حب من طرف تالت ل حماده هيكل
_ كل حاجة باظت
_يا سيدي متقولش كدا
_أنا مش عارف اعمل ايه ..لا بجد مش فاهم اللي حصل دا
حصل أزاي ..
_انت برضو الحق عليك ..تعرف اتنين في وقت واحد
_أعمل ايه يا أخي البنت كانت لسه مفركشه مع الإكس
بتاعها وحالتها مدمرة..وانت عارف اخوك حنين
دخلت عليها بطريقتي وقولتلها اني سنجل انا كمان
ومفركش وأننا اتخدعنا زي بعض
وان انتي فيكي حاجات كتير شبهي .. وكلمه من هنا على كلمه من هنا هوب وقعت هالة يا معلم
_طب ورنا ؟
_رنا حالة تانية ..هادية رومانسية ..حالمة كدا
عارف انت ليها طريقة كدا ..ساعات بتخنقتي
و بتزهقني منها .. فا بروح لرنا ..بنت مطرقعه ودماغها
ضايعه مجنونه بتعمل ايه حاجة في اي وقت ومش بيهمها
ولما بزهق من جنانها والهيبرة
وشوية هدوء ورومانسيه من تاني بقى
_اه عشان الملل برضو
_بالظبط كدا
_طب ايه بقى اللي حصل
مفيش يا سيدي ..كنت قاعد مع رنا من كام يوم في الكافية
وفاتح الفيس بتاعي من اللاب توب ..فجأة
جه الويتر وقالي الحق عربيتك الونش سحبها بره
كنت راكن صف تاني ساعتها ..وعنها جريت عشان الحق العربية
_وطبعا نسيت تقفل الفيس؟
_بالظبط كدا..وانت عارف الباقي
_رنا شافت رسايل هالة ليك واتكشفت يا معلم
_ياريتها جت على اد انها تفركش واو تسمعني كلمتين
تفش فيهم غيظها وخلاص
_اومال عملت ايه؟
_وصلت الاكونت بتاع هالة وعرفتها الحقيقة
واني خاين وكدا
_وقعتك سودا
_دي سودا ومهببة بطين
_هالة أتصلت بيا إمبارح وقالت لي انها تعبانه
واتحجزت
_ها وبعدين
_روحت عشان اطمن عليها
لقيت وحده صاحبتها بتقولي أن هالة تعبانه اوي
ومحتاجه تبرع بالدم ولا هتموت
_ها وبعدين
_الشهامة دبت في عروقي وقولت انا هتبرع
_سحبوا مني الدم وفي الاخر لقيتها بتضحك
وهي جاية تقولي انها مش تعبانه ولا حاجة
وكنت فاكرة انه معندكش دم ..بس طلع العكس
وسابتني ومشيت
_خرجت وراها بسرعه لقيتها خدت تاكس ومشيت
كنت حاسس اني دايخ بسبب كمية الدم اللي اتسحبت مني دي ..
_يعني ضحكت عليك
_صفت دمي بت الكلب واتبرعت غصب عني
_ههه معلش اهو عمل خير برضو
_اه خير اوي ..اتريق اتريق
_رنا بقى يا سيدي قابلتها بعدها بساعه في الكافية
وقالتلي انا جعانه اوي
_طلبتلها أكل ..فجأة لقيت وحده صاحبتها جت وسلمت
تسيبها وتمشي ..لأ ..قالت أنا جعانه اوي
_طب اتفضلي
_مش عايزة اتقل عليكم
_متقوليش كدا..اتفضلي مصطفى دا كريم اوي
وصاحب واجب ولا ايه؟
_ها..اه طبعا ..طلبتلها أكل هي كمان
_ههه دبستك يعني في صاحبتها
_ياريت رسيت على صاحبتها وبس
_حصل ايه تاني
_الهانم كانت مجمعه صحباتها كلهم ..ولاقيتهم داخلين واحده ورا التانية وكل وحده تسحب كرسي والترابيزة تتمد
وحده ورا كرسي ورا ترابيزة ورا واحده وهلم جره
١٢ بنت يا مؤمن اتغدوا وطلبوا حلو ومشروبات وايس كريم
وانا كنت هموت من القهر
وفي الاخر ضحكت وقالت
_عزومة جميلة بس كان ناقصنا هالة يا خاين
وفضلوا يضحكوا وسابوني ومشيوا
_١٢ بنت اتعزموا على حسابك!!
_صفوا دمي وخلصوا فلوسي مرتب
_قلبي عندك يا صاحبي..تعيش وتاخد غيرها
الحب_من_طرف_تالت
حماده_هيكل
