فوبيا قصة للكاتب حماده هيكل
فوبيا
القصة كاملة
يلا يا علي ..حاسب التاكسي بسرعه
انا تعبانه ومش قادرة
حاضر حاضر يا سهى
اتفضل يا اسطى ..هات الباقي بسرعه
المدام زي ما انت شايف على وش ولاده خلاص
حاسبني السواق بسرعه
دخلت العمارة ومراتي واقفه بتهز برجلها في الأرض
يلا بقى يا ستي تعالي نطلع ...بس ياريت نطلع بالاسانسير بقى..انا نفسي بيتقطع من السلم احنا في الخامس
انت عارف انا عندي فوبيا منه
يا ستي انتي بطنك أدامك وعلى وش ولاده
خايف العيل ينزل على السلم..الاسانسير أسهل واسرع
وبعدين انا معاكي أهو خايفه من ايه بس
وكمان معاكي شنط كتير وحاجة الولاده
وهدوم البيي دول لوحدهم عايزين شيال
هتقطي وسطي بيهم
يعني اطلع بيه وعلى ضمانتك
ايوه اطمني ..الساعه دلوقت 11:20 مساء
11 و 22 دقيقه هنكون في شقتنا
طيب لما نشوف
اخيرا وافقت تطلع معايا ..واترحمت من ام السلم
دخلنا الأسانسير ..وقفلت الباب
وضغطت على زر الدور
أتحرك الأسانسير ..ومع الهزة بتاعته مراتي صرخت
وكلبشت في دراعي ..ياستي متخافيش
طيب طيب
يادوب وصلنا الدور الاول ..ونور الأسانسير أبتدا يرعش
علي ..هو في ايه
مفيش حاجه هيكون في ايه
انا خايفه اوي
مفيش حاجة بقولك
بعدها النور فصل والأسانسير بقى ضلمه
صرخت سهى بصوت عالي
بس يخرب بيتك وطي صوتك
فضلت تصرخ ..حطيت ايدي على بوقها
عشان اكتم صراخها دا ..وبعد ثواني النور رجع
بصيت لمراتي لقيتها اتحولت لمسخ مخيف
عيون حمرا زي الدم وشعر منكوش
وأسنان بارزه
وحسيت الأسانسير بقى زي الفرن
خصوصا لما رجعت بضهري ولصقت فيه
اتلسعت منه ..وانا ببص لها ومبرق
انتي...انتي مين !! وفين سهى ..يا سهى
ردت بصوت مخيف
انت مش عارفني !!
لا..انتي مين ووديتي سهى فين
سهى!! انت أزاي تسيبها تطلع لوحدها
وهي تعبانه كدا ؟
تطلع لوحدها فين !!! هي كانت معايا من ثواني
قبل النور ما يفصل ..
صرخت
كدااااااب
انت لازم تتعاقب على اهمالك في حقها
قربت مني وانا برجع بضهري وببعد عنها
وهي بتحاصرني من كل اتجاه وبتقرب اكتر واكتر
وبعدها مسكتني من رقبتي وضغطت عليها بكل قوتها
ورجلي اترفعت من الأرض وخبطت في سقف الأسانسير
فجأة الأسانسير وقف عند الدور الخامس
كنت بحاول اتخلص منها ..بس مش قادر
نفسي بيخلص وروحي بتروح مني
بصت في عنيا بتركيز اوي وقالت بغضب
المره دي قرصة ودن خفيفة ..لو زعلتها تاني
متلومش الا نفسك
وفجأة الباب أتفتح ...ولقيت سهى واقفه بتبص
لي بأندهاش
مالك يا علي ..كل دا عشان تيجي من تحت
دا انا طلعت السلم وسبقتك..كنت فين ؟
كنت فين ايه ..انتي الي كنتي فين !!
انا قولتلك هطلع ع السلم وهات الشنط وتعالى ورايا
انا مسمعتش حاجه ..وبعدين انتي اصلا
كنتي واقفه تحت معايا وقولتي هطلع بالأسانسير معاك
انا !!
ايوه انتي ؟؟
أستحالة طبعا ..انت عارف أنا عندي
ولا يمكن أطلع بيه أبدا
اومال مين اللي ؟
اللي ايه ؟
...
علي ..انت كويس ؟
ها..لا انا تمام
طب يلا بقى عشان تنزل تجيب الحاجه
من تحت شكلك نسيتهم
طيب حاضر يا ستي
ايه دا !! مش هتنزل بالأسانسير
لا يا ستي انا هنزل ع السلم وهطلع بيه كمان
في حاجة !!
لأ مفيش ..انت حر !!
نزلت بسرعه وروحت على أوضة البواب
عم كامل يا عم كمال
اهلا استاذ علي ..حمدلله على سلامتك
وصلت امتى ؟
مفيش من ربع ساعه كدا
نورت العماره ..خير يا بيه
هو الأسانسير دا في حاجة ؟
ايوه مش شغال ؟
مش شغال ليه؟
من يوم وفاة الست عنايات جارتكم في السابع
وهو كدا بيعلق ..رغم اننا جبنا المهندس كام
مرة ..بس برضو بيرجع يعلق من تاني
ومحدش من السكان بيستخدمه
مدام عنايات ماتت !!!
ايوه ...شنقت نفسها ..بسبب سوء
معاملة جوزها ليها.
لا اله الا الله ..زعلتني عليها كانت ست طيبة
سبته وروحت للسلم أخد الشنط
وبصيت
بيقولي
اوعى تنسى
المره دي قرصة ودن خفيفة ..لو زعلتها تاني
متلومش الا نفسك
ومن يومها وانا اللى بقى عندي فوبيا
من الأسانسير !
حماده هيكل
