حكاية نادية

حكايه  مدام ناديه 
انا اسمي (ناديه).. احنا تلات اخوات بنتين وولد انا اصغر واحده فيهم ..  كنا عايشين حياه عاديه هاديه مع اب مسافر بره مصر  سايبنا مع ام بتحاول تعوضنا عن غياب الاب علي اد متقدر    ....ماما ماتت  فجاه وانا في ثانويه عامه  وبعد ٤٠يوم بالظبط بابا اتجوز واخد مراته وسافر  وسابنا انا واخواتي( ايمان )في تانيه جامعه و(عمر) اخر سنه في الكليه .. سابنا  لوحدنا 
وكانت علاقته باهله مقطوعه وكمان علاقتنا باهل ماما مش كويسه يعني محدش من اهلنا سال فينا .. وكان الغريب بيعطف علينا اكتر من القريب
عمر وايمان اضطرو يشتغلو اثناء الدراسه علشان يكفو مصاريف البيت ومرضيوش يخلوني انزل اشتغل علشان اذاكر كويس في الثانويه واجيب مجموع كبير
ايمان جميله  وكان بيتقدم لها ناس كتير لكن هي  كانت رافضه الجواز علشان ظروفنا
ولما وصلت  ايمان اخر سنه في الكليه اتعرفت علي زميلها و شرحت له ظروفنا واتفقو علي الجواز بعد التخرج

وفعلا اتجوزو .. وايمان سابتني انا وعمر في البيت لوحدنا..  في الوقت عرفت قيمتها هي كانت امي التانيه كانت مش حرماني من حاجه وعمرها ما حسستني اني عبئ عليها علي العكس من كده كان عمر طول الوقت محسسني  اني عبئ تقيل عليه ومتضايق من مصاريفي  وحتي لما نزلت اشتغلت وانا في تانيه  جامعه .. انا مكونتش في جمال ايمان. علشان كده الايام عدت ومحدش اتقدم لي.. وخلصت كليه تجاره وحاولت الاقي شغل بشهادتي لكن طبعا مستحيل .. وفضلت اشتغل في مكتبه زي مكونت قبل متخرج علشان ماخدش فلوس من عمر .. ومرت السنين وهو كان قاسي وفظيع معايا دايما محسسني اني جبل راسخ علي قلبه .. لحد مقرر في يوم انه يتجوز .. انا فرحت قولت مراته هتبقي معايا في البيت تونسني  وتهون عليا قسوته 
وجت (عزه) البيت .. وياريتها ماجت.. كانت اسوء من عمر مليون مره. قساوه ومشاكل ومعامله سيئه. .. من اول يوم لها في البيت عايزه تخلص مني باي شكل.. خلتني اكره البيت اكتر واكتر .. وبقيت اتمني اي حد يتقدم لي علشان اخلص من العيشه دي.. كانت كل يوم تسخن عمر عليا تشتمني ويتخانق معايا  من غير سبب .. كل العمر الي فات كوم والسنتين الي عيشتهم مع مرات اخويا دول كوم لوحدهم ..  لاول مره اكره شكلي.. بقيت ابص في المرايه واقول لو مكونتش وحشه كان زماني اتجوزت واترحمت من العذاب ده.. ومرت السنين علي نفس الحال
وفي يوم ربنا استجاب لدعواتي واتقدم لي(علي).. مطلق ومعندوش ولاد .. مش مهم انا هكون له الزوجه والبنت والام والصديقه .. اتجوزت علي وانا بحلم بحياه تعوضني عن كل العذاب الي شوفته .. وفعلا من اول يوم وانا بحاول  اعمل كل الي اقدر عليه علشان اسعده
بصراحه انا من جوايا مكونتش مقتنعه بيه. كان نفسي اتجوز واحد اكون انا اول فرحته. ميكونش متجوز قبل كده .. بس اقنعت نفسي ان حياتي معاه لازم تبقي سعيده كنت بشوف هو عايز ايه واعمله من قبل ميقول .. غيرت  من نفسي كتير اوي علشان ابقي شبهه... بس للاسف مشوفتش ولا يوم حلو معاه.. كان قاسي جدا عليا وكل يوم ضرب واهانه بسبب ومن غير سبب.. واكتشفت انه عينه زايغه  وبيعرف ستات كتير في نفس الوقت.. وعرفت كمان ان مراته اطلقت منه بسبب، خيانته ليها.. اول حمل مكملش بسببه لما ضربني برجله في  بطني ..بس بعد سنه ربنا رزقني ب (يس) اجمل حاجه حصلت لي في عمري .. الحاجه الوحيده الي بتفرحني .. استحملت الاهانه والذل والبهدله  والمعايره بشكلي الوحش .. كله. علشان خاطر يس.. وكل يوم يكبر فرحتي بتكبر معاه بس علي كان قاسي معاه هو كمان  بيضربه و يخوفه .. بقي لما بيشوفه بيخاف ولما يسمع صوته  يرتعش.. انا كرهته لاني كنت متحملاه علشان يس  دلوقتي هو سبب خوف ورعب له
فكرت انفصل عنه واطلب الطلاق بس هروح فين؟ ارجع لنار اخويا ومراته؟ مستحيل يتحملوني انا وابني .. اعيش واتحمل  الضرب والذل والاهانه والخيانه ؟
مش عارفه اعمل ايه اختيارين اصعب من بعض.. وابني اتكتب عليه الرعب والذل من ابوه... فكرت اقتله واخلص منه بس كده هتسجن واتحرم من ابني واسيبه معاه يعذبه .. وابني لما يكبر يعايروه ان امه قتلت ابوه.... رحمتك يارب. ..