قصة التؤام كاملة لمروة عزمي

التؤام كاملة
أول ما اتجوزت كانت حالة جوزي المادية صعبة اوي.... 
كان عليه ديون كتير بسبب الجواز والعفش وقسط الشقة وخصوصا انه من النوع اللي بيحب الفشخرة و المنظرة ادام الناس حتى وهو مفلس.
فات أول شهر على جوازنا وعرفت إني حامل كنت فرحانة جدا وكنت متخيلة أنه هو كمان هيفرح زيي لما يعرف إني حامل لكن للأسف ماحستش انه فرحان بالعكس بقيت حاسة أنه على طول متضايق ومهموم بصراحة هو ماكنش بيحاول يبين قدامي انه زعلان لكن أنا كنت حاسة بيه وزعلانة ان مفيش في ايدي حاجة اعملها أو اساعده بيها.
لغاية ما وصلت للشهر الرابع وروحنا سوا للدكتور في الوحدة الصحية وأول ما كشف عليا ابتسم وبص لجوزي وقاله 
_ يتربوا في عزك ان شاء الله
هما مين دول يا دكتور 
_ مبروك... مراتك حامل في توأم 
نزل الخبر على جوزي زي الصاعقة مانطقش بعدها بولا كلمة. بعكسي انا كنت فرحانة جدا وكنت حاسة ان ربنا هيعدلها وهيفرجها علينا 
تقريبا الدكتور حس بصدمة جوزي فنده عليه وأحنا طالعين من الباب واخده على جنب وقاله دة الكارت بتاعي ياريت تكلمني

على الرقم دة عشان بعد كدة المدام تيجي تتابع الحمل عندي في عيادتي الخاصة وأنا هفهمك على كل حاجة في التليفون
عدت شهور الحمل ببطئ وتعب... وولدت بعدها في عيادة الدكتور زي ما اتفق مع جوزي بس اتفاجئت بيه بيقولي بعد ما فوقت من البنج ان البنت بس هي اللي عايشة والولد لا... 
سلمت أمري لربنا ورضيت بقضاءه رغم حزني وقهرتي على الولد... بس بعدها سبحان الله حياتنا اتغيرت تماما والفلوس جريت في ايد جوزي واشترى شقة تمليك كبيرة نقلنا فيها دة غير الدهب اللي جابهولي و الهدايا الكتير
كنت فرحانة اوي بالمستوى إللي بقينا عايشين فيه وإللي فرحني اكتر لما لقيت جوزي بيطلب مني ان احنا نخلف تاني بس طلب مني اني لازم اروح للدكتور الاول عشان يديني مقويات ومنشطات عشان يحصل حمل بسرعة وعشان نفسه كمان اكون حامل في توأم زي المرة اللي فاتت.
الحمل المرة دي كان مختلف... جوزي كان مهتم بيا جدا غير الحمل إللي فات بيتابع ادويتي بالساعة والدقيقة والدكتور بنروحله كل شهر بانتظام والفرحة كمان باينة في عينيه طول الوقت. 
بس الغريب لما عملت سونار أول مرة وطلعت فعلا حامل في توأم أن الدكتور وجوزي حضنوا بعض من كتر الفرحة... الدكتور كان فرحان زي جوزي ويمكن اكتر كمان!! استغربت ساعتها رد فعله اوي بس بعد كدة نسيت الموضوع وسهيت في بنتي الصغيرة وفي تعب الحمل 
لغاية مافي يوم كنت قاعدة اتفرج على التلفزيون وشوفت بالصدفة مسلسل قديم عن قصة واحدة جوزها بيبع عيالهم ويفهمها انهم ماتوا وبيقبض هو التمن من غير ماهي تعرف...
غيرت القناة وقفلت التلفزيون بس أحداث المسلسل فضلت مسيطرة على تفكيري وبدات اربط الاحداث ببعض غنى جوزي المفاجئ بعد الولادة واهتمامه اني احمل تاني بتوأم وفرحة الدكتور الغريبة كل الاحداث دي بقت تدور في دماغي واللي أكدلي اكتر انه امبارح بيقولي بعد ماتولدي عاوز اشتري عربية احدث موديل ..طب ايه اللي خلاه متأكد انه هيجيله فلوس كتير يشتري بيها عربية بعد ما أولد.
انا تقريبا كدة اتأكدت بعد ماجمعت الأحداث كلها مع بعض ان الأفكار اللي في دماغي كلها مظبوطة بس اتصرف ازاي واعمل ايه يوم الولادة وانا ماليش اهل يقفوا معايا ويخلوا بالهم عليا وعلى ولادي 
حاولت اهدا واروق نفسي عشان خاطر اللي في بطني وفي نفس الوقت اقدر افكر بهدوء هعمل ايه واتصرف ازاي 
وفعلا على اخر اليوم جاتلي فكرة عبقرية هبدأ في تنفيذها من بكرة.
كان أهم حاجة بالنسبة لي قبل ما ابدأ في اي خطة إني أأمن مستقبلي ومستقبل ولادي عشان كدة ماحاولتش أبين له إني شاكة في اي حاجة بالعكس بقيت اتدلع عليه زيادة واعشمه بكتر الخلفة والعيال عشان يوافق يكتب لي الشقة بأسمي وخلال الفترة دي اكون دورت على حد يساعدني في المرحلة الجاية.
فات اقل من أسبوع ولقيته جايبلي عقد الشقة بأسمي بيع وشرا ومتسجل في الشهر العقاري هو بصراحة دايما بيحاول يرضيني بأي طريقة أو زي مابيقولوا كدة بيتمنى لي الرضا ارضي بس اعمل أيه في الشك اللي هيموتني لا هو مش شك هو بقى يقين بعد ماعملت سيرش على أسم الدكتور وعرفت أنه بيعمل عمليات مشبهوهة زي الاجهاض والترقيع في عيادته الخاصة.
في الفترة دي مالقتش غير أم شهد مرات البواب هي اللي تقدر تساعدني في الخطة بتاعتي اول حاجة خليتها تشتريلي نوع عشب معين جيبت أسمه من على النت بيسبب خلل في الخلايا العصبية للجسم وبقيت احطهوله في الأكل