عشرة عمري بقلم حمادة هيكل
من 51 سنه شوفتها كانت بنوته حلوه وبضفاير
كانت راجعه من المدرسه من يومها واتعلقت بيها
مين دي يا جدعان
دي آمال بنت عاطف متولي الخضري
فين دا ؟
عاطف بتاع الخضار اللي في كفر أبو نبيهه
يا راجل !! وهو عاطف عنده بنات حلوه كدا ؟
ملوش غيرها بعد ما فضل عشر سنين من غير خلفه
وهي دلوعة ابوها وامها
وعشان كدا قرر يدخلها اعدادية البندر لانه مفيش
عندهم الا مدرسة ابتدائي بس
كنت ساعتها لسه مخلص جيش وشغال في ورشه نجاره
اللي قصاد مدرستها وهي كانت في تالتة اعدادي
كان بينا نظرات وهي رايحه وجايه ع الطريق
بس كنت خايف اكلمها مهما ان كان هي لسه صغيره
وكمان مش ضامن رد فعلها
فاتت
وكان احلى يوم لما بشوفها قدامي كانت ضحكتها
بتنور لي الدنيا
في سنه تانيه قررت اخد خطوه ورحت اطلبها من ابوها
يا حج انا ليا الشرف اتقدم واطلب ايد بنتك
انا شغال في ورشة نجارة وابويا مدرس في الازهر
امي ماتت واتجوز بعدها وليا اخ تاني منه
اصغر مني في المدرسه ..وليا شقة في بيتنا بجهز فيها
ايوه بس انا بنتي لسه صغيره وكمان مكملتش علامها
ومالو يا حج هستنى هي فاضلها سنه وتاخد الدبلوم
عموما خد وقتك واسألوا عني في البندر
وانا منتظر رأيكم
ربنا يقدم اللي فيه الخير يا بني
الحمدلله كانت سمعتنا طيبة والناس كلها كانت بتشكر فينا
وانا كنت ملتزم لا سجاير ولا
ومليش في المشي البطال
بعد كام يوم جات الموافقه وكنت طاير من الفرحه
اخيرا آمال هتبقى ليا
آمال عوضتني عن حاجات كتير
حسيت معاها بحنان الام اللي خسرتها
وانا لسه عيل عنده عشر سنين ، وحسيت انها الاخت
اللي اتحرمت منها ، هي الزوجه والصاحبه والحبيبه
ورغم انها اصغر مني ب5 سنين بس عقلها يوزن بلد
وقفت جنبي وسندتني كتير في اوقات محنتي
كانت نعم الزوجه والحبيبه
خلفنا ولدين وبنت والحياه مشيت
هاجر وعلي وحسن كانوا املنا في الحياه
الورد اللي بيتفتح كل يوم واحلامنا اللي بتكبر
وبتتحقق قدامنا بيهم ومعاهم
اشتريت ورشه صغيره وشغلت معايا صبي
الحكايه كانت مذنقه في
بتقولي اصبر وهتشوف ، وفعلا صبرت وربنا كرم من وسع
الورشه الصغيره كبرت وبقى عندي بدل الصنايعي عشره
والشغل زاد والخير عم ولله الحمد
فاتت الايام والسنين والعيال كبروا واتعلموا
واتجوزوا وفتحوا بيوت ، ورجعنا انا وامال لوحدنا من تاني
والبيت فضي علينا
السن والزمن حكم عليها بالمرض وبقى عندها الزهايمر
وانا كل يوم بعرفها بيا وبحكايتنا لما تصحى وتسألني انت مين.. ودا بيتكرر كل يوم من 3 سنين ومش بمل
بالعكس بكون سعيد وانا بحكيلها وبفتكر معاها احلى ايام
حياتنا وذكرياتنا بحلوها ومرها
ورغم كل السنين دي والتجاعيد اللي خطت على وشها
وايديها الا اني لسه شايفها بجمال
الحلوه ام ضفاير اللي سحرتني من اول يوم شوفتها فيه.
حماده_هيكل
