مش عارفه اسامح ولا لا
مش عارفة اسامح ولا لاء
أنا بنت عندي 22 سنة وصاحبتي عندها 21 سنة. إحنا أصحاب بقالنا 12 سنة وكنا قريبين جدا من بعض لدرجة إني كنت بشوفها مش مجرد صاحبة لاء كنت بعتبرها أختي الحقيقية. وكنا سند وضهر لبعض.
في يناير 2021 صاحبتي ارتبطت بشاب. هي كانت مبسوطة جدا وبتقول إنه أحسن واحد قابلته في حياتها.
لما قابلته أول مره حاسيت أن شكله كويس وباين عليه لطيف.
نروح لمايو 2021. في الليلة دي كنت خارجة مع أصحابي. ورحنا مكان بنحب نقعد فيه دايما. صاحبتي في اليوم ده ماكنتش معانا. كانت في شغلها.
وأنا هناك بالصدفة لقيت حبيبها وكان قاعد مع اصحابه. وبعد كده جه هو واصحابه وقعدوا معانا شوية.
أنا مكنتش عايزة اسهر وأتأخر علشان عندي شغل الصبح بدري. علشان كده استأذنت وقولتلهم لازم امشي طلبت اوبر وقولتلهم خلاص العربية علي وصول.
حبيب صاحبتي قالي انه هيخرج معايا يوصلني عشان عايز يدخن بره.
خرجنا برة وقعد يتكلم معايا شوية لحد ما العربية توصل. بدأنا نتكلم في مواضيع عادية وبعدين هو جاب سيرة صاحبتي.
أنا قلتله خسارة إنها مقدرتش تيجي معانا انهارده.
في الأول قالي فعلا لكن بعدين قال آه بس لو كانت موجوده ما كناش هنعرف نتكلم مع بعض لوحدنا زي دلوقتي
طريقتة في الكلام ماعجبتنيش وحسيت اني مش مرتاحة. وبصيت في موبايلي عشان أشوف الأوبر وصل فين وعملت نفسي ما سمعتش الكلام اللي قاله.
هو عاد نفس الكلام تاني وقال كمان إنه لو ماكنش مرتبط بصاحبتي كان هيحاول يلفت نظري وأكيد كان هيجري ورايا.
في اللحظة دي اتعصبت وقلتله إن اللي بيعمله ده قلة أدب واحسن له
في الوقت ده كان الاوبر وصل فركبت علي طول.
وأنا في الطريق للبيت بعت لصاحبتي رسالة وقلتلها لازم نتكلم ضروري ولازم تتصل بيا أول ما تخلص شغلها الصبح.
أنا ما قلتلهاش إيه الموضوع لأني حسيت إن الكلام ده مش هينفع في الرسايل. والاحسن اننا نتقابل علشان احكيلها اللي حصل.
تاني يوم الصبح هي شافت الرسالة بس ما اتصلتش بيا.
قررت اتصلت بيها وأول ما ردت عليا كان باين من صوتها إنها زعلانة. سألتها عاملة إيه ردت عليا بالعافية!
قلتلها إني محتاجة أحكي لها على حاجة حصلت امبارح بالليل فردت وقالت عارفة.
طلع إن حبيبها بعت لها رسالة بالليل وقالها إني كنت بحاول أعاكسه. وحسب كلامه كنت بستغل إنه كان مش في وعيه عشان أعاكسه وإني معجبه بيه جدا وهو رفض.
والأسوأ من كده إنه راح الصبح اخدها من شغلها وقالها كلام كدب تاني عن اللي حصل في الليلة دي.
في النهاية صاحبتي فضلت تشتم فيا وبصراحة أنا كمان بدأت أشتمها. وقلتلها إنها غبية عشان صدقت الكلام الأهبل ده لكن كان واضح إنها مش ناوية تسمع أي حاجه مني ولا عايزه تصدقني.
صداقتنا انتهت في اليوم ده وما اتكلمناش من مايو 2021 لحد النهارده مارس 2022.
صاحبتي فجأه اتصلت بيا من رقم جديد لأني كنت عامله حظر لرقمها اعتذرتلي لأنها صدقت الكلام ده. وقالت إن حبيبها وإنها دلوقتي فاهمة إنه كذاب كبير.
اعترفت إن مفيش مبرر للي عملته معايا بس هي وقتها صدقته لأنها كانت بتحبه وفاكرة إنه الشخص المناسب.
كانت بتعيط وهي بتتكلم والحقيقة أنا كنت حاسة بمشاعرها واد ايه هي حزينة.
أنا دلوقتي متلخبطة جدا.
أنا مش عارفة أقرر. لسه بحبها لحد النهارده ومش عارفة هل أوافق أصلح علاقتنا وأديها فرصة تانية
تعديل
أنا عندي شك إنها اتسببتلي في مشاكل مع أصحابنا التانيين. أحنا كان عندنا اصحاب مشتركين ولما حصل الموضوع ده هما بعدوا عني وبقينا نادر لما نتكلم وأنا ماقلتش لحد منهم اللي حصل عشان كنت محرجه من الموضوع كله.
تحديث
وافقت أقابل صاحبتي القديمة في كافيه. الجو بينا كان متوتر جدا ومحرج.
هي بدأت تعتذر عن اللي عملته وقالت إنها بتتمني لو تقدر ترجع بالزمن وتغير كل حاجة.
أنا قلتلها أد إيه هي جرحتني وأد إيه حسيت بالخذلان والإحباط. وأكتر حاجة وجعتني إنها حتى ما ادتنيش فرصة أقول وجهة نظري في اللي حصل وأدافع عن نفسي.
قالتلي إنها كانت شاكة من شهور إنه ممكن يكون كذب عليها بس ماكنتش متأكدة.
سألتها ليه ما حاولتش من شهور تكلمني وتسألني قالت إنها ما كانتش متأكدة ومش عارفة تصدق مين فينا.
قولتلها وايه اللي خلاكي متأكده دلوقتي
قالتلي انها لما عرفت بموضوع قررت تسيبه وقتها سألته لو كدب عليها في موضوعي وهو اعترف وقالها انها غبيه عشان صدقته!!
سألتها علي موضوع اصحابنا المشتركين وهي قالتلهم ايه عني
اعترفت انها قالتلهم اني عايزه اخطف منها حبيبها وقالت عني كلام وحش جدا.
قولتلها ان سمعتي اضرت ولازم تصلح صورتي قدامهم.
قالتلي هعمل كده أكيد.
في الآخر قلتلها إني مقدرة اعتذارها
مش قادرة أتخطى فكرة إنها اتكلمت عني وحش مع الناس وإنها ما فكرتش تتواصل معايا غير لما هو اعترف بنفسه.
في الاول قبل ما اقابلها بصراحة كنت متردده بس لما اتكلمنا وعرفت الكلام اللي قالته عني. حسيت بحاجه كده جوايا بتقولي خلاص ماينفعش وقلبي رافض يصفي من ناحيتها.
قلتلها بصراحة إني مش عايزاها في حياتي دلوقتي وان ده ممكن يتغير بعدين. لما أكون جاهزة وعندي استعداد.
قولتلها لو حسيت في يوم إني عايزة نرجع صداقتنا هتواصل معاها.
في الآخر احنا الاتنين فضلنا نعيط وبصراحة ده كان أسوأ إحساس مريت بيه في حياتي كلها.
قالتلي إن مامتها سألت عني وده وجعني أكتر لأن مامتها كانت بالنسبالي زي مامتي التانية. أنا مش بس خسرت أعز صاحبة لكن خسرت كمان مامتي التانية اللي كانت قريبة من قلبي.
بعد كده شوية من أصحابنا بدأوا يتواصلوا معايا واعتذروا إنهم بعدوا عني وكانوا بيتجاهلوني.
غالبا هي قالتلهم الحقيقة. لكن بصراحة ما رديتش عليهم لأني متضايقة جدا إنهم اختاروا ياخدوا صفها من غير حتى ما يسألوني عن اللي حصل.
في المرحلة دي أنا مش عايزة حد منهم خالص في حياتي.
_____________
ريديت
حواديت_الاجانب
قصص
قصص
حكايات
روايات
قصص مكتوبه
هادفه وواقعية
قصص مترجمه
قصص اجانب
قصص مترجمه وواقعية
قصص وحكايات من عالم فات
قصص وحكايات الأجانب
قصه وحكاية ورواية
قصه وحدوته
قصه وحكايه من ألف ليلة
قصص من الخيال
قصص واقعية ولكن من خيال
الواقع
