فندق الأقصر في لاس فيجاس كتابة سارة طارق صابر

الثلاثاء 04/نوفمبر/2025 - 01:01 ص

تنويه وخلاص.
فندق الأقصر في لاس ڤيجاس مكان مليان حاجات غريبة.
أنا راجل عندي 30 سنة وبشتغل في المبيعات ولاس ڤيجاس من المناطق اللي في نطاق شغلي مش عايش هناك بس بقضي فيها وقت كتير علشان الشغل ولازم احافظ إن فاتورة الفندق تكون تحت رقم معين علشان الشركة ترجعلي الفلوس.
الفندق ده بقى أسعاره رخيصة وكمان قريب من مكان شغلي فقولت أجربه بما إني ما نمتش فيه قبل كده يلا نجرب شكله قديم ولطيف.
المهم أول ما دخلت اللوبي حسيت بإحساس غريب خليط بين القلق والفضول الديكور المصري شكله قديم أوي بس العمارة نفسها مبهرة فصعب ما تعجبش بيها.
طلعت الأوضة بتاعتي وفضلت أضحك دي أسوأ أوضة فندق نمت فيها في حياتي! الفندق اتبنى سنة 1993 بس لسبب ما حاسس كأنه من التمانينات.
أنا دايما بحجز أوضة بسريرين علشان الفنادق ساعات بتبخل في البطاطين فباخد بطاطين السرير التاني وأحطهم على سريري علشان أبقى مرتاح.
بس ما باخدش المخدات التانية لأن عندي كفاية ومش هعرف أنام كويس بست مخدات كبار كده.
المهم صحيت بدري وخدت شاور وفجأة حد من العمال بتوع الفندق خبط وأنا لسه بجهز نفسي اضطريت أعلي صوتي جامد علشان اللي برا يسمعني ويفهم إن الأوضة لسه فيها حد.
اتضايقت شوية فحطيت علامة ممنوع الإزعاج على الباب وفضلت محطوطة طول

فترة إقامتي.
وأنا بكمل لبسي فجأة جرس إنذار الحريق ضرب دي أول مرة تحصلي في أي فندق.
وأنا بخلي المكان الأمن قالي إن الأسانسير بتاعنا مقفول بس اللي في الجهة التانية شغال يعني الإنذار جاي من الناحية اللي أنا قاعد فيها واضطريت أنزل 12 دور بالسلم.
دورت على جوجل إنذار حريق فندق الأقصر وطلعت النتايج إن ده بيحصل كذا مرة في الشهر! يمكن علشان الفندق رخيص وبيجي فيه ناس كتير عشوائية.
رجعت أوضتي بعد كام ساعة علشان أتأمل شوية وأصفي دماغي قبل الشغل أول حاجة عملتها إني مشيت ناحية الشباك أشوف المنظر وبعدها بصيت على السرير...
لقيت المخدات بتاعت السرير التاني متكومة فوق بعض تلات طبقات فوق سريري أنا! مفيش حاجة مسروقة بس أنا متأكد 100 إني ما عملتش كده.
قلقت بس حاولت أبرر يمكن الأمن دخل يدور على سبب إنذار الحريق حتى لو مكتوب ممنوع الإزعاج بس بعدين قولت هو إيه اللي ممكن يكون تحت المخدات علشان يدوروا عليه أصلا!
بس كنت عايز أهدى قبل اجتماع الشغل فكبرت دماغي وقفلت الستاير واتمددت وبدأت أتنفس بعمق.
بعد حوالي 20 دقيقة مديري كلمني وقالي لازم أغطي اجتماع مكانه ف لبست بسرعة وخرجت ما لمستش حاجة وسبت الستاير مقفولة.
رجعت حوالي الساعة 11 بالليل وأول ما دخلت الأوضة في حاجة في دماغي نورت في

حاجة مش مظبوطة.
الستاير مفتوحة على الآخر وأنا متأكد إني ما سبتهومش كده ومفيش حاجة مسروقة خوفت شوية بس قولت يمكن شغلت التكييف الصبح والهوا فتح الستارة لوحده أو يمكن فتحتها وأنا مش واخد بالي
قعدت أضحك على نفسي وفضلت اتخيل نفسي بفتحها كذا مرة لحد ما بقيت مصدق ده.
بس كنت مرعوب استحمى حتى أصل لو في حاجة فعلا بتحصل دي فرصة إنها تظهر وأنا في الوضع ده فضلت أدعي طول الليل وكل شوية أسمع خبط وتطبيل حواليا بس ما شوفتش ولا حد طالع أو نازل من الأوض اللي جنبي.
الصبح بصيت على الستاير كانت لسه مقفولة زي ما هي يعني مكنش في هوا ولا حاجة.
كلمت فريقي في مكالمة الصبح وقلتلهم متحمس أسيب المكان علشان في حاجات غريبة بتحصل سألوا يعني إيه فحكيتلهم كل حاجة.
واحد زميلي من ڤيجاس قالي ده معروف جدا إن الفندق ده مسكون دي حاجة الناس هناك عارفينها من زمان.
وأنا مروح قابلت فرد أمن عند الأسانسير وسألته هل الأمن ممكن يدخل الأوض حتى لو محطوط عليها ممنوع الإزعاج لما بيحصل إنذار حريق
قالي نظريا ممكن بس هو ما سمعش إنهم عملوا كده قبل كده.
قولتله عن المخدات والستاير وكان بارد جدا ومقالش حاجة. فسألته بصراحة هو المكان ده مسكون
قالي لأ عمري ما سمعت كده.
يمكن زميلي بيبالغ.
ولما نزلت سألت في الاستقبال نفس

الأسئلة قالولي لأ عمرهم ما بيدخلوا سألتهم لو الضيوف اشتكوا قبل كده إن حاجاتهم بتتحرك قالولي برضو لأ.
سألتهم طب بجد المكان ده مسكون
الست قالت لأ أبدا محدش قال كده قبل كده بس غريب إن حد دخل أوضتك وحرك حاجتك لو عايز قدم بلاغ.
قولتلها لأ طالما مفيش حاجة اتسرقت خلاص.
بعدها دورت على جوجل هل فندق الأقصر مسكون
لو مكنش طلع حاجة كنت هنسى الموضوع بس يا سلام... الموظفين واضح إنهم متدربين ينكروا كل حاجة علشان الأشباح مش كويسة للبزنس.
الموضوع طلع مشهور جدا! الفندق معروف إنه من أكتر الأماكن اللي بتحصل فيها حاجات غريبة والناس بتحكي عن تجارب شبه اللي حصلتلي بالظبط.
لقيت ريفيو 3 نجوم بيقول إن الدور ال مسكون وأنا كنت في الدور ال! مش بس كده كنت في أوضة جنب الأسانسير في النص بالظبط... أكتر أوضة في قلب الدور ال.
وبعدين عرفت إن الفندق من أول ما اتبنى وهو عليه لعنة فيه عمال ماتوا وقت البناء وحكايات عن جثث للمافيا مدفونة تحت المبنى مش مؤكد 4 حالات انتحار من وقت افتتاحه سنة 93 وكذا جريمة قتل وحوادث مميتة بسبب الإهمال.
كمان بيقولوا شكل الهرم نفسه بيأثر على الطاقة وبيجذب الحاجات دي بس أنا مش خبير يعني.
بس اللي متأكد منه عمري ما هنام في الفندق ده تاني ومبسوط إنهم هيهدوه سنة 2026.
ريديت

ريديت_مع_سارة
ريديت_الرعب
سارة_طارق_صابر