قصة حقيقية بقلم بهاء حجازي

الراجل دا اسمه هيرو أُونودا

وليه قصة اغرب من الغرابة.. قصة تخوف وتحزن وتخليك مبلم كدا وانت بتسمعها..
هو مواليد 1922.. شاب ياباني.. منفتح ومنطلق ونفسه يفتح ملهى ويرقص ويغني.. ويتبسط.. بس لم يكن يعلم إن سعادته لن تدوم.. لانه دخل الجيش.. طيب وايه يعني..

ما هو عقبال ولاد الحبايب.. دخل في فترة الحرب العالمية التانية.. طيب وايه يعني ما اليابان كلها اتهزمت.. انت هتجيبها في الواد المسكين دا..

هو مسكين فعلا..

هيرو أُونودا.. بعتوه حتة في الفلبين يسيطروا عليها.. فالواد خد قوات تحت منه منهم واحد اسمه كينيشي كوزوكا ... وراح الحتة دي.. يسيطر عليها علشان يمنع الاعداء من السيطرة عليها.. طيب ما عادي..

اللي مش عادي بقى

.. ان الحرب العالمية التانية خلصت سبتمبر 1945.. وامريكا ضربت اليابان بالنووي.. واليابان استسلمت اصلا.. والموضوع خلص.. وصاحبنا دا ولا يعرف اي حاجة عن الموضوع وبيعمل حرب عصابات مع الظل في الفلبين.. فضل كام سنة بقى.. سنة اتنين.. تلاتة.. عشرة.. لا.. فضل 29 سنة وشهور... وهو مستخبي للاعداء.. دا اخر جندي فضل في الحرب العالمية التانية..

لما اتعرفت قصته.. بعتوله طيارة تنادي عليه.. ملازم  هيرو أُونودا لقد انتهت الحرب.. سلم نفسك وعد لبلدك.. قال اه عارفها انا الحركات دي.. عايزني استسلم واسيب الحتة دي علشان الاعداء يسيطروا عليها.. ورفض الاستسلام.. جابوله ناس من الجيش الياباني.. علشان يعني ميشكش.. وقالوله كلمة السر

والايميل وكل حاجة.. بس برضه رفض يستسلم غير لما الظابط اللي اداله الامر هو اللي يقوله..

دور يا بني على الظابط اللي بعت هيرو أُونودا للمهمة .. لقوه اتسرح من الخدمة من زمان وبقى راجل عجوز.. وبيبيع كتب في الشارع اصلا.. قالوله تعالى اتفضل البس البدلة.. وروح في مهمة انك تدي امر لـ هيرو أُونودا يسلم سلاحه وسيفه ويرجع... وفعلا راحله واعلن هيرو أُونودا استسلامه.. بعد 29 سنة كان بيحارب فيها خياله.. الحرب كانت في دماغه هو بس..

كام ليلة نام خايف.. 
كام ليله نام جعان
كام واحد مات من اهله من غير ما يشوفهم
ولا اتجوز ولا كون اسرة..

حياة اشبه بحياة الحيوانات في الغابات.. بياكل رمم.. ويشرب اي حاجة سايلة.. لمدة 29 سنة.

. احلى سنين عمره ضاعت في بلد مش بلده وسط ناس بيعدوا عليه ويجروا اللي يقول عليه شبح واللي يقول عفريت.. لحد ما استسلم.. شكله وهو بيستسلم ويدي التحية العسكرية بمنتهى الجدية.. كإنه شال هم تقيل قوي على ضهره.. وشكل الناس اللي بيضحكوا من هيئته.. يقولك ان ممكن ماساة حياتك تكون نكتة بالنسبة لشخص تاني..

هيرو أُونودا.. كتب مذكراته اللي اسمها "لا استسلام.. حربي التي استمرت 30 عاما".. للاسف المذكرات مش مترجمة.. انا ترجمتها للعربية.. وانا بقراها كنت حاسس كميات مشاعر مختلطة على ماساة الراجل دا..

عاش حياة صعبة.. (بالمناسبة هو بعد كدا كمل حياته وفضل عايش لحد سنة  2014.. ومات وهو 91 سنة.. ومعتقدش ان الحرب كانت انتهت

من دماغه..

#بهاء_حجازي