سر المروحة لمروة عزمي
كاملة
من ساعة ماتجوزت وانا مش سعيدة في حياتي، معاملة سيئة وضرب وإهانة على اتفه الاسباب،، اتجوزت في محافظة تانية بعيد عن اهلي وكنت متخيلة انه هيعوضني عن بعدي عنهم بس إتفاجئت بعكس كدة تماما.. حاولت استحمل كتير لكن مقدرتش... طلبت منه الطلاق، لكنه رفض بشدة
وياريته رفض بس.... دة اعتبر طلبي للطلاق إهانة ليه وبقى يذل فيا ويعذبني اكتر، منعني من الخروج وبعدني عن الناس كلها حتى امي منعني اني اشوفها ولا اكلمها في التليفون ... حاولت اهرب واسيب البيت لكن كل مرة كان بيرجعني تاني غصب عني عشان انا مليش حد والدي متوفي وامي ست كبيرة ومريضة فماكنش بيلاقي حد يقف قصاده...
كنت ساعتها لسة مش فاهمة هو ليه بيعمل كدة، ليه متمسك بيا رغم انه مش بيحبني، ليه مصمم يرجعني البيت معاه وهو بيكرهني، ليه كل مرة يضربني ويشتمني وبعدها ينام معايا عادي ولا اكنه عمل حاجة.
ماكانش فيه غير جارتي وفاء هي اللي بتهون عليا العذاب اللي انا فيه، كنا دايما بنتكلم مع بعض من شباك المنور اول ما جوزي وجوزها ينزلوا اشغالهم،
هي ست طيبة اوي وجوزها راجل غني مغرقها هدايا وفلوس على امل انها هتخلفله الولد اللي بيحلم بيه هي معاها بنتين وحاليا حامل في الشهر التالت. و دايما تقولي استحملي بكرة لما تخلفي
حاولت استحمل وجيت على نفسي كتير عشان عارفة لو هربت هيعمل فيا ايه...
لغاية ما في يوم كان راجع تعبان من الشغل ومعاه كيسة سودا كبيرة دخل خباها في الدولاب بسرعة ومن كتر تعبه نام وهو قاعد على الكرسي والموبايل مفتوح في ايده.
طبعا الفضول كان هيموتني عشان اعرف مخبي ايه في الكيسة لكن في نفس الوقت ماكنش ينفع اضيع فرصة ان موبايله مفتوح من غير باسورد.. دي تعتبر احسن فرصة اقدر اكلم فيها مامتي واطمن عليها من غير مايحس بيا.
مسكت موبايله واتسحبت بعيد بالراحة اوي عشان مايحسش بيا لكن قبل ما اتصل شوفت حاجات على الموبايل خلتني ابلم من كتر الصدمة ماكنتش قادرة اصدق اللي شوفته رجعت الموبايل مكانه بسرعة وروحت افتح الدولاب قبل مايصحى اشوف في ايه في الكيسة اللي مخبيها و تقريبا كنت متوقعة هلاقي فيها ايه بعد اللي شوفته على الموبايل وفعلا لما فتحتها لقيت ظني طلع في محله...
جريت على وفاء جارتي استنجد بيها لقيتها منهارة بتقولي الحقيني اتصرف ازاي
كانت عمالة تتكلم بسرعة وتعيط لدرجة ماكنتش سامعة معظم كلامها ولا كنت قادرة اركز معاها بسبب المصيبة اللي انا فيها....
بس اللي فهمته انها كانت عند الدكتور وعرفت انها حامل في بنت ل تالت مرة وان جوزها حالف عليها لو طلعت حامل في بنت هيرميها هي وبناتها
حاولت اسكتها عشان تسمعني لكن من غير فايدة روحت مصرخة فيها جامد عشان تسكت:
- اسمعيني بقى يا وفاء ..انا في مصيبة كبيرة
بصتلي باستغراب زي ماتكون فاقت ولسة واخدة بالها اني بعيط
= في ايه يا سلمى مالك؟
انهرت من العياط وانا بحكيلها ازاي اكتشفت ان جوزي طلع راجل سادي و ان لما مسكت موبايله بالصدقة لقيته مصور فيديوهات كتير لضربه و تعذيبه ليا و بيعرض الفيديوهات دي على النت بفلوس
والمصيبة الاكبر ان لقيته مخبي كيس فيه كورباج وحديد وكلبشات وحاجات غريبة عمري ماشوفتها قبل كدة عشان ناوي يصور فيديو جديد النهاردة وطالب من الناس تحوله فلوس قبل مايعرض الفيديو...
انهرت من العياط اكتر وانا بقولها:
-الظاهر مفيش حل غير ان اموت نفسي عشان اخلص منه واستريح
سكتت شوية وبصيتلي وهي بتمسح دموعها:
= وتموتي نفسك ليه، هو اللي المفروض يموت... ومش هو بس... جوزي كمان!!!
وقفت عياط فجأة وسألتها وانا بمسح دموعي:
- انتي بتقولي كدة وخلاص ولا فعلا في حاجة في دماغك بتفكري فيها
= قوليلي الاول سمعتي عن العريس والعروسة اللي ماتوا امبارح وهما بيستحموا عشان اتكهربوا من المياه.... العرسان اللي كل بوستات الفيس بتترحم عليهم
- مانتي عارفة انا معنديش نت،
= هقولك... بصي كدة فوقيكي، شايفة المروحة دي
- ايوة شيفاها مالها
= المروحة دي فيها حل مشكلتي انا وانتي...
لو لعبنا في سلك صغير من اسلاك المروحة.. الكهرباء هتوصل للجنش ومنها لحديد التسليح اللي هو متصل بمواسير الميه في الدور بتاعنا كله يعني شقتي وشقتك
- وبعدين ايه اللي هيحصل
= اي حد هياخد دش هيتكهرب ويموت في ساعتها
- يالهوي ..انتي عرفتي الحاجات دي منين
= من ابويا الله يرحمه كان كهربائي اد الدنيا
وبعدين هو انا لسة هشرحلك دة لسة في تفاصيل كتير، اجري على شقتك بسرعة يا سلمى قبل ماجوزك يصحى من النوم ويعرف انك كنتي عندي، والبسي قميص نوم حلو كدة وحاولي تقنعيه يدخل ياخد دش عشان لما البوليس يجي ويلاقيكي متوضبة مايشكش في حاجة
****************************
**بعد مرور اربع شهور
- ايه رايك يا وفاء في الفستان الجديد دة
= يجنن عليكي يا سلمى
- بس غالي شوية ب 3 الاف جنيه
=ياختي تعيشي وتصرفي من فلوس المرحوم
- تسلمي يا حبيبتي، الا بالحق كنت عاوزة اخد رايك في موضوع... في واحد عرفته من على الفيسبوك معجب بيا وعاوز يتجوزني بس خايفة يكون طمعان في الفلوس اللي ورثتها وبيضحك عليا
= وتخافي ليه،، اتجوزي وعيشي حياتك براحتك طول ما
تمت
#marwa_azmy
