ضد الكسر قصة حماده هيكل
رجعت من الشغل بعد الضهر النهارده
وكان الجو حر جدا ..زي ما تكون الشمس
موجهة أشعتها بس علينا أحنا وسايبه باقي الدول
كنت تعبان جدا والعرق كان مغرقني..اخدت نفسي
وبعدها دخلت الحمام أخدت دش ساقع ..وخرجت
انا عايش هنا لوحدي ..مستقل في شقة صغيرة
أوضة وصالة لأني ساكن بعيد عن أهلي في محافظة تانية بحكم شغلي ..دخلت نمت شوية وبالليل ..نزلت اقعد على القهوة مع واحد صاحبي، فضل يتكلم معايا عن المشاكل بينه وبين خطيبته وأن والدتها كل شوية بتطلب منه حاجات للشقه ..وانه خلاص مبقاش قادر ..قولتله يابني اللي عايز العسل لازم يتحمل قرص النحل
وطالما انك بتحبها خلاص ..كله هيهون ..
طب وانت مش ناوي تفرحنا بيك
لسه لما ربنا يأذن والاقي
رجعت الشقه على الساعه 11 بالليل ..وانا داخل
سمعت صوت حد بيعيط على السلم
بصيت ورايا لقيت بنت عمرها 18 سنه تقريبا قاعده بتعيط وخايفه
انتي مين وبتعملي ايه هنا؟؟
أرجوك دخلني عندك بسرعه لو شافني هيقتلني
هو مين
أرجوك مفيش وقت
كان باين عليها انها مرعوبه ..من طريقة كلامها
ومنظرها وايديها اللي بترتعش من الخوف
فتحت الباب وقبل ما اقول اتفضلي ..كانت دخلت جري
لو سمحت اقفل الباب ..
حاضر
بسرعه أرجوك
يا ستي حاضر ..اهو ..خلاص اطمني
ممكن كوباية ماية
دخلت جبتلها تشرب ..وبعد ما شربت قعدت
وقالت بحزن ..انا اسفه جدا
قوليلي بقى انتي مين وايه حكايتك
انا ساكنه قريب منك هنا
كنت باخد درس عشان عندنا امتحانات اليومين دول
تمام وبعدين
المفروض أن الدرس كان هيبدأ الساعه 8 ..بس المستر اتأخر
والدرس بدأ بعدها بساعه ..اخويا كلمني بعدها وعرفته اني لسه هتأخر على معادي كمان ساعه ..زعقلي وسابني ومشي
قولت مش مشكله هرجع البيت لوحدي
فعلا خلصت على الساعه 10 ونص..وبعد ما ودعت صاحبتي
لقيت في ولد معايا في المدرسه ماشي ورايا
هو ولد مش محترم وبيشرب سجاير
حاول اكتر من مرة يكلمني بس انا كنت بصده
النهارده كان مستنيني بعد ما خرجت من السنتر
ولسوء حظي اخويا مكنش معايا كالعادة
لما وصلت لشارع جانبي قرب مني وحاول يكلمني ..زعقت فيه ..شدني من إيدي
ضربته بالقلم على وشه ..اتجنن اكتر ذقني جامد
الشارع
بعدها ..حاول يمد إيده
لكني بسرعه طلعت القلم من شنطتي وضربته
فضل يصرخ جامد والدم بينزف منه
وروحت جريت ..فضل يجري ورايا ..وعرفت ازوغ منه
ودخلت البيت هنا وقعدت على السلم وانا خايفه ومرعوبه
طب وليه متصلتيش على حد من اهلك ييجي ياخدك
للاسف الموبايل وقع مني وأنا بجري منه
ومن ساعتها وانا خايفه ومرعوبه ..اني أخرج
احسن يكون مستنيني ..
سادت لحظات من الصمت ..بصيت لها ولقيت في دم
انتي متعوره ؟؟
اه ..نسيت اقولك وانا بحاول اهرب منه
ضربني بالمطواه
اللي قصادك دي
كل دا ولسه عايشه !!!
حركت رقبتها 360 درجة وقالت أطمن يا أستاذ
انا بنت مصر ..انا ضد الكسر
#بنت_مصر_
تمت
#حماده_هيكل
قصة للترفيه فقط اتمنى تكون عجبتكم
