فكرة موت للكاتب حماده هيكل
الفترة الأخيرة بقيت بحس بتعب وأرهاق والم شديد في جسمي كله .. بقيت بشوف تهيؤات ..خيال أسود
ملازمني في كل مكان .. ملوش ملامح ولا عارف أميز شكله
محدش شايفه غيري ..بس انا واثق أنه موجود
وحاسس اني عارفه كويس ..مش خايف منه لأ
بس مش متقبل وجوده ..حاجة جوايا بتقولي لازم تتجاهله
رغم ان احساسي بيقولي انه أقرب حد ليا
الموضوع بقى بيأثر عليا في حياتي كلها ..في البيت في الشغل وانا باكل وانا نايم ..لدرجة أن اللي حوليا ابتدوا يشكوا في قوايا العقلية ..ودا لأني بكون قاعد معاهم عادي
وفجأة الخيال دا يظهر ..تلاقيني ركزت معاه وخصوصا لما يتحرك في جميع الاتجاهات ..انا بس اللي شايفه ومحدش غيري شايفه ..الكل اعتقد اني مجنون
مع الوقت قررت أني اتجاهل وجوده ..لان الموضوع زاد عن حده ..وصديقي المقرب قالي ..انت ايه اللي بتعمله دا
وليه بتبص يمين وشمال على الفراغ فجأة ..انت كويس؟
حاولت أشرح له اللي بيحصل ..لكن مكنش مقتنع اساسا بالي بقوله .. وكمان الخيال دا لا بيظهر بشكل واضح
ولا بيكلمني ..هو بس بيظهر ويعرفني انه موجود وبس
لكن أيه هدفه وليه انا بالذات
مراتي اتكلمت معايا في الموضوع وقالت أن بنتنا الصغيرة
أبتدت تخاف مني وبتقولها بابا دايما #سرحان_وبيبص ع الحيطه كتير .. ايه الموضوع
سبتها ونزلت وخرجت أتمشى لوحدي ..كنت حاسس اني بقيت مجنون..الخيال دا لو فضل يظهر لي بالشكل دا
انا هتجنن فعلا وممكن يجرالي حاجة
فضلت ماشي لمسافة طويلة وبعدها حسيت بأرهاق
كنت معدي على كوبري مهجور ..وقفت عليه شوية
وطلعت علبة سجاير وجيت اولع بالولاعه ..رفضت
حاولت أكتر من مره ..مفيش فايدة ..حدفتها في المايه
وبعدها لقيت ايد اتمدت لي بولاعه قربت منها وولعت السجارة
متشكر جدا..
الكلام وقف في حلقي لما لقيت الخيال دا واقف جنب مني
حسيت برعشه والسجارة وقعت مني
أنت ..انت اللي قلبت حالي الفترة الأخيرة
وسبب كل المشاكل اللي بتحصلي
شوف أختصارا للكلام ..انت عليك دين قديم
ولازم تسدده والا حياتك هتتحول لجحيم
وظهوري ليك دا مجرد البداية وبس
دين انا ..انا مش مديون لحد
مشكلتكم يا بني ادم النسيان ..دايما بتنسوا
نسيان ايه ..انا مش فاهم انت بتتكلم عن ايه
فاكر خطيبتك وحب
ايوه طبعا ..الله يرحمها
هي ليها دين في رقبتك انت لسه مسددتوش
دين ايه ؟؟
انتوا مش كان المفترض انكم هتتجوزا
قبل الحادثه بأسبوع
ايه بس محصلش نصيب وعملنا حادثه بالتكسي اللي كنا راكبينه وبعدها انا دخلت في غيبوبة لمدة 10 ايام
ولما فوقت عرفت انها ماتت
طب مانت فاكر كل حاجه اهو
طبعا انا لا يمكن انساها ..هي كانت حب حياتي
لا نسيتها وبدليل انك اتجوزت بعدها وخلفت والحياة مشيت
انت مين وعايز مني ايه بالظبط
انا مرسال منها
حبيت ابلغك سلامها وانها لسه في انتظارك ..عشان توفي بوعدك ليها ..وتتجوزوا
نتجوز !!! دا أزاي يعني
الموضوع بسيط ..كل المطلوب منك تتخلى عن حياتك
وبكدا هتقدر تتجوزها بسهولة
لكن انا بحب مراتي ومقدرش استغنى عن بنتي
ولازم تفهم أن الي حصلها دا كان قدر يعني
انا مليش ذنب فيه
يابني فوق وبطل الأوهام اللي انت عايش فيها دي
انتوا الاتنين مش عايشين ..خلاص موتوا وشبعتوا موت
انت أكيد اتجننت
تعالى معايا وانا هثبتلك مين فينا المجنون
مسكني الخيال دا من إيدي ومشي بيا لغاية
لشريط السكة الحديد ..فضلنا واقفين عليه
وبعدها ظهر القطر من بعيد..وهو بيجري بكل سرعته
وانا بحاول افلت منه ..وهو ماسكني بقوة غير عادية
عجزت ساعتها عن الحركة والقطر بيقرب وبيقرب
صرخت بصوت عالي وغمضت عيوني ..ومحصلش حاجه
القطر عدا من خلالنا وكأننا هوا ..سراب في الطريق
حطيت ايدي على جسمي وانا مش مصدق اني لسه سليم
ومحصليش حاجة
قعدت على القضبان وانا بعيط ومش فاهم في ايه
طبطب على كتفي وقالي
دي الحقيقة اللي انت بتهرب منها من سنين انت وخطيبتك موتوا في نفس الحادثه ..بس عقلك رفض تقبل حقيقة موتك
ورسمت قصة وسيناريو ..مختلف تماما ..وهو انك فوقت من الغيبوبة وخطيبتك ماتت وانك بعدها اتجوزت وخلفت وعشت حياتك ..وهي عشان بتحبك ..رفضت انها تسيبك او تتخلى عنك طول السنين دي ومفقدتش الأمل لحظة وحده
أيوه انا فعلا كنت غلطان ..بس عايز اعرف انت مين
وازاي عرفت التفاصيل دي كلها !!
أنت كل دا ومعرفتش لسه انا مين؟
...!!
أنا ..أنت ..كنت في صراع معاك دايما عشان تتقبل حقيقة
وضعك الحالي وانك تدرك بأنك ميت مش حي
ولأن الصراع دا مكنش ينفع تخوضه لوحدك
انا
وتريحني معاك بأكتشافك الحقيقة وتسليمك
لفكرة موتك
#فكرة_موت
#تمت
#حماده_هيكل
