سندك في الحياة حماده هيكل
صباح الخير على عيونك
صباح الفل والورد والياسمين يا حياتي
جهزتي الفطار
لا انا تعبانه شوية ..ماتنزل تجبلنا فطار من تحت
سلامتك يا قلبي حاضر
نزلت الشارع عديت على مطعم عم فوزي
اشتريت منه فول وطعميه وبطاطس محمره
وبعدها عديت ع الفرن جبت منه بجنيه عيش
وبعدين اشتريت حزمتين جرجير وخس
لمحت بنت واقفه الناحية التانية من الشارع
وبتعيط شكلها كدا في طالبة في إعدادي باين من لبس المدرسه اللي لابساه
صعبت عليا وروحت عليها
مالك يا حبيبتي بتعيطي ليه ، حد مزعلك
لا يا عمو مفيش حاجه
كل الدموع دي ومفيش حاجه ، قولي لي مالك
جوز امي طردني من البيت
ليه كدا ؟
عشان مش عايزني اروح المدرسه تاني
وبيقولي مش هصرف عليكي تاني كفاية لحد كدا
طب وفين بابا
بابا مات من 4 سنين ومن بعدها امي اتجوزت راجل
تاني وخلفت منه عيلين ، وبقت معاملتها متغيرة معايا
دايما ضرب وأهانه ومشيلاني شغل البيت
طيب معلش يا حبيبتي ..انا مش عارف اقولك ايه
انا خايفه ومش عارفه اعمل ايه
عايزه اروح المدرسه بس الأستاذ قالي لو
مصاريف الكتب مش هتدخلي ، لسه هقول لماما
عاوزه فلوس جوزها ضربني وطردني من البيت
انتي اسمك ايه ؟
اسمي منار
اسمك جميل فطرتي ولا لسه يا منار
ااه الحمدلله
لا شكلك لسه على لحم بطنك زيي
تعالي معايا نفطر انا وانتي والولاد فوق
لا ياعمو متشكره مش عايزه
تعالي متخافيش انتي زي بنتي
أخدتها وطلعت فوق ومراتي أستغربت لما شافتها
اقعدي هنا يا منار وثواني وجايلك
دخلت انا ومراتي الاوضه
ايه الي انتي جايبها معاك دي ..تنزل تجيب لي فطار
ترجعي لي ببنت معاك
ياحبيبتي استني بس انا هفهمك
تفهمني ايه ؟
بعد ما حكيت لها قصة البنت ، صعبت عليها جدا
وقالت طيب ناوي تهمل معاها ايه
مفيش انا هفطرها واخدها في سكتي المدرسه
وادفعلها رسوم الكتب ، البنت شكلها غاوية تعليم
حرام يضيع مستقبلها ، هي ملهاش ذنب في ظروفها دي
بس احنا كدا هنتزنق انت عارف علينا مصاريف وطلبات
وجمعيه ودروس للولاد
معلش ربك هيدبرها متقلقيش
فطرنا مع بعض وروحت بيها المدرسه
ودفعت لها المصاريف وقولتلها
ولو احتجت اي حاجة انتي كدا عرفتي طريق بيتي
كانت طايرة من السعاده وشكرتني على اللي عملته معاها
رجعت وحكيت لمراتي على اللي حصل والموضوع اتقفل على كدا ..وكنت خلاص أبتديت انسى موضوع البنت دي
في زحمة الحياة ودوشتها
بعد حوالي اسبوعين كنت قاعد مع مراتي في الصاله
و الباب خبط ..فتحت الباب لقيت منار بتزف دم
من دماغها
منار !! مالك يا حبيبتي حصلك ايه
وقفت ساكته وبعدها وقعت فاقدة الوعي
شيلتها بسرعه وجريت واخدت توكتوك
وطلعت على أقرب مستشفى
دخلت الأستقبال وبعد نص ساعه كان الدكتور طلع
وسألني انت ولي امر البنت دي ؟
لا الحقيقه انا جيرانها ..خير يا دكتور مالها
البنت اتعرضت لحالة تعذيب وضرب ، في كدمات
وجروح في جسمها واتخبطت في دماغها بحسم صلب
وخدت 6 غرز ، انا لازم أبلغ الشرطه فورا
جت الشرطه وحققوا معايا
وبعدها البنت فاقت وقالت أن اللي ضربها
هو جوز أمها ، وانها هربت منه بعد ما حبسها في الأوضة
وجات جري عليا لحد البيت ووقعت من طولها
ولما فاقت لقت نفسها في المستشفى
أتقبض
قاله أن الراجل الغريب دا طلع احن عليها
منك ومن أمها اللي شايفه بنتها بتتهان وبتتعذب
ومستقبلها هيضيع وساكته ..ولولا الراجل الغريب
دا من أنقذ البنت كان زمانها ماتت من النزيف والألم
اخد 4 ايام على ذمة التحقيق ووكيل النيابة
مضى والدتها على تعهد بحسن معاملة البنت
وشكرني على مساعدتي ليها
حضرتك مفيش داعي للشكر دا اقل حاجه ممكن
تتعمل لطفلة والدها متوفي وملهاش حد يعرف عليها
حتى أقرب الناس ليها كانوا اقسى من الزمن والظروف
خرجت من النيابة مع منار ووالدتها
وقولت لها خلي بالك من بنتك ، انا مش هكون أحن عليها منك ، مهما كانت الظروف صعبة بس ولادنا أهم حاجه
في حياتنا ، ولما هتكبري وتعجزي جوزك دا مش هيشيلك
ولو حصلك حاجه ممكن يرميكي
انما بنتك هي الوحيده اللي هتقف جنبك
وتساعدك وتكون سندك في الحياة بعد ربنا
اتقي الله فيها وانا من وقت للتاني هعدي عليكم
وربنا
بس امانه عليكي بلاش تبطليها من المدرسه..
تمت
حماده هيكل.
