في السينما بقلم حمادة هيكل
كامله
دخلت انا وجوزي السينما حفلة 9 بالليل
كان فيلم رومانسي وأنا مليش اوي فيه بحب الرعب أكتر ، النهارده عيد جوازنا وهو حب نخش فيلم رومانسي مع بعض
كنا في نص السينما والقاعه مفيش فيها ناس كتير
حوالي 30 او 40 مثلا ، كان في بنت قاعده
في الصف اللي قدامنا قاعده لوحدها ، وكل شوية
تبص الساعه تقريبا كدا اللي مواعدها خلغ ومجاش
لانها كانت بتبص ورا على باب القاعه وكأنها مستنيه
انه يوصل ..كانت مزولاي اوي ،ولاحظت أن جوزي
ابتدا يبص عليها
ايه هي عاجباك ..اقوم انا وأخليها تيجي مكاني
عجباني ايه بس يا روحي وهو انا هبص لحد وانتي معايا
اه يعني ممكن تبص لو انا مش معاك
لا طبعا انا بحترمك في غيابك قبل وجودك
اه بحسب!!
قولتله طب انا داخله التواليت وجايه
طيب بس متتاخريش
خرجت وجيت بعد عشر دقايق
ولمحت البنت كانت قاعده جنبه وفي كلام بينهم
اول ما شافتني جايه ..قامت بسرعه واتنقلت كرسيين
عننا ..
الله الله
والهانم بقى كانت بتقولك ايه
هانم مين دي
السنيوره اللي كانت قاعده جنبك
أرتبك وقال مفيش حد انتي بتحلمي
البنت دي مش كانت قاعده في الصف اللي قدامنا
لأ ..
ايه ؟
اه ..مش فاكر وانا مالي هو انا صاحب القاعه تقعد مكان ما تقعد يا ستي هي حره
ااااه قول كدا بقى جنابك صممت تدخلني الفيلم دا
وفي السينما دي والحفلة دي بالذات ..عشان تقابلها
انا !! والله ولا اعرفها حتى
عليا انا ..انتي فاكرني هبلة ولا داقة عصافير
وعند نص الفيلم جات الاستراحه والنور نور
وابتدت الناس تخرج من القاعه وهي شافت
الشرار هيطق من عيني جريت بسرعه
ولمحت على ياقة قميصه
وبتقولي مفيش حاجه ..اومال ايه دا يا أستاذ
استغرب وقالي معرفش ..معرفش جه منين
دا عليا انا برضو
انا ماشيه وكمل انت الفيلم وسهرتك معاها
استني بس رايحه على فين
خرج جري ورايا في الشارع وأنا منهاره ودموعي
نازله زي المطر ، فضل يراضيني ويستسمحني
ويحلف انه ميعرفهاش ولا عمره شافها
وانها بس جات طلبت منه تتكلم دقيقه من موبايلي
لما انتي خرجتي وبس دا اللي حصل
انا طول عمري مستحمالك وشايله البيت
طبخ ومسح وغسيل وفنيت زهرة شبابي عليك
انت والولاد وكل ما اطلب منك حاجه تقولي
بعدين وربنا يسهل واقول معلش اتحملي يا بت
جوزك وعيالك اهم حاجة وفي الاخر تخوني
انا فعلا معملتش حاجه ولو قصرت في حاجه
سامحيني ..وعارفه انا كنت محضرلك مفاجأة
ايه هي
فاكرة الخاتم
وكان نفسك اجيبهولك
ايوه فاكراه طبعا
خلاص يا ستي يلا بينا نشتريه دلوقت
يا سلام مش كنت بتقولي لسه شوية
الاقساط والجمعيه لما فكرتك بيه من شهر
ها..لا ما انا ..انا ...ايوه انا كنت عامله مفاجأة ليكي
في عيد جوازنا
بجد يا حبيبي
اه طبعا وهو انا ليا غيرك
بالليل بعد ما رجعت صورت الخاتم وهو في إيدي
وبعته في رسالة ل أمنية صاحبتي
مش عارفه لولا مساعدتك ليا النهارده
انتي وصاحبتك كان هيجيب لي الخاتم دا امتى
لا وكمان عمال يحايل فيا اسامحه من ساعتها
ردت عليا وقالت
بجد مش مصدقة ..انا كنت خايفه الخطه تفشل
بس البت سارة طلعت أروبة وحطت له الروج
على ياقة قميصه من غير ما يحس بس انتي
تستاهلي كل خير و مبرووك الخاتم يا
#أبليس_بيبكي_على_خيبته
انا سألت وعرفت أن الشير والمتابعة مش حرام
الشير متاح للجميع
#حماده_هيكل
