حلم عمري

الخميس 12/يونيو/2025 - 09:01 م

دكتور خالد المصري أنا الحاج كريم من أسوان عندي ٥٥ سنة شغال علي باب الله بطلع كل يوم الفجر أقعد علي الطريق وأستني أي حد ياخدني معاه أشتغل والدنيا حقيقي صعبة معايا لإني مابقتش أقدر أفرد ضهري ودلوقتي جايلك من غير ما مراتي تعرف علشان أقدملك طلب إنك تعالج بنتي.
أنا ومراتي متجوزين من ١٥ سنة وربنا ما أنعمش علينا طول المدة دي بنعمة الخلفة وبعد كل الصبر ده بنتي جت للدنيا من ٣ شهور ومحتاجة عملية قلب مفتوح في أسرع وقت لإن حالتها كل يوم بتسوء عن اللي قبله.
بالله عليك أقف جمب أب الزمن دوب قلبه .
دموعي نزلت غصب عني..
الراجل ده ظروفه كانت زيي بالضبط وشغال نفس الشغل بتاع أبويا!!!
لفيت ضهر الورقة لاقيت مكتوب عليا
بنتي الغالية ياسمين أعذريني يا نور عيني بس معلش حظك قليل في الدنيا والدكتور طلع مسافر برا مصر واللي شغالين عنده مش راضيين يقبلوا حالتك.
أشوفك في جنة ربنا يا حتة من قلبي وروحي.
الغلابة اللي زينا يابنتي تقريبا مالهمش مكان وسط القلوب السودا اللي في الأرض.
بكره معادنا في الجنة وأحس بقلبك وهو سليم وأكون فرحان بيكي وأنا شايفك جميلة وبتضحكي.
والله أبوكي عمل المستحيل علشانك لدرجة إنه استلف فلوس المواصلات علشان يعرف ييجي لحد هنا فسامحيني يابنتي.
سامحيني يا جنة من ربنا جاتلي علي الأرض بس ماليش نصيب كبير فيها.
في اللحظة دي قلبي كإنه إتخلع من مكانه وركبت العربية بتاعتي وبدأت أسوق بسرعة زي الملهوف علي بنته من الموت وسافرت من القاهرة لأسوان سافرت ١٢ ساعة بتحدي فيهم الزمن الوقت

لحد ما وصلت للعنوان ووقفت قدام الباب وبدأت آخد نفس طويل وأطلعه بالراحة علشان أهدأ.
وفجأة..
سمعت صوت الأم بتصرخ وبتتكلم بسرعة أوي
يااااااارب بنتي لا ياااارب.
معجزة من عندك يارب بس بنتي ماتضيعش مني دي صبري كله في الدنيا والله...
وصوت عياطها بقي عالي
في اللحظة دي إتقدمت خطوتين ناحية الباب وبصيت للسما وكإني شايف قلب أبويا في اللحظة اللي وقف فيها ومش عاوزها تتكرر تاني.
وأول ما خبطت علي الباب لاقيت راجل ضهره محني وماشي بالعافية..
أنت مين يا أستاذ
أنت الحاج كريم
أيوة.
دموعي سالت زي الشلال
هو الدعاء ممكن يغير القدر يا حاج
أكيد يا أستاذ رب المسحيل قادر يخلي كل شيء جايز.
وصوت الأم بيقاطع كلامنا وهي بتقول
معجزة من عندك يارب بنتي قلبها هيقف يااارب.
الجواب ده بتاعك
أول ما عينه شافت الجواب لاقيته بيعيط بصوت عالي وطلع الشارع وبص للسما
أنا يارب!!! وقفت جمبي أنا يارب
ده أنا عصيتك كتير ويأست أكتر.
وقفت جمب كريم الضعيف اللي الزمن حني ضهره وكسر قلبه
جمب كريم اللي مالوش حد في الدنيا يساعده
أخدته في حضني وبدأت أهدي فيه وقلت
ربك جمبك وهو الوحيد اللي يقدر يساعدك ياعم كريم.
مسح دموعه وبص في وشي ب استغراب
بس أنت مين يا أستاذ شكلك إبن ناس ومليان هيبة!
أنا
أيوة إنت.
حسيت بخنقة شديدة في قلبي ومابقتش قادر أتحكم في دموعي وقلت بصوت متقطع
أنا واحد أبوه كان زيك بالضبط ومات علشان ماكنش معاه فلوس يتعالج وماحدش وقف جمبه أنا واحد الزمن كسر ضهره زيك

برضو وصبر فوق صبر الدنيا ألف صبر كمان.
أنا الدكتور خالد المصري أشهر دكتور جراح قلوب في ألمانيا وصاحب المستشفي اللي أنت كنت جاي عندها علشان تكشف فيها علي بنتك يا حاج.
إيده بدأت ترتعش وبص للسما
مراتي دعتك بمعجزة أنت سمعتها
سمعتها وبعتتلي الشخص اللي أنا لفيت الدنيا كلها علشان بس أشوفه!!
باعتهولي لحد بيتي
في اللحظة دي حطيت إيدي علي قلبه وقلت
هو حقيقي الدعاء بيغير القدر يا حاج كريم
فضل يمشي قدام البيت وهو باصص للسما وبيقول بصوت واطي وكلام مش واضح
رب المعجزات قادر علي كل حاجة..
رب القدر قادر علي تغيير القدر.
ربنا سمعني ربنا سمعني وبعت المعجزة لمراتي.
أخدتهم معايا في العربية وطول الطريق كنت متابع حالة البنت وأول ما وصلنا المستشفي كانت أوضة العمليات جاهزة وبدأت في تنفيذ عملية قلب مفتوح وتوسيع شرايين وتبديل صمامات لطفلة لسه ماتمتش ٣ شهور عملية كانت تكاد مستحيلة.
واللي إتمنيته زمان بقي دلوقتي قدام عينيا.
إني أبقي دكتور قلب كبير وأعالج قلوب الغلابة ببلاش.
وإن الدكتور مش لازم يكون أبوه دكتور.
بس ثواني وقبل ما قلبي يقف والدنيا تتحول.
فيه أمل جديد إتولد وهيحكي عمري من الأول.
_______
صوت المكان هادي تماما وكله مستنيني أكمل كلامي
ف مسكت المايك وقلت بصوت عالي
هو فعلا الدعاء ممكن يغير القدر
الصمت كان هو المسيطر علي المدرج وفجأة..
صوت طالب لسه في أولي طب جاي من بعيد بيقول
بعد اللي حضرتك حكيتيه ده كله يا دكتورة أكيد الدعاء بيغير القدر.
بس هي القصة دي حقيقية
ابتسمت

ومسحت دمعة نزلت من عيني وقلت
خليكم مقتنعين دايما إنك مهما بلغت من العلم أوعي تتكبر أو تظلم قلب أو تفتري.
ومهما بلغت عندك السلطة والجاه.
خليك فاكر يا شاطر إن من فات قديمه تاه
أهلا بيكم يا شباب في أول محاضرة ليكم في كلية الطب البشري جامعة عين شمس أنا الدكتورة ياسمين كريم رئيسة قسم جراحة القلب والصدر في كلية الطب جامعة عين شمس.
ومرة واحدة بنت وقفت وهي مصدومة وقالت بصوت عالي
هو حضرتك البنت الصغيرة اللي الدكتور خالد المصري عالجها
ابتسمت وحطيت إيدي علي صدري فوق الجرح القديم مكان العملية اللي عملتها زمان
مع كل دقة قلب جديد لازم بيكون فيه ضريبة وضريبة دقة قلبي كانت وفاة الدكتور خالد المصري بعدها بفترة.
ولفيت ناحية الباب ومسكت شنطتي وقلت
المحاضرة بتاعت النهاردة خلصت أتمني تكونوا أستفدتوا حاجة.
وأول ما وصلت المكتب بتاعي روحت ناحية البرواز اللي محتفظة بيه من مدة كبيرة وهو عبارة عن حتة ورقة من جورنال مكتوب فيها ب خط عريض
حصول الدكتور خالد المصري علي جائزة نوبل في الطب .
وصوت أغنية جمبي بتقول
لو بطلنا نحلم نموت لو عاندنا نقدر نفوت.
ساعتها قلبي ضحك بعد ما ربنا عوض ٦٠ سنة كفاح عاشها وإن فعلا ربنا مابيضيعش تعب حد جايز الرزق ييجي متأخر زي ما أنا إتولدت بعد ١٥ سنة صبر وجايز الكلام السلبي يكون بداية حياة إيجابية زي ما حصل مع دكتور خالد وبدل ما يكون مجرد دكتور بقي معاه أعظم جايزة في العالم.
بس الحاجة اللي هفضل واثقة منها طول عمري هي إن
طول

ما أحلامك في طوعك
كمل وإمشي ل قدام.
مش نهاية الكون وقوعك.
النهاية
في الاستسلام.