حكاية هدى قصة واقعية

الجمعة 11/يوليو/2025 - 12:11 م

انا اسمي هديعندي ٢١سنه .. فتحت عينيا علي الدنيا لقيتني عايشه انا واخويا ممدوح اكبر مني ب١٠ سنين...عايشين بين اب وام مش متفاهمين ابدا .. ليل ونهار خلافات علي اتفه الحاجات.. بابا صوته عالي ودايما يزعق وكتير صحيت من نومي مفزوعه علي صوته وهو بيتخانق مع ماما
وهي كمان مكانتش بتسكت كانت بترد عليه كلمه بكلمه وتزيد الخناقه .. وطبعا بقينا مشهورين في المنطقه كلها بمشاكلنا وصوت الخناق الي طالع من بيتنا ليل ونهار
وفي يوم حصلت الحاجه الي غيرت حياتنا بالكامل.. كان بابا وماما في خناقه زي العاده وصوتهم عالي وفجاه بابا نطق كلمتين انتي طالق.. اول منطق الكلمتين دول البيت كله سكت وحصلت حاله من السكون غير طبيعيه .. اصل ده مكانش مجرد طلاق في ساعه غضب.. دي كانت الطلقه التالته .. يعني خلاص مفيش رجوع
وبعدها بابا ساب البيت ومشي وماما بقت ساكته مش بتتكلم الا للضروره
وارتحنا لاول مره من الصوت العالي والخناق المستمر.. وبقينا مش بنشوف بابا الا مره كل شهر يجي يقعد نص ساعه يدي اخويا ظرف فيه مصروف الشهر وورقه ماما توقع عليها انها استلمت الفلوس
.. وبعد فتره حوالي سنه عرفنا ان بابا بيستعد للجواز وجه زارنا وادي اخويا مصروف تلات شهور واخد توقيع ماما علي تلات ايصالات لانه طبعا هيكون مشغول في التجهيز لحياته الجديده.

. وفعلا اتجوز و مبقاش يزورنا غير مره كل تلات شهور ويقعد ربع ساعه يسيب لنا الفلوس وياخد توقيع ماما بالاستلام..وعرفنا انه خلف بنت من مراته الجديده...
ورغم كل المشاكل الي عيشت فيها من صغري كنت متفائله ومقبله علي الحياه وكنت ملاحظه ان المشاكل الي بين ماما وبابا كان سببها ان هم الاتنين عصبيين ومحدش منهم بيتنازل ويفوت للتاني .. علشان كده متعقدتش وكنت مرحه وبحب الحياه ومتفوقه في دراستي
في .. الفتره دي اخويا جت له فرصه يسافر يشتغل بره ورغم تعاسه امي لانه هيسافر لكن موقفتش في طريقه واتماسكت قدامه وودعته بالدعوات والامنيات ان ربنا يوفقه في حياته.. وبعد ما اخويا سافر ماما بقت ساكته وسرحانه طول الوقت وقفلت علينا وبعدت عن الناس ومش عايزه تخرج ولا تشوف حد واستمرت فتره طويله علي الحال ده
وفي يوم رجعت من المدرسه .. انا كنت في الثانويه العامه ..رجعت لقيت ماما تعبانه وباين عليها الارهاق.. قلقت عليها وندهت لجارتنا تشوفها وطلبنا لها الدكتور لكن قبل ميوصل.. لقيناها سكتت فجاه وتوفاها الله ..ربنا يرحمها .. وكنت لوحدي في كل الاجراءات لولا وجود جيراني الطيبين معرفش كنت عملت ايه
وكان امتحاني باقي عليه ايام مقدرتش امتحن.. واخويا رجع من السفر علشان ياخد العزاء.. اما بابا مجاش الا بعد اسبوع ب حجه ان مراته

كانت بتولد وكان مينفعش يسيبها.. وقعد معانا اسبوع وسابنا ومشي ..
واخويا قعد معايا اسبوعين وسافر بعد مقال لي انه هيصفي شغله وياخد مستحقاته وينزل مصر يعيش معايا...
بعد سفر اخويا لقيت نفسي وحيده بمعني الكلمه مفيش معايا حد .. مفيش غير جارتي وجوزها الطيبين .. وكانو عايشين لوحدهم بعد مولادهم كلهم اتجوزو .. فكانو ام واب ليا واعتبروني بنتهم .. كنا بناكل مع بعض ونقعد مع بعض طول اليوم ومش بسيبهم الا وقت النوم ..وشجعتني جارتي الي كانت صاحبه امي .. شجعتني ادخل الامتحان في السنه الجديده واذاكر واتفوق علشان ماما. تفرح وهي اكيد حاسه بيا ...
واخويا بعت قال لي انه مش هيقدر يرجع مصر لان مفيش فرصه شغل له هنا وانه هيحاول يرتب الظروف انه يبعت ياخدني اعيش معاه هناك بعد مخلص امتحانات
وفي يوم لقيت بابا جاي عندي وبيكلمني انه هياخد اوضتين من الشقه الي انا عايشه فيها لانها كبيره وواسعه عليا وانا عايشه فيها لوحدي.. هيفتحهم محلين ياجرهم علشان هو دلوقتي جاله بنت تالته من مراته الجديده .. وان ظروف الحياه صعبه ومصاريف البنات التلاته. مش سهله وفضل يكلمني عن التلات بنات رقت طويل وقتها حسيت بنغزه في قلبي وكنت عايزه اقول له انه غلط في العدد وان في رقم ناقص هو انا وانه عنده اربع بنات مش تلاته .. لكن سكت ومقدرتش

اتكلم
ولا قدرت اقول له اني بخاف ازاي من الضلمه وانا لوحدي وبفتح انوار البيت كله واشغل التليفزيون لحد الفجر علشان يعمل حس في البيت
وفعلا بابا نفذ كلامه واضطريت الم عفش البيت كله في المساحه الباقيه وكانت عباره عن اوضه وصاله ومطبخ و. وحمام
وزود لي مصروفي الشهري ٥٠جنيه ..
ومفكرش ياخدني اعيش معاه بحجه ان مراته طبعها صعب واني مش هرتاح معاها
..محدش فكر ياخدني اعيش معاه غير خالي لكن كان عايش في المنيا وهيكون صعب انقل دراستي وحياتي هناك
واستمرت الحياه بالشكل ده كام شهر لحد مصحيت في يوم علي اسوء خبر سمعته من يوم وفاه امي .. جارتي الحبيبه توفت وبعد ايام العزاء جوزها قفل الشقه وراح يعيش مع ولاده وبقيت وحيده تماما مفيش معايا حد اتكلم معاه ولا يشاركني فرحتي لو جبت درجه حلوه ولا اشكي له تعبي واحزاني ..ولولا مصروف الشهر مكونتش اشوف بابا نص ساعه كل شهر
حياتي بقت كئيبه جدا وبقيت ابكي بالساعات لحد معينيا تورم
احساسي ان مفيش حد عايزني ولا يهمه امري احساس بيعذبني
انا هدخل الجامعه السنه دي ان شاء الله وعندي امل ربنا يعوضني ويبعت لي انسان يراعي ربنا فيا ويخرجني من وحدتي .. اكون معاه اسره وابدا حياه جديده .. .. يكون فيها عوض ربنا عن ايامي الصعبه الي عيشتها من يوم مفتحت عينيا
يارب

رحمتك وسعت كل شئ