الجوابات
ساعي بريد !!
وماله الساعي ..هو انت هتتبطر ع النعمه
لا أبدا بس انا
مفيش بس ..دا الشغل المتاح دلوقت
ولو اثبت كفاءة هتترقى ومرتبك هيزيد
انت

هتمسك قرى ونجوع المركز وهتوصل الجوابات للناس
طب وهسكن فين 
دي مش مشكلتي
نزلت ادور على سكن ..بس كل الاماكن هنا غالية
هيضيع اكتر من نص مرتبي عليها
قررت اسكن في قرية تبعد 5 كيلو عن شغلي
اشتريت عجلة عشان اروح بيها الشغل اوفر لي من المواصلات وكمان عشان تساعدني اتنقل بيها
وانا بلف على البيوت عشان اودي الجوابات لاصحابها
كنت ساكن في بيت صغير ..اوضه وحمام
وقدام مني ترعه وشجره مضلله عليا
القعده هنا بترد الروح ..فات شهر وقبضت
دفعت الايجار وخليت جزء ليا اعيش منه
وبعت الباقي لأمي وأخواتي
الحياه هنا هادية والبلد ناسها طيبين وبسطا جدا
كنت بوزع الجوابات ع البيوت وبخلص شغل
قبل العصر
في يوم وقع في إيدي جواب ..معرفتش فين عنوان صاحبه
كان في نفس القرية اللي انا متأجر فيها
سألت كذا واحد ومفيش حد دلني على بيت
صاحب الجواب
غريبة دي هو مش من هنا ولا ايه
لغاية ما ف قابلت ست كبيرة بتبيع جبنه
وقالت لي ايوه بيت سيد أبو دراع
يا ستي اسمه سيد أيوب
ايوه بس الناس هنا عارفاه باسم سيد أبو دراع
محدش يعرف سيد أيوب دا ابدا
طب وهو فين بيته ..
وصفت لي البيت
وروحت هناك ع الوصفه ..البيت كان مطرف
بعيد عن باقي بيوت القرية ..موجود في منطقة
قريبة من جنينة العمدة
وصلت بصعوبة للبيت اللي كان طريقه مدق صغير يا دوب نص متر عرضه
وطوله ممتد لاخر القرية
كان بيت مكون من دورين وقدام منه شجرة لبلاب
مغطيه مدخله ومفرعه على معظم الحيطان
خبطت على الباب كذا مرة ..
ولسه همشي بعد ما فقدت الامل أن في حد موجود
فتحت لي بنت في منتهى الجمال
وقفت متنح وهي بتسالني
مين يا انت يا فندي 
واقف ساكت ومبلم
يا حضرة انت مين وعايز أيه 
احمممم ..ايوه انا ..انا حسنين معتمد
موظف البريد وكنت جايب جواب لعم سيد
أبتسمت وقالت
جواب ..دا أكيد من خالي
هو والدك موجود
اه موجود اتفضل
دخلت جوه واول ما شوفته صعب عليا
راجل كبير في السن وصحته تعبانه
مين يا بنتي
يابا جايب جواب
اهلا يابني اتفضل..هو انت ايه اخرك كدا
معلش اصل سألت كذا حد عن اسمك محدش دلني
ااه عشان مكتوب عليه سيد بيومي
ايوه
بس الناس هنا عارفاني باسم سيد ابودراع
لاني زي مانت شايف كدا
اه الف سلامه ..بس ممكن اعرف دا حصلك أزاي
حصل من عشر سنين من يوم وفاة ام أميرة
بنتي الوحيدة اللي فتحتلك دي
وقتها كنت حزين وحاسس اني انا اللي بقيت يتيم
مش بنتي لانها كانت مش بس مراتي دي امي واختي
وسندي في الدنيا ..مليش غيرها هي واميرة
في يوم كنت مدور المكنه في أرض العمده
وكنا بنسقي الأرض سرحت شوية وانا بفكر 
كوم جلابيتي شبك في موتور المكنه ..ومخدتش بالي
فضلت اشد الجلابية وتروس
المكنه وانا بصرخ على حد ينجدني
ويوقف المكنه لكن كان صوتها اعلى مني ومحدش كان قريب
وبعدها حصل اللي حصل ومن يومها وبقى اسمي سيد ابودراع
اتأثرت جدا من الموقف وقولتله
لا حول ولا قوة الا بالله ..معلش يا عم سيد ربنا يعوض عليك
الحمدلله ربنا عوضني في بنتي أميرة
هي بقت دراعي وسندي في الدنيا شايلة حمل أكبر من سنها 
وهي التي انا عايش بس عشانها ونفسي ومنى عيني
افرح بيها قبل ما اموت ..بس هي اللي رافضه تسيبني
اميرة قالت
بعد الشر عليك يابا يجعل يومي قبل يومك
ربنا يطول في عمرك ويخليك ليا ..وانا هفضل قاعده
على قلبك ومش هسيبك ابدا 
شوفت يابني ربنا عوضني أزاي ..زعلت زمان اني مخلفتش واد يسندني بس انا كنت غلطان عندي أميرة دي احسن من 100 واد
ربنا يخليكم لبعض ياعم سيد ويفرحك بيها
اتفضل اشرب شاي
لا ملوش لزوم
عيب يا بني انت عايز تقول عننا بخلا
لا ازاي ..خلاص هشرب شاي
حسيت براحه نفسيه كبيرة مع الراجل الطيب دا وبنته
الدنيا دي فيها حكاوي كتير وياما البيوت
مخبيه أسرار ورا أبوابها
بقيت كل كام يوم بروح اسأل على عم سيد واطمن عليه
اشوفهم لو محتاجين حاجه
كنت بدور على نصي التاني من زمان
ومش عارف هلاقيها امتى وازاي
لغاية ما القدر جمعني بيها في قرية صغيرة
في محافظة تاني
بعييده عن بلدي
كلمت أهلي وحكيت لهم عنها وحبوها قبل ما يشوفوها
وطلبت إيدها من عم سيد ..والحمدلله وافقوا عليا
لاني مش هلاقي زوجة ولا أم أفضل لأولادي
من وحدة زي أميرة
ساعي البريد
حماده هيكل