كل حياتي للكاتب حماده هيكل
كنت حاسس أن دي اخر مرة هشوف أبويا فيها
يومها ودعني وشد على ايدي وقالي
خلي بالك من أمك واختك
ايوه يابا بس انا اللي مسافر مش انت
ابتسم وقالي محدش عارف مين مفارقها الأول
بوست داماغه ووطيت على ايده ابوسها
ودعت امي واختي ومشيت
فاكر يومها كويس كان الجو برد ومطر
بس قبل ما أسافر قولت لازم أعدي عليها
اودعها قبل ما أسافر واعرفها اني لسه على وعدي
واني هشتغل ليل ونهار عشان احوش أجهز الشقه
واحوش تمن الشبكة والمهر
قالت متقلقش انا هستناك العمر كله
ركبت الطيارة لأول مرة في حياتي وكنت هعيط
مصر هتوحشني اوي ..مش متخيل أن كنت هزعل اوي
وانا مفارقها ..متخيلتش اني هزعل خالص
وطول عمري بحلم بفرصة عشان اهج وابعد
من اللي شوفته من قسوه وذل وعدم تقدير
بس الظاهر اني كنت غلطان وان بلدي هتوحشني
يمكن شوارعها وبيوتها وناسها
بلدي هي ضحكة أمي لما نجحت ورعب ابويا وخوفه
عليا لما أنكسرت وانا عيل ..بلدي هي عيون حبيبتي
ولمعتهم وانا بقولها بحبك لأول مرة
ولما فارقتهم بلدي وحشتني
وحسيت بدا اكتر في الغربة كنت شغال في مطعم
14 ساعة ..اتعاملت مع جنسيات كتير عرب وخواجات
وكل الديانات ..البشر مختلفين في طباع ولغات وعادات
والكل بيجري ورا مصلحته حتى لو داس على
كنت بتحمل وبفوت كتير عشان أحقق حلمي
فاتت سنه ونص وقدرت اجمع مبلغ كويس
بعد ما سدتت ديوني وحق التذكرة اللي استلفته عشان أسافر
كلمت حبيبتي وعرفتها اني خلاص كلها شهر وهنزل
ونكتب الكتاب واحقق حلمنا ونبقى مع بعض
كانت هتطير من الفرحه اخيرا حلمنا هيتحقق
بس معرفش ليه حسيت قلبي مقبوض
كنت حاسس أن فرحتي مش هتكمل
أتصلت على أختي مكانتش بترد ..قلقي زاد اكتر
كنت زي خايف وحاسس أن فيه حاجه
بعد ساعه لقيتها بتكلمني وبتقولي أبوك وقع ودخل المستشفى ..الدكاترة بيقولوا خالته صعبه
ولازم عملية قلب مفتوح في أقرب وقت
كنت هنزل اجازتي كمان شهر المبلغ اللي هنزل
أخطب بيه واجيب الشبكه وادفع المهر مش هيكفي كمان
اضطريت استلف كمان وبعت الفلوس على مصر
وبعد اسبوع ابويا كان عمل العملية
فضل بعدها كام يوم ورجع البيت بالسلامه
خطيبتي زعلت لاني ضيعت الفلوس اللي هنتجوز بيها
طب اعمل ايه ..اطلع ندل وابيع ابويا اللي خيره عليا
واخطب واتجوز ..هعيش متهني يعني ومبسوط
لو ابويا جراله حاجه عشان ابنه مش راجل
فضلت مبتردش على تليفوناتي ورسايلي
قولت لما انزل الاجازه هصالحها واراضيها
ايام ونزلت ..بلدي وحشتني جريت على بيتنا
خبطت ع الباب ..فتحت لي اختي
كانت
انتي لابسه اسود ليه؟
مالك يا امه بتعيطي ليه ..دموع الفرح عشان ابنك رجع
هو ابويا فين ..يابا ..ياحج ابنك رجع
هو نايم ! نايم صح. انا دخل اصحيه
جريت على أوضته وفتحت الباب
ابويا مكنش في فرشته
اكيد راح الجامع ..انا رايح له يا ما هجيبه وجاي
ابوك مات ..
وقفت عند الباب وكنت مرعوب ومش عايز اسمع الجمله
لا ..هو بيصلي انا رايحله..أزاي يسبني قبل ما ارجع
هو انا موحشتوش..طب هو وحشني ..وحشني اوي يا امه
ادعيله بالرحمه يا حبيبي
اترميت في حضن امي وفضلت ابكي زي العيال
واصرخ بصوت عالي وموجوع
ابويا مات وسابني..دلوقتي فهمت ليه كان
بيوصيني عليكم رغم اني انا اللي كنت مسافر
محدش عارف مين مفارقها قبل مين
بالليل خطيبتي بعتت لي دبلتها مع اخوها
وقالت كل حاجه قسمه ونصيب
خسرت ابويا وحبيبتي في يوم واحد
مهانش عليها تصبر لحد ما افوق من صدمتي على ابويا
كنت حاسس الدنيا أسودت في وشي
واني خلاص خسرت كل حاجه
بعد يومين جالنا خالي ومراته وبنته عشان يسلموا عليا
ويعزوني في والدي
كنت شبه منهار ويحاول اتماسك
دخلت البلكونه واستاذنت عشان اشرب سجاره
بس الحقيقه هربت قبل ما يشوفوا دموعي
بعد ثواني لقيت ايد بتطبطب على كتفي
كنت عارفه
حاولت اداري دموعي
وقالت
انا اكتر وحده حاسه بيك وعارفه اد ايه انت موجوع
عشان جوز عمتي الله يرحمه وعشان خطيبتك
احساس صعب ومحدش هيحس بيك ادي
لاني مجربه لما تحب حد ويبقى مش ليك
قصدك أيه
قصدي اني مش عايزه حد يشوف دموعك خالص
ولا انا ..انت دموعك غالية اوي عندي
انتي بتعيطي !
هربت منهم زيك عشان محدش يشوفني
بس انا شوفتك
لانك الوحيد اللي يحق ليه يشوفني في وقت ضعفي
ليه
كل دا ومفهمتش
ودا حصل امتى
من سنين
وليه معرفتنيش ؟
لأنك مكنتش من حقي ..وكانت عنيك
مش شايفه غيرها ..وانا واثقه انها مش شبهك
وانك راجل وابن اصول ..اخترت تنقذ أبوك
وافتكرت انها هتقف جنبك ..بس لسه حبها عاميك عن الحقيقه ..عن اذنك
ليلتها نمت وفي حاجة جوايا مبسوطه
وحسيت اد ايه كنت مغفل طول السنين دي كلها
كنت بشوف مواقف من حبيبتي تخليني اسيبها
ومن بنت خالي كنت بشوف العكس جدعه
وطيبه وكنت فاكر دا لاننا قرايب بس
رغم انها مبتعملش دا مع حد غيري من شباب العيلة
خطيبتي كانت اختيار غلط من البداية
ومش هي دي اللي كنت هآمنها على نفسي وعلى مالي
لانها كانت هتبيعني في أقرب مشكلة
رجعت من الاجازه للشغل بعد شهر
وأنا في صباعي دبلة بنت خالي وعندي
أن ربنا كان له حكمه في اللي حصل
وان مرض وموت ابويا كان سبب اني اشوف الحقيقه كاملة
وان بداخل كل محنة منحة ..الحمدلله.
حماده_هيكل
