القاتل كتابة حماده هيكل
الساعة 1 بعد نص الليل كل يوم
الباب بيخبط ..
انا مش عارف انام من فترة ..حاسس بأرق
وبشوف كوابيس دايما
بصراحه الليل بالنسبة لي بقى جحيم
انا عايش لوحدي ..بعد طلاق مراتي
فتحت الباب
ملقتش حد كالعادة !!
غريبة ممكن يكون حد من الجيران بيزاولني
بس لأ .اصله مين ممكن يعمل كدا
نفس الميعاد كل ليلة ..لحد ما في ليلة زهقت
وقررت اني مفتحش
بس الغريبة أن الخبط فضل مستمر
وبيزيد بشكل متصاعد وانا عاوز انام
اتسحبت بهدوء وفتحت الباب فجأة ولمحته
ولد صغير عمره 7 سنين او أقل
لسه هيجري مسكته من إيده
تعالى هنا رايح فين
قالي بصوت حزين
انا اسف
اسف ايه !! كل ليلة تصحيني من النوم تخبط وتجري
انا مش هسيبك ..دخلته الشقة وقفلت الباب
انت ابن مين هنا في العماره
بص للأرض ومنطقش
ما تتكلم ولا خايف بابا يضربك
انا بابا ميت من سنتين
حسيت انه صعب عليا
طب وماما فين
ماما !! ماما مش لاقيها
مش لاقيها أزاي
انا كنت بلعب في الجنينه ..وبعدت عنها شوية فضلت ادور عليها بس معرفتش
وفي واحد شافني بعيط ..قالي مالك
قولتله مش لاقي ماما
قالي اوصفها لي
وصفتها ليه شكلها ولبسها
قالي انها كانت بتدور عليك وخرجت
اشوفك في الشارع بره ..تعالى معايا عشان
اخدك عندها
ها وحصل اين بعدها
خدني من إيدي وخرجنا فضلنا نمشي ونمشي
وبعدها أخد تاكسي وركبني فيه وقالي
هندور عليها بالتاكسي عشان انا تعبت من المشي
واول ما ركبت رش عليا حاجه خلاني نمت
ولما
فضلت أصرخ واعيط وبعدها
في ست فتحت لي الباب وهربتني منه
ومن ساعتها وانا بلف في الشوارع بدور على ماما
أخدته وفضلت أطبطب عليه
وقولتله متخافش يا حبيبي انا هساعدك
عشان توصل لماما
جبت له أكل وبعدها دخلته ونيمته
والصبح نزلت الشغل
كنت سرحان وانا بفكر في مشكلته وخوفت اكون
ورطت نفسي في مشكله اني خليته عندي
بس دا طفل صغير ذنبه ايه يتلطم في الشوارع
وممكن حد يأذيه
كان في شغل مطلوب مني
دخلته للمدير
لسه همشي
أستنى عندك هنا يا طارق
نعم
ايه الشغل دا
دا الفايل اللي حضرتك طلبته .انا اسف لو اتأخرت
يعني مش كفاية انك متأخر وكمان جايبه ناقص
أزاي بس..انا مراجعه النهارده قبل ما أدخله لحضرتك
اتفضل يا أستاذ راجع عليه تاني ..وعشان تركز
كويس في شغلك ..خصم 3 أيام
خرجت من المكتب وانا بطق شرار
وأمير زميلي شوفت على وشه أبتسامه
زي ما يكون فرحان فيا
انت بتضحك على ايه
في ايه يا طارق .هو انا كلمتك
انت أكيد اللي عملت فيا الحركه دي ..
حركة ايه
الورق ناقص والمدير خصم لي 3 ايام بسببك
وانا هعمل كدا ليه
عشان مبتحبنيش
واضح أن اعصابك تعبانه
انا لسه واصل الشغل من عشر دقايق
كان عندي مأمورية وكمان معرفش حاجه
عن شغلك اصلا
ردت رندا زميلتنا
فعلا كلام أمير مظبوط
ممكن تخليكي في حالك يا راندا
بصت لي بأندهاش ومتكلمتش
دخلت مكتبي وانا دمي محروق
كلهم هنا بيكرهوني ومتغاظين
ولازم يداروا على أمير عشان يطلع
هو الملاك وانا اللي اعصابي تعبانه
رجعت البيت وأنا على اخري ولما دخلت
لقيت الولد الصغير قدامي
ممكن اعرف هتاخدني امتى لماما يا عمو
يوووه انت هنا دنا نسيتك خالص
الولد زعل وفضل يعيط
طب خلاص متزعلش حقك عليا
انا اسف لو زعلتك ..سلام
فتح الباب ونزل جري
زعلت من نفسي اوي اني كلمته كدا
جريت وراه ولما شافني بقي يجري بسرعه
هو يجري وانا وراه باقصى سرعتي
لغاية ما عدى الشارع وأنا بقوله حاسب ..خلي باااالك
كان معدي موتوسيكل سريع ..صاحبه خبطه
الولد جسمه طار في الهواء ونزل جثة هامدة
سواق الموتوسيكل بص عليا وعليه وجري بسرعه موقفش
لمحت رقمه 3571 وبعدها جريت وراه لكنه كان اسرع
اخدت تاكسي عشان ألحقه ..لكن للأسف فلت مني
لما رجعت ملقتش جثة الولد ..واضح أن الاسعاف خدته
دورت عليه في كل المستشفيات
لكن ملقتش ليه أثر
رجعت البيت وانا حزين عليه
حاولت أنام معرفتش
كنت حاسس اني انا القاتل
وانه مات بسببي
فات كام يوم ومروحتش الشغل
كنت في حالة نفسية سيئة جدا
مش عارف انام الكوابيس بتطاردني
شكل الولد وملامح الفزع وهو بيشوف الموت بعنيه
صوت خبط على الباب
فتحت لقيته قدامي واقف ودماغه مفتوحه والدم بينزف منه
انت
اه سبتني وجريت ليه
كنت عايز ألحقه ولما رجعت ملقتكش
انا خلاص عرفت مكاني
بجد
ايوه
تعالى عشان توصلني
غيرت هدومي ونزلنا
واحنا خارجين
قالي عايز اركب الموتوسيكل
انت عرفت ازاي أن عندي موتوسكيل اصلا !
ممكن أركب وراك
ياااه ..انا ليا فترة طويلة مركبتوش
معلش عشان نوصل أسرع
طيب حاضر
الموتوسيكل بتاعي كان مركون ومتغطي وعليه تراب
مسحته ودورته وركب ورايا
فضلنا ماشيين ..وهو بيوصف لي الطريق
لغاية ما وصلنا المقابر
بس هنا
انت عايش هنا
مسك ايدي وركنت المكنه وفضلنا نمشي بين القبور
ووقف عند قبر وقالي
انا هنا
صيت لمكان القبر لقيت مكتوب عليه
علي احمد سلمان من 2012 حتى 2019
الرجاء قراءة الفاتحه على روحه
بصيت عليه لقيته أختفى
الولد مات وادفن هنا !!
قلبي أتقبض ..جريت بسرعه
ولماجيت ادور الموتسيكل ...لمحت رقمه 3571
دا نفس رقم الموتوسيكل اللي قتل الولد وجري
وانا صاحب الموتوسيكل
افتكرت كل اللي حصل..لما كنت سايق بسرعه
وخبطته وجريت .. وأد ايه انا كنت جبان
عشان هربت..كان ممكن أوقف وارجعله واخده بسرعه على أقرب مستشفى وانقذه ..لكن خوفي هو سبب موته.
من يومها حالتي النفسية ساءت وبقيت عايش في خناق مع مراتي لغاية ما طلبت الطلاق..مبقتش عارف انام وبشوف كوابيس وعلاقتي ساءت مع كل الناس حتى مع زمايلي في الشغل
انا مش هتحمل أكتر من كدا حياتي بقت جحيم حرفيا
لازم أسلم نفسي عشان ارتاح من العذاب اللي انا فيه دا
طلعت على القسم
لو سمحت عاوز ابلغ عن حادثة قتل
مين اللي مات
طفل عنده 7 سنين
ومات أزاي
انا اللي قتلته!!
تمت
the_killer
حماده_هيكل
للمزيد
تابعوني على جميع المنصات وعلى موقع لمحة المميز واتمنى أن تنال القصص إعجابكم ولكم جزيل الشكر على وقتكم
حماده هيكل
