رسالة غريبة قبل فرحي بيومين حواديت الاجانب

رسالة غريبة قبل فرحي بيومين!!!
حواديت_الاجانب
أنا بنت مخطوبة رسمي من سنة. ومرتبطة بخطيبي من 3 سنين.
صديقي المقرب ديف أعرفة من أول سنة في الكلية احنا كلنا في أوائل التلاتينات .
النهارده الصبح صحيت على رسالة طويلة جدا من ديف بعتها حوالي الساعة ٦ الصبح.
باختصار الرسالة كانت كلها فضفضة من قلبه. بيقول إنه بقاله سنين بيحبني وكان دايما مستني إن يحصل بيني وبين خطيبي حاجة تخلينا نبعد عن بعض عشان آخد بالي منه. وطلب مني أفسخ الخطوبة وأهرب معاه وقالي كان لازم أعترفلك بحبي قبل ما يفوت الأوان.
أنا دلوقتي حزينة ومخنوقة. وعلي فكرة أنا طول بعمري كنت بعتبره صديقي وبس عمري ما شوفته غير كده.
كتبت ردود كتير وكل مره بمسحها. ولسه مش عارفة أرد عليه وأقوله ايه
لسه ماقلتش لخطيبي أي حاجة. لأني مش عايزاه يقلق ويزعل. خصوصا أن فرحنا خلاص كمان يومين.
عارفة إن لازم أقوله بس مش عارفة أحكيله الموضوع إزاي.
والأصعب إن ديف بقى صاحب خطيبي كمان.
متضايقة إنه

اختار وقت وحش جدا. وخلاني مضايقة ومتوتره كده.
يعني هو فاكر إني ممكن بمنتهي البساطة كده ألغي فرحي وأسيب خطيبي عشان مجرد رسالة!
بفكر أقوله ما يحضرش الفرح. بس بصراحه خايفة يعمل حاجة غريبة ويخرب الفرح.
كمان فكره إني أخسر صديقي المقرب بتكسر قلبي. والفرحة مش هتبقى كاملة من غيره.
هو حطني في موقف صعب قوي.
ياريته لو كان بعد عني وخلاص . أو حتي كان قالي من زمان.
أنا مش عايزة أجرحه بس لازم أوضحله إني ما عنديش أي مشاعر ناحيته والفرح زي ما هو.
احنا صحاب بقالنا أكتر من ١٠ سنين وانا بعيط طول اليوم بسبب الموضوع ده. وزعلانه إنه طول الوقت ده كان عنده نية تانية غير الصداقة.
أتعامل مع الموضوع ده إزاي فرحي خلاص كمان أقل من ٤٨ ساعة
تحديث 
أنا قررت أقول لخطيبي علي الرسالة أول ما يرجع من عند أخوه. ومش هرد علي ديف قبل ما أقول لخطيبي الاول.
التحديث 
أنا و جوزي مبسوطة أوي إني أقدر أقول الكلمه دي دلوقتي رجعنا من شهر العسل امبارح!
لما خطيبي رجع من عند أخوه خليته يقعد ووريتله الرسالة. لما شافها كان غضبان قوي ومش طايق نفسه.
طبعا أعتذرله قالي إني مليش ذنب في حاجة.
قالي إنه كان حاسس إن ديف بيحبني بس كان ساكت علشان شايف أن ديف بيتعامل بأحترام وعمره ما أتخطي حدوده.
فعلا ده حقيقي. ديف عمره ما عمل معايا أي تصرف غلط.
علشان أطمن خطيبي أكتر خليته يشوف الرسايل اللي بينا عشان يتأكد بنفسه إن مافيش أي حاجه غريبة بينا أنا حتي عمري ما اشتكيت ل ديف من خطيبي لما كنا بنتخانق. كنت بشتكي ل ماما بس 
بعدين خطيبي سألني عايزة أعمل إيه. قلتله بصراحة رغم إن الموضوع مزعلني بس أنا مش عايزاه يحضر فرحنا كنت خايفة يعمل أي حركة بايخة
كتبنا رسالة قصيرة قلنا فيها ديف آسفة لو فهمت صداقتي غلط. الفرح هيتم عادي والأفضل إنك متحضرش. وعشان أكون واضحة خليت خطيبي يقرا الرسالة وهو معايا في قرار إني مش عايزك في الفرح.
كنا عايزين نوضح إنها رغبتي أنا كمان مش رغبة خطيبي بس. لاني عارفه ديف كويس أكيد هيقول إن خطيبي هو اللي أجبرني على القرار ده.
هو قرأ الرسالة بس ما ردش الحقيقة بدأت أتوتر وخطيبي سألني لو عايزة أعمله بلوكبصراحة كنت عايزه أعرف رده الأول.
أخيرا رد وكانت الرسالة طويلة قوي وبشعة. قال إني كدابة واني بضحك عليه من سنين وقالي ان شاء الله خطيبك هيسيبك وهتتحرمي طول عمرك من الاطفال. وكان بيدعي عليا. الرسالة كان كلها كلام صعب مؤلم لدرجه اني بكيت.
خطيبي أخد موبايلي وخرج من الأوضة وأنا كنت بعيط. أعتقد إنه كلمه بس مش متأكدة. اللي أعرفه إنه بعد حوالي ساعة رجع واداني موبايلي وقال لي إن ديف اتعمله بلوك من كل حاجة ومش هيحضر وحتي لو حاول يحضر محدش هيسمحله بالدخول.
حسيت إنه كان حمل واتشال من على قلبي. وبعد ما قريت الكلام اللي كتبه خلاص مكنتش زعلانة إنه مش هيحضر.
وفرحنا كان جميل بجد! عشنا أجمل يوم في حياتنا وسط الناس اللي بنحبهم وبيحبونا.
أنا ما عرفش أي حاجة عن ديف. من يوم اللي حصل ده.
ده التحديث! مش درامي زي ما ناس كتير كانت متوقعة بالعكس أنا مبسوطة 
القصة حقيقية