ليه لحد دلوقت متجوزتش

الخميس 03/يوليو/2025 - 12:18 م

ليه لحد دلوقتي ما اتجوزتش ؟ وليه مش عايز عيال أبدا ..

جدي من ناحية أبويـا كان مخلف 17 عيـل ، وكان عنده 91 سنـة ولأن أبويا ماكنش موجود هو تولى أمورنا شويا قبل ما هو كمان يموت ، العيلة كانت بتخاف منه لدرجة إنهم كان بيقولوا إنه بيعلق ولاده عريانين بالكلوتات زي الدبيحة لو غلطوا ، أمي نفسها كانت بتقف قدامه زي الفرخة المدبوحة وتقولي جدك ده لو الشمس غابت ينادي عليها تطلعله مخصوص ، ربنا يكفينا شره .. وتقولي عمامك من خوفهم منه بيبوسوا الحمار بتاعه عشان بيخافوا يسلموا على أبوهم .. احتراما ليه وكده

الراجل ده وهو في التسعينات من عمره كان كل يوم الصبح يروح الغيط (الحقل يعني) تخيل كانت صحته عامله ازاى .؟ بن عشرين على رأي أمى ..
بيقولوا بقى انه ضيع حياته دي كلها في حاجة واحدة بس .. وهي انه يسمع أم كلثوم ..
كان عايش في بيت كده كبير ماحدش يقدر يخبط عليه أصلا ، وفاتح تسجيل عليه شرايط مسجلها من الإذاعة وشاريها ، ولف ورا أم كلثوم في شبابه وعشق لا ينتهي .. حلو كده ..؟ تخيلت الوضع

أنا بقى وانا في أولى ثانوي عرفت مدرس مخه تعبان بس كنت بحبه وكان جاي من السعودية جديد وبروح معاه الجامع وبتاع ، وابتديت أربى شعرتين في دقني من تحت وحلقت شنبي موس ، وأسمع شرايط لشيوخ وكده ، المهم كنت أركب أي مواصلات ومعايا شرايط في جيبي لمحمد حسان ومحمد حسين يعقوب .. وأول ما ألاقي أي أغاني أطلع أدي للسواق الشريط اللي معايا عافية وأخد منه الشريط اللي عليه الأغاني وأروح البيت أحط على الشريط بتاع السواق درس ديني وهكذا .. وكنت معروف على

الخط بتاع المواصلات اني بتاع مشاكل من النوع ده ..

فالأستاذ ده مرة بيقولي عارف مين ياحمد مفسدة الأجيال قلتله مين ..؟
قالي أم كلثوم .. اللي غنت رباعيات الخيام وقالت النواسي عانق الخياما .. قلتله يعني إيه ..؟

قالي انت صغير عيب أقولك .. قولتله لا والنبي فهمني وقولي..

قالي يعني أبو نواس وعمر الخيام بيعملوا زي قوم لوط .. فأنا قلتله يا نهار أبيض قالي ومش بس كده ، عارف بقى الاتنين دول قالوا ايه ..؟؟
قلتله قالوا ايه ..
قالي عمر الخيام قال
⦁ ما عشت إلا للغواني مغرما .. وعلى يدي تبر المدام الذائبُ
⦁ قالوا سيقبل منك ربك توبةَ .. لا الله قابلها ولا أنا تائبُ

طب عارف أبو نواس قال ايه .. قلتله ايه .. قالي أبو نواس قال

⦁ دع المساجد للزهاد تسكنها .. وطف بنا نحو خمار ليسقينا
⦁ ما قال ربك ويل للذين سكروا .. ولكن قال ويل للمصلينا

فأنا بقى على قد فهمي ساعتها قلت يا نهار أسود قوم لوط يا ولاد الكلب ، و افتكرت جدي .. وقلت مش معقول أسيبه في ضلاله ده .. قوم إيه يا مؤمن ..؟

رحت دخلت عنده وأخدت الشرايط بتاعة أم كلثوم وخبيتهم في مكان استحالة حد يعرفه .. وافتكرت سيدنا إبراهيم لما حطم أصنام قبيلته وحسيت إني بطل فعلا .. أو ده اللي كنت متخيله وقتها يعني ..

جدي أول ما عرف قلب على الشرايط الدنيا .. ورقد في فرشته .. وقالهم مافيش غيره بن الكلب الصغير المجنون بتاع الأعمال والسحر [ لأني كنت بتعلم الحاجات دي من عم من أعمامي ] ، والراجل تعب أوي ولقيت أمي بتلطم .. جدك هيموت بسببك منك لله رجعله الشرايط ..

أٌقولها قال

يعني بتحبيه .. تقولي بحب ايه منك لله مش هنورث فيه أعمامك هياخدوا الورث وكان بيزق معانا عشان نمشي البيت ..
الراجل وهو بيموت قالهم هاتوه وعدموني العافية كل عيل من عياله عشان يراضي أبوه يضربني وأنا شحط طويل كده .. ويقولهم خلي بالكم ليموت منكم وما نعرفش مخبي الشرايط فين
وألاقي جدي لامم عياله وقاعد يعيط ويقول لعمي (سليم) الكبير عايز أسمع حفلة لبنان يا سليم قبل ما أموت ، خلي الواد يرجعلي الشرايط يا سليم .. وهاتك يا عياط .. يقوله يابا انزل المنصورة اجبلك شريط غيره يقوله لا أنا عايز الحفلة اللي مسجلها ويقعد يعيط زي الأطفال .. وولاده هيتجننوا يا واد يا أحمد هات الشرايط عيب كده .. أقولهم رمتهم في البحر وأنا رايح الدرس يقولوا تعالى ورينا رمتهم فين.. احنا عارفين انك مخبيهم ..

وعمامي داخلين طالعين وحوارات ويقلبوا البيت .. وأنا في قمة الإنشكاح [ بصوت يحيى الفخراني في فيلم الكيف]
رحت قولت للإستاذ بتاعي قالي جدع يا احمد اوعى تديله حاجة .. يبعث المرء على ما مات عليه ..
وكل يوم عم من اعمامي أو عمه تيجي تعدمني العافية وأمي تصوت وخناقات على شويا شرايط وكام شهر وجدي مات .

يقوم أهل أبويا مقاطعين أمي عشـان إبنها البايظ اللي هو أنا .. وعشان كمان ماتتكلمش في ورث وهما اصلا 16 يعني لو كل واحد خد رزاية التركة هتخلص ..
أمي لحد دلوقتي مقتنعة إن السبب في موته أنا وأم كلثوم .. كل أما تسمع صوتها تزعق وتقولي اقفل الزفت ده ما بحبش الولية اللكاكة دي أعمامك كلوا ورثنا بسببها .. وشايله قناة روتانا كلاسيك عشان

بتجيب حفلاتها بلليل تخيل الوضع مأساوي لحد فين ..؟؟

من شويا بقى بقلب في حاجات طفولتي لقيت الشرايط دي فلقيت فعلا شريط مكتوب عليه حفلة لبنان اللي كان جدي عايز يسمعها قبل ما يموت واتضربت بسببها ،فبسمعها وأمي بردوا قاعدة تزعق وتقولي اقفل الزفتة دي ما بحبهاش دي اللي موتت جدك..؟

وأفتكر الاستاذ وهو بيقولي شاطر ياحمد انك خليته ما يسمعهاش قبل ما يموت ، لأن يبعث المرء على ما مات عليه ... وافتكر جدي قبل ما يموت وهو بيقولي ياض انا بحبك هاتلي الشرايط ومش هضربك أقوله يبعث المرء على مات عليه يقولي انا عايز اموت وانا بسمعها .. وافتكر دلوقتي عمر الخيام وهو بيقول :

⦁ يقول المتقون غدا سأحيى .. على ماكنت عليـه في حياتي
⦁ لذا اخترت الحبيبة والشرابا .. لأحشر معهما في مماتي

واتخيل جدي وهو بيقول كده مش عمر الخيام ..

المهم بقول لأمي من شويا عارفة دي إيه ..؟
قالتلي ايه ياخويا .. بقولها الشريط اللي جدى كان نفسه يسمعه .. قالتلي منك لله كان زمانا ورثنا منه لو كنت ادتهوله انت مخبيه كل ده ياخي منك لله الهي ولادك يعملوا فيك اللي عملته فيا يا شيخ ..

أنا بقى كل أما افتكر ان عمر الخيام وأبو نواس بينهم 300 سنة وعمرهم ما شافوا بعض .. واني صدقت المدرس بتاعي أٌقول لنفسي اللي زيي ما ينفعش يتكاثر
اللي مضايقني فعلا اني حاسس بذنب ناحية جدي كنت اديته الشريط .. واللي مزعلني اني حاسس انه كان بيفهم وذوقه حلو في السمع وطول ماكان عايش ماحدش كان بيتجرأ علينا

بس اللي راعبني بقى اني اجيب عيال يعملوا فيا نص اللي عملته

في أمي وأمي تشمت فيا

فأنا مش هنولها ليها أبدا