قصة اللوحة
كنت واقف بالعربيه بتاعتي مستني الاشارة تفتح
لقيت طفل عنده حوالي 11 سنه بيقرب مني
- قلت له انت محتاج حاجه ياحبيبي ؟
= قالي معايا لوحتين هتختار منهم لوحه
وبعد كده ممكن تمشي
قلت له ماشي موافق
عرض عليا اللوحتين
وكانت الأولي لغرفه مكتوب فوقها رقم 27
ودخان كثيف خارج منها
واللوحه الآخري كان موجود دم علي الباب
استغربت من اللوحتين لكني اخترت الأولي
لقيت الطفل ابتسم وقالي ابتدت اللعبه
وخلال لحظات الطفل كان اختفي من قصاد عيني
قومت من نومي مفزوع بسبب الحلم الغريب
لقيت مراتي كانت صاحيه وبتقرأ روايه
حكيت ليها الحلم قالت لي متخافش يا أمير دا كابوس وان شاء الله خير قبل ما ارد عليها سمعت صريخ في الفندق اللي انا ومراتي نازلين فيه
خرجت بسرعه علشان اشوف
لقيت دخان كثيف خارج من احدي الغرف والعمال كانوا بيحاولوا يكسروا الباب وبالفعل كسروه وقدروا يدخلوا للغرفه وسيطروا علي الحريق لكن مع الأسف كان كل شئ انتهي
والحريقه تسببت في موت نزلاء الغرفه
مقدرتش اتمالك اعصابي وتحولت مشاعري من حزن لخوف ورعب بعد ما شوفت رقم 27 مكتوب فوق الغرفه في اللحظه دي تذكرت الحلم الغريب واللوحه اللي شوفتها
كان يوم صعب جدا وكانت حاله من الحزن والفوضي في الفندق بسبب الحادث الأليم وطبعا مكانش ينفع مده اقامتي تطول لذلك غادرت الفندق في نفس اليوم ورجعنا شقتنا
حاولت اتجاهل اللي حصل واعتبره مجرد كابوس عابر او صدفه لكن اللي غير عادي كان في نهايه اليوم
لما نمت حلمت نفس الحلم
واتقابلت مع الطفل في نفس المكان
لقيته بيقولي هنكرر نفس اللعبه لوحتين
اللوحه الاولي كانت لخالد صديق عزيز عليا
وكان وشه لونه ازرق
واللوحه التانيه كانت رأسه منفصله عن جسده
اخترت اللوحه الأولي
لقيته ابتسم ليا نفس ابتسامته السخيفه
صحيت من نومي بمجرد ما اختفي من امام عيني
كنت خايف جدا علي صديقي ومعرفش اللوحتين معناهم ايه ؟ علشان اتعرض لصدمه مكنتش اتوقعها
مكالمه تليفوني من زميلي في الشغل بيبلغني ان خالد العربيه بتاعته انقلبت بيه في البحر ومات غريق
التليفون وقع من ايدي وانهارت من البكاء
مراتي قلقت من نومها علي صوت بكائي
قلت لها الحلم اتكرر تاني وخالد صاحبي مات
حاولت تهديني لكن كانت حالتي صعبه جدا
نزلت من البيت واتجهت بعربيتي لبلد خالد صاحبي
علشان احضر الدفنه وبعد مراسم الدفن واثناء العزاء
كنت قاعد مع قرايبه جسمي
لكن عقلي كان مشغول بالحلم الغريب اللي بيتكرر
ومش لاقي اي تفسير للي بيحصل وليه انا تحديدا
وليه الرسمه اللي بختارها بتتحقق واقعياً عقلي كان هينفجر من التفكير والأسئله الكتيره اللي بتدور في دماغي
حسيت اني مرهق جدا وعايز انام استأذنت وركبت عربيتي وانا في طريقي للبيت قابلتني اشارة وقفت
ضربات قلبي بقت سريعه ومكنتش عارف اذا كان دا حلم ام حقيقه لما قابلت الطفل اللي بيظهرلي في الحلم
لقيته بيقرب منه وبيقولي
معايا لوحتين اختار منهم لوحه
اللوحه الاولي
كانت لزوجتي واخويا وموجود وراهم قبر مفتوح
واللوحه التانيه
كانت لامي وابويا وهما مشنوقين في أوضتهم
مبقتش عارف اتكلم كنت حاسس اني مسلوب الاراده
وعاجز عن اصدار اي رد فعل لقيت الطفل ابتسم وقبل ما يختفي
" المره دي انا اللي هختار اللوحه انتهت اللعبه "
