خطة شيطانية
كنت قاعده في الأوضه وماسكه الموبايل
لقيت رساله جاتلي علي الواتس فتحتها لقيت ڤيديو
مدته قصيره كان ظاهر فيه جوزي قصاد عربيته وبيتكلم معاها
رميت الموبايل من ايدي ومكنتش مصدقه ان دا حصل ومبقتش عارفه اتصرف ازاي قطع تفكيري صوت خبط
علي باب الشقه فتحت لقيته جوزي
ملامح وشي كان باين عليها اني حزينه ومقهوره
سألني مالك يا هاجر فيه ايه
قلت له اتفضل اتفرج علي الفيديو دا
مسك موبايلي وكان مندهش وهو بيتفرج عليه
قالي هاجر مين بعتلك الفيديو دا
قلت له مش مهم مين اللي بعته
المهم انك ظهرت علي حقيقتك
قالي لا انتي فاهمه غلط
قعدت علي كرسي الانتريه وانا بعيط ومنهاره قلت له
آخر حاجه كنت ممكن أتوقعها انك تخوني
ياااه بعد دا كله تخوني أنا طب ليه قولي رد عليا
دا أنا إللي قلت عليك أخويا وأبويا
ومش مخلياك محتاج حاجه فيها إيه الهانم دي زياده عني
رد عليا أه طبعا هترد تقول إيه ماأنت مش عارف تنطق ومكنتش متوقع إني هعرف لا يابيه شوف ربنا سبحانه وتعالي قدر يكشفك علي حقيقتك ويخليني أعرف إيه إللي بيدور من ورايا وانا قاعده في مكاني كلكم كده صنف الرجاله عينكم زايغه ومهما الست تضحي عشانكم
بتنسوا كل ده منك لله منك لله ياشيخ
قالي ياهاجر استني بس والله انا برئ انتي فهمتي غلط
قلت له ماهي كل حاجه مكشوفه اهي وظهرت علي حقيقتك اقولك ياحبيبي عايزه اشتري طقم تقولي بعدين
اقولك في خاتم وسلسله عجبني هموت واجيبهم
تقولي طيب ربنا يسهل
طيب نخرج نتفسح
وانت مقضيها مع الهانم تشتري لها دهب ولبس وبتفسحها كمان وتحضنها عيني عينك كده قصاد العمارة ولا همك حاجه لو سمحت ابعد عني متقربليش متلمسنيش روح للامورة بتاعتك ويكون في علمك أنا رايحه عند ابويا
وبالفيديو دا هفضحك بيه وهرفع عليك قضيه خلع واكسبها يااستاذ وحسك عينك تيجي جنبي ولا تلمسني ولا لسانك يخاطب لساني غير لما تحكيلي
ليه عملت كده وخليك صريح معايا
لقيته بيقولي يابنتي قسما بالله انا نازل الصبح وركبت العربيه بصيت لقيت بنت وقعت علي الكابوت بتاع عربيتي
نزلت بسرعه اشوف مالها لقيتها كانت دايخه وبدأت تفوق لوحدها ومعرفش مين صور الفيديو دا
يا هاجر والله ما خونتك انا بحبك والله
قلت له بتحبني هه كفايه كدب بقي
انا خلاص مش عايزه منك حاجه ولا عايزه الطقم اللي كان نفسي فيه ولا السلسله والخاتم
لقيته بيقولي طيب متعيطيش كفايه بقي
والله انا بحبك وكل اللي قلته حصل بالفعل انا برئ والله ومظلوم وعمري ما خونتك طيب قومي غيري هدومك وتعالي معايا هننزل نشتري كل اللي نفسك فيه
انتي اغلي حاجه في حياتي ياهاجر صدقيني الفيديو دا مؤامره علشان يبعدونا عن بعض
وبعد محاولات كتيره منه صدقت انه فعلا برئ وقومت دخلت الاوضه غيرت هدومي علشان ننزل مسكت موبايلي واتصلت ب سلمي صاحبتي قلت لها
تسلميلي انتي وسحر ياروح قلبي الخطه مشيت وكله تمام ونازلين اهو نشتري الحاجات اللي نفسي فيها
منحرمش منكم ابدا يااحلي صحاب في الدنيا
معلش مضطره انهي المكالمه علشان جوزي بينادي
ايوه يابيبي انا جايه اهو
