اول امبارح الحاجة قالتلي أن واحده صاحبتها من بره المنصوره
والله ماعارف أقول إيه بجد .. كل الذين يحيطون بي أصابهم الجنون رسميا ..
أول امبارح الحاجة قالتلي ان واحدة صاحبتها من برا المنصورة بنتها جايه تسحب فلوس من البنك الصبح والبنك بيبقى زحمة وطوابير فانزل احجز لها مكان عشان البت لما تيجي تدخل على الرقم على طول ..
واهو بالمرة تشوف البت ولو عجبتك نخطبهالك .. دي أمها طيبة وأهلها ناس غلابة ..والكلام اللي انت عارفه ده عزيزي اللي بتقرأ
فأنا حجزت على امبارح اونلاين الساعة تسعة وربع أول ميعاد ..
الساعة سبعة ونص لقيت البت مصحياني من النوم بتقولي انا في المنصورة
نازلة بدري ليه يابنتي هو إحنا نازلين ننقي الدودة في الغيط .. ؟
أمي تقولي دي غريبة عيب هتسيب البت لوحدها .. انزل معاها البنك
اقولها غريبة ايه بس ماهي اكيد جامعتها كانت في المنصورة انتي ليه محسساني انها من قارة تانية ..
ويا ماما البنك اصلا انا حجزته اونلاين .. تقولي لا انزل احجز زي الناس وخد رقم ما تضمنش ..
فافتكرت الحكيم الذي مر عليه الأعرابي وقال له يا حكيم أخبرني ما أفضل
قاله اشتري دماغك
فاشتريت دماغي ونزلت للبت وقلت نقعد نشرب قهوة في بن الغالي جنب البيت عما البنك يفتح..
ونازل وعاصر على نفسي لمونة.. وازيك تمام والحمدلله قعدنا قلتلها تشربي إيه ؟
ويا ريت تكون فاهم ان الكافيه بن بس من اسمه يعني
المهم قالتلي هاتلي مانجا
وبصرف النظر انها حتى لو مش عارفة ان بيقدم بن بس ..مانجا إيه دي اللي تتشرب الساعة سبعة ونص يا آنسة
انتي منين ؟ من فرنصا ؟
فأنا كراجل تلاتيني فاض بيا ومليت ومنزلاني الساعة سبعة ونص ولسه متخانق مع أمي بسببها ..
ضحكت وبكل اريحية وقلتلها
بداية القصيدة كفر..
قالتلي استغفر الله العظيم ايه اللي بتقوله ده..
اسمها بداية القصيدة كفت مش كفر
فأنا سبت موضوع المانجا والقهوة وقلتلها ايه؟ بداية القصيدة ايه
قالتلي بداية القصيدة كفت جاية من الكفتة والعجن
دي بتتقال لما حد يقول اي كلام فيه عجن وهري
وبس يا سيدي انا اتجننت ..
كفت ايه؟
قلتلها يا بنتي ده الشاعر بن هانيء الاندلسي لما راح للمعز لدين الله الفاطمي
وقاله
ما
فالناس قالوا بداية القصيدة كفر
قالتلي الكلام ده غلط هي كفت جاية من العجن والهري
فأنا سكتت بصراحة ويصيت لها كتير.. قلتلها ممكن تسرشي عن الجملة
قالتلي بمنتهى الثقة النت اي حد ممكن يكتب عليه دي امثال معروفة من زمان وهي كفت استغفر ربنا انت
بس يا سيدي يا دوب وصلتها للبنك ودخلتها وروحت
أمي تسبني .. ازاي ودي تيجي
ها البت عجبتك؟
قلتلها دي بتقول بداية القصيدة كفت يا ماما
قالتلي يعني عجبتك صح ؟
اقول لامي وأفهمها عن المعز لدين الله وبن هانيء تقولي يعني عجبتك ؟
اقولها دي بتطلب مانجة الساعة سبعة ونص يا حجة
فتقولي وهي المانجة كمان ليها مواعيد
ولا هو ما لقوش في الورد عيب قالوله ياحمر الخدين
وامي طلعت تشتكيني لخالي وخالتي وعماد أخويا
وعملولي قعدة وحوار
أمي تقول لخالتي شفتي الولا مش راضي بالبت عشان صاحية بدري
وخالتي تقولها عجايب
دي البدرية منسية
والعصفور اللي قام بدري لحق الدودة
بقولها يا خالتي ما الدودة لو كانت ماقامتش
عماد قالي ما تكبر للقعدة ياخي
الدودة ماقامتش بدري دي كانت سهرانة من امبارح
وقعد يضحك وامي تدعيله هي وخالتي وتقولي ولا هي دي كمان هتألف فيها
ويقولي يعني انت مش عايز البت عشان طلبت مانجة وغلطت في حرف
قلتله حرف غير المعنى يا عماد وكمان بتقاوح
فقالي عشان تتجوز ياحمد لازم تعرف ان الست بتغير كلامها كله
وانت لازم توافق عليه
قلتله يعني اوافق بحاجة غلط انتوا هتجننوني
قالي يابني عشان تعيش شاري دماغك ومبسوط معاهم
لازم تعرف ان الستات مش بتقول حاجة غلط
قلتله يعني اسبها تقول بداية القصيدة كفت ده كلام
قالي تسبها تقول ان القصيدة بدايتها كفت عشان حياتك ما تبقاش كفر
وقالي عشان تعيش وتتجوز وترتاح
اللي يجيلك بالغصب خده بالرضا
فأمي بتقولي الله يخربيت اللي اخترع المانجه على سنينك
قولتلها مانجة إيه اللي حد اخترعها؟
لقيت عماد بيقولي اومال انت فاكر ان ايه
الفاكهة دي ناس اخترعوها اومال يوسفندي مين اللي مخترعها
واحد اسمه يوسف افندي
قلتله انت مصدق الكلام الفارغ ده
قالي
أمي قاعده تدعيله وحالفه تعمله عصير مانجة من خزين الفريزر بتاع رمضان
