حكاية دودو

حكايه دودو
سافر يشتغل علشان يجيب مصاريف طلباتها وطلبات البيت وده كان جزاؤه

انا (سامي)عندي ٣٠سنه موظف في شركه كبيره .. فتحت عيني علي الدنيا لقيتني ابن وحيد لاب وام كل همهم في الحياه يحققو طلباتي ويشوفوني سعيد ومكانش عندي اخوات بس كان .. (احمد) جاري وصاحبي معايا طول الوقت واعتبرته اخويا مكوناش بنفارق بعض لا ليل ولا نهار مع بعض في البيت والمدرسه والنادي ومامتي ومامته صحاب من زمان .. ولما بقينا في ثانويه عامه كنا بناخد  الدروس عندي في البيت او عند احمد في بيته ولما النتيجه طلعت دخلنا  مع بعض كليه  التجاره واول مدخلنا الجامعه احمد اتعرف علي بنت زميلتنا اسمه (سمر) وعاشو قصه حب طويله واول متخرجو  خطبها واتجوزو وطبعا احمد كان لسه في بدايه حياته وكان مرتبه يادوب بيكفي الضروريات لكن سمر كانت حلوه ومدلعه وطلباتها كتير وده كان سبب مشاكل كتير بينهم.. وطبعا الوضع بقي اصعب بعد ماربنا رزقهم بابنهم (زيدان) وزادت المشاكل بين احمد وسمر لحد ما هي اقترحت عليه انه يسافر يشتغل بره علشان يجيب

فلوس اكتر تكفي طلباتها هي وابنهم وطلبات البيت 
وفعلا فضل شهور يدور ويقدم علي شغل ويعمل مقابلات لحد مجات له شغله في بلد عربي بمرتب خيالي .. في البدايه كان متردد انه هيسيب مراته وابنه لوحدهم هنا ويسافر 
خاصه ان سمر رفضت تقفل شقتها وتروح تقعد عند اهلها او اهل احمد وقالت له محدش بيرتاح غير في بيته .. وانا مش هسيب بيتي.. المهم احمد وافق بعد مناقشات كتير .. وقبل ميسافر وصاني اخد بالي من سمر وزيدان واشوف طلباتهم في غيابه.. طبعا مهي مرات اخويا يعني في مقام اختي.ظ وفعلا احمد سافر
ويعد مسافر كنت بشوف طلبات سمر واجيب لها حاجات البيت وكل كام يوم اعدي عليها علشان لو احتاجت حاجه.. وبمرور الوقت بقينا نقعد مع بعض ونتكلم واليوم الي مشوفهاش فيه ناكلم فون  وقربنا من بعض اوي .. وهي كانت جميله وجذابه وتخش القلب ..بدانا نحب بعض ونقرب من بعض وقالت لي انها كان مفروض تتجوزني انا مش احمد وانها بتحبني  وانا كمان اعترفت لها بحبي ونسينا احمد وخيانتنا له في لحظه
وبعد ماعدا ست شهور طلبت منها  تطلق من احمد واتجوزها انا.. وفعلا اول ما احمد رجع مصر اجازه بعد ٧شهورطلبت  سمر منه الطلاق طبعا هو اتصدم ومبقاش عارف يفكر وجه سالني قولت له طالما واحده مش عيزاك ومش باقيه عليك بعد حب السنين دي كلها طلقها.. وفعلا سمر اطلقت وسابت ابنها لاحمد الي  لما جه يسافر سابه لجدته علشان تراعيه 
بعد شهور العده ماخلصت فاتحت اهلي اني اتجوز سمر وطبعا كلهم رفضو وقالو لي كده هتخسر صاحب عمرك لو اتجوزتها وبعدين  الدنيامضاقتش شوف اي عروسه اجمل منها ونخطبها لك .. بس انا كنت مصر علي  اني اتجوزها.. وماما قالت لي دي ست مش  كويسه احنا عارفين مشاكلها مع احمد من زمان...قولت لها الناس بتتغير ويمكن احمد هو الي كان بيعمل معاها مشاكل 
وفي النهايه اهلي وافقو واتجوزت سمر. وطبعا احمد زعل جدا وكلمني. قال لي كده ياصاحب عمري؟ دلوقتي انا فهمت هي ليه طلبت الطلاق واصرت عليه..  وقال لي لو سمحت مش عايز اعرفك بعد كده ولا تكلمني نهائى..وقطع علاقته بيا من اللحظه دي وخسرت اخويا وصاحب عمري
فات شهرين علي جوازنا انا وسمر بدات الاحظ انها بتكلم شباب علي الفيسبوك وبتنزل تقابلهم وبيجيبو لها هدايا ولما سالتها قالت عادي دول اصدقاء صداقه بريئه مفيش بيني وبينهم حاجه ولما طلبت منها تقطع علاقتها بيهم اتخانقت معايا وعملت مشكله وقالت انا متجوزني علشان تحبسني؟ هو جواز ولا سجن؟.. ده غير طلباتها المبالغ فيها كل شويه تشتري لبس وميك اب وعيزاني اخد اجازه من شغلي ونطلع رحلات ولو رفضت تعمل مشكله
اصبحت حياتنا سلسه من المشاكل اليوميه الي مبتنتهيش
معداش علي جوازنا خمس شهور وكنا اتطلقنا .. والغريب انها مزعلتش ولا اهتمت لما طلقتها .. طبعا ده شئ متوقع اذا كانت باعت قبل كده حب سنين هتبقي عليا انا؟
وبحمد ربنا اني مخلفتش منها لانها متصلحش تبقي ام خالص

بس طبعا خلاص خسرت صاحبي وعشره اكتر من عشرين سنه الي حاولت اكلمه وارجع علاقتي بيه بعد مطلقت سمر بس هو رفض
انالوقتي ندمان اني خسرته وبحكي لكم حكايتي علشان محدش منكم يغلط غلطتي .. اوع تبيع صاحب عمرك علشان ست .. لانها زي ما باعته هيجي يوم وتبيعك وتلاقي نفسك وحيد بعد مخسرت اقرب

الناس اليك